1 Ahasi nayali na miyaka makumi meli loyaluche kulongoza. Nakalongoza ako Yelusalemu kwa mhela wa miyaka kumi na sita. Nakadita vilivinji na sekulu wa heye Daudi, heye haditile ganojile hali Mkulu Nguluwi. 2 Nakawinza nzila za wandewa wa Isilaeli na kugongomanya jimalukolo kwa chiwalo cha kujifugamila Mibaali. 3 Nakalavya nhambiko za kulakazwa kuli ibindi lya Beni-hinomu na kuwalakaza kwa chiluli wanage kota nhambiko, yowinza nzila za kuzudiza za wala wanhu wa isi wawele Mkulu Nguluwi nayali yawawinjile hali wanhu wa Isilaeli. 4 Ahasi nakalavya nhambiko na kufunyiza ubani hali honhu ha kufugamila milungu na mchanya mwa vidunda na hasi ha chila igodi liwele na mahamba madodi.

5,6 Mkulu Nguluwi, nakamdita mndewa wa Waalamu yamsumye mndewa Ahasi na kuwahola wanhu wa heye wenji leka wawe wapogozi na kuwahilika mbaka ako Damasiko, kwa vila mndewa Ahasi nakadita gehile hali Nguluwi. Kahi Nguluwi nakamdita Peka, mndewa wa Isilaeli, mwana wa Lemaliya, yamsumye Ahasi na kuwakopola wamizi wazidahe lachi imwe na elufu makumi meli (120,000) kuli zuwa limwe. Aga geng'ha nagalawila kwa vila wanhu wa Yuda nawamleka Mkulu Nguluwi, Nguluwi wa wasekulu wa hewo. 7 Mhela wula wa ngondo, Sikili mwamizi yazidahe kulawa Isilaeli, nakawakopola wanhu wadatu, wawele ndo Maaseya, mwana wa mndewa na Asilikamu, mkulu wa ng'handa ya chiundewa na Elikana, yawele ndo wa keli kuli ulongozi kulawa mndewa. 8 Wamizi wa Isilaeli nawahola chasi chikulu cha vinhu na kuwahola wanhu lachi mbili (200,000), wawele ndo wadala na wana na kuwahilika kuli muji wa Samaliya. Nawadita ahyo hanga wanhu wa Yuda nawali wang'holozawo.

9 Ako Samaliya nakwali na mloli wa Mkulu Nguluwi yawele nayali yochemigwa Odedi. Mloli ayo nakaluta kuwabochela wamizi wa Isilaeli hamwe na wapogozi wa ngondo wa hewo, wawele ndo Wayuda. Lowawele habehi kwinjila kuli muji wa Samaliya, nakawalonjela, "Mkulu Nguluwi, Nguluwi wa wasekulu wa hemwe, nayali na ng'halazi kwa chiwalo cha wanhu wa Yuda, ahyo nakawawika mmoko mwa hemwe, ila namuwadumula singo kwa ng'halazi. Mbuli ayo naifika mbaka kilanga. 10 Lelo mwangugana kuwadita wanhu wa Yuda na wa Yelusalemu wawe wapogozi wa hemwe. Ndaze, mwahela nongwa kwa Mkulu Nguluwi, Nguluwi wa hemwe? 11 Lelo mnyhulichize! Muwahiluse wapogozi wawele ndo wang'holozenu, kwa vila ng'halazi ing'hang'hale ya Mkulu Nguluwi ya mchanya mwa hemwe."

12 Wakulu wamwenga wa Efulaimu, wawele ndo Asaliya, mwana wa Yohanani na Belekiya, mwana wa Meshilemoti na Yehisikiya, mwana wa Shalumu na Amasa, mwana wa Hadilayi, nawakunda chila choyalonjile mloli, ahyo nawali wochitwanza na wala wawele nawali wohiluka kulawa kuli kitowa ngondo. 13 Nawawalonjela, "Mleche kuwegala amu wapogozi awo, kwa vila mwangugana kutigalila nongwa hali Mkulu Nguluwi. Ndaze, mwangugana konjeza gehile na nongwa za hetwe? Kwa vila nongwa za hetwe ndo ng'hulu, nayo ng'halazi ing'hang'hale ya Mkulu Nguluwi kahi ya mchanya mwa Isilaeli."

14 Ahyo, wamizi weng'ha nawawaleka wapogozi na vinhu vyeng'ha hali vilongozi na nhing'hano yeng'ha. 15 Hamba wakulu awo nawalongoza mijito ja kuwahola wala wapogozi na kulawa kuli vila vinhu vyowaviholile kuli ngondo, nawahola nguwo na kuwavaliza wapogozi weng'ha wawele nawali walihela nguwo. Nawawapa makwamba na vilyo na vyakunwa na mikwandi kwa wala wawele nawali ng'hochele hali hewo na kuwawika mchanya mwa midogowi, hamba nawawahilika mbaka Yeliko, muji wa michikichi, kwa wang'holozawo, hamba hewo nawahiluka Samaliya.

16 Mhela wula mndewa Ahasi nakawalajiza wasenga kwa mndewa wa Ashulu kulanda utanzi, 17 kwa vila Waedomu nawali woyile kahi kuivaba isi ya Yuda na kuwahola wanhu wenji na kuwadita wawe wapogozi wa ngondo. 18 Mhela wuwo kahi, Wafilisti nawali wojitowa miji jiwele hasi ha vidunda na kuli miji ja Negebu ya Yuda. Nawajihola miji ja Beti-shemeshi na Aiyaloni na Gedeloti na Soko na vijiji vyake na Timuna na vijiji vyake na Gimuso na vijiji vyake na kikala amo. 19 Mkulu Nguluwi nakawagaza wanhu wa Yuda kwa magazo ago, kwa vila Ahasi hamhulichize heye na nakalema kuwalemeza wanhu wa Yuda kudita gehile. 20 Ahyo, Tigilati-pileseli, mndewa wa Ashulu, nakoya kumgaza honhu ha kumtanza. 21 Ahasi nakavihola vinhu vimwenga vya sendi nyinji kulawa kuli ng'handa ya Mkulu Nguluwi na kulawa kuli ng'handa ya mndewa na ng'handa za wakulu, nakamha mndewa wa Ashulu kota ushulu, ila mbuli ayo haimtanzile.

22 Mhela uwele mndewa Ahasi nayali kuli magazo, nakalutilila kumbelenhuka ng'hatu Mkulu Nguluwi. 23 Nakajilavila nhambiko milungu ja Damasiko jiwele najimsumya kuli ngondo, yolonga, "Kwa vila milungu ja mndewa wa Alamu najiwatanza hewo, nani ndojilavila nhambiko leka jinhanze." Ila mbuli ayo nayambuza kudumigwa kwa heye na wanhu weng'ha wa kuli undewa wa heye. 24 Ahasi nakavikungajiza vinhu vyeng'ha vya kuli ng'handa ya Nguluwi, nakavibenanga. Hamba nakahinda lwizi ja ng'handa ya Mkulu Nguluwi na kuzenga honhu ha kulavila nhambiko kuli chila nzila mhanda ya muji wa Yelusalemu. 25 Kuli chila muji wa Yuda, nakagongomanya honhu ha kufugamila, kwa chiwalo cha kujilavila milungu nhambiko za kulakazwa. Kwa kudita ahyo, nakamzudiza Mkulu Nguluwi, Nguluwi wa wasekulu wa heye.

26 Madito ganji ga ulongozi wa heye na mbuli za heye zeng'ha, kulawa mwaluko mbaka kuduma, navyandichigwa kuli chitabu cha kukumbuchila kwa wandewa wa Yuda na wa Isilaeli. 27 Ahasi nakabagama na nakatiligwa kuli muji wa Yelusalemu, ila haiwele kuli vilaga vya wandewa. Hesekiya, mwanage, nakalongoza honhu ha heye.