1 Lelo mndewa Solomoni loyasindile mijito jeng'ha kwa chiwalo cha ng'handa ya Mkulu Nguluwi, nakavihola vila vinhu viwele Daudi, mhaza wa heye nayali yaviditile viwe vya chiuyeng'ha, viwele ndo sendi na zahabu na vinhu viyage, hamba nakaviwika vinhu avyo kuli ng'hano za ng'handa ya Nguluwi.

2 Lelo, mndewa Solomoni, nakawachema wasekulu na vilongozi weng'ha wa nhanzi na wa ivyazi lya Isilaeli ako Yelusalemu, leka waligale isanduku lya ilagano lya Mkulu Nguluwi kulawa honhu hamwenga ha muji wa Daudi, hawele ndo chidunda cha Siyoni mbaka kuli ng'handa ya Nguluwi. 3 Waisilaeli weng'ha nawekungajiza kwa mndewa Solomoni mhela wa mnvina ya vibumuli, kuli mwezi wa saba. 4 Wasekulu weng'ha wa Isilaeli lowafichile, Walawi nawalipika isanduku lya ilagano lya Mkulu Nguluwi. 5 Walawi na watambika nawalihola isanduku lya ilagano lya Mkulu Nguluwi na ihema lya Nguluwi na vinhu vyelile vyeng'ha viwele amo mihema, watambika na Walawi nawavipika. 6 Mndewa Solomoni na nhing'hano yeng'ha ya Waisilaeli wawele nawekungajiza hali heye, wawele nawali hali alyo isanduku lya ilagano, nawalavya nhambiko nyinji za ming'holo na misenga jiwele hisabu yake hailinguweza kwandichigwa ne kuwazigwa. 7 Hamba watambika nawalihilika isanduku lya ilagano lya Mkulu Nguluwi mbaka hali honhu hake, mgati ng'hatu mwa ng'handa ya Nguluwi, hawele ndo honhu helile ng'hatu, nawaliwika hasi ha mabawa ga vilumbigwe viwele na mabawa. 8 Mabawa ga vilumbigwe viwele na mabawa nagagonzoligwa mchanya mwa honhu hawichigwe isanduku lya ilagano, ahyo isanduku alyo na mipichilo jake navyali hasi ha mabawa. 9 Mipichilo ja isanduku alyo najali ng'wemang'wema lukami mbaka najoneka kulawa honhu helile hali honhu helile ng'hatu, ila hajilingoneka hanze ha honhu helile. Mipichilo ajo jing'hali kuko. 10 Mgati mwa isanduku lya ilagano navisigala vila vibawo vili hela vya maganga, viwele Musa nayali yaviwichile mgati mwake ako Holebu, honhu hawele Mkulu Nguluwi nakadita ilagano na Waisilaeli lowalawile Misili.

11 Hamba watambika nawalawa hala honhu helile. Weng'ha wawele hala ne kulola vilundo vya hewo, nawali wewelize. 12 Walawi weng'ha wawele nawali wokwimba, wawele ndo Asafu na Hemani na Yedutuni hamwe na Walawi wanji wa lukolo lwao, nawavala nguwo za kitani inojile. Nawema ubanzi wa kolilawilaga isanya mwa honhu ha kulavila nhambiko kuno wotowa matoazi na ving'weleng'wele na migombogombo. Nawali hamwe na watambika miya imwe na makumi meli (120) kuno wotowa mhalamhanda. 13 Walingwimba nawawinzigwa na lizi lilingiwhana lya matoazi na migombogombo na vinhu vinji vya muzichi kota lizi limwe, nawamtogola Mkulu Nguluwi wokwimba, "Heye ndo yanojile, igano lya heye lya kwimilila lyangikala mazuwa gose." Mhela awo ng'handa ya Mkulu Nguluwi naimemezwa ng'hungugu. 14 Ahyo watambika nawalemwela kukola mijito kwa chiwalo cha ng'hungugu ayo, kwa vila ukulu wa Mkulu Nguluwi nauimemeza ng'handa ya Nguluwi.