1 Solomoni nakaluka kuzenga ng'handa ya Mkulu Nguluwi kula Yelusalemu, mchanya mwa chidunda cha Moliya, hala hawele Mkulu Nguluwi nayali yamlawile Daudi, mhaza wa heye. Honhu aho nahali ha kupululila nyhule ha Alauna, Myebusi, honhu hawele nahali nahahaguligwa na Daudi. 2 Mndewa Solomoni nakaluka kuzenga ng'handa ya Nguluwi kuli zuwa lya keli lya mwezi wa keli, kuli mwaka wa kane wa ulongozi wa heye. 3 Msisi woyauwichile Solomoni kwa chiwalo cha kuzenga ng'handa ya Nguluwi, nawali na ulefu wa mita makumi meli na saba na ugazi wa mita tisa. 4 Chituka cha kumwando nachali na ulefu wa mita tisa kwa kiwhana na ugazi wa ng'handa ayo na wimo wake nawali mita tisa. Ng'hanzi zake nazigubikwa kwa zahabu inojile kwa mgati. 5 Chituka chikulu nachizungulusilwa mbawo za mibeloshi na kugubikwa kwa zahabu inojile na kunoligwa kwa kiwhana na migodi ja michikichi na minyololo. 6 Mndewa Solomoni nakainoliga ng'handa ya Nguluwi kwa maganga ga sendi nyinji. Zahabu ya kunoliga nailawa kuli isi ya Palivaimu. 7 Nakainoliga ng'handa yeng'ha kwa zahabu, boliti zake na fulemu zake na ng'hanzi zake na lwizi jake. Kuli ng'hanzi nakanoliga kwa kuhongola vilumbigwe viwele na mabawa. 8 Kahi nakahazenga honhu helile ng'hatu, ulefu na ugazi wake navyali mita tisa, kwa kiwhana na ugazi wa ng'handa ya Nguluwi. Nakachigubika chihengo acho kwa kilo elufu kumi na nane (18,000) za zahabu. 9 Misumali ja zahabu najali na gilamu miya zihano na makumi saba. Kahi nakavigubika kwa zahabu vihengo vyeng'ha vya kuchanya. 10 Nakajigongomanya kwa mbawo jimalukolo mili ja vilumbigwe viwele na mabawa, hamba nakajigubika kwa zahabu na kujiwika hali honhu helile ng'hatu. 11 Ulefu wa mabawa ga vilumbigwe avyo nawali mita tisa. Chila chilumbigwe nachali na ugazi wa mita zine na nusu. Ibawa limwe nalidoliza lukanzi ubanzi umwe wa chihengo na lya keli naliting'hana na ibawa lya chilumbigwe chiyage. 12 Hihyo du ibawa limwe lya chilumbigwe cha keli nalidoliza lukanzi kuli ubanzi uyage wa chihengo na ibawa lya keli naliting'hana na ibawa lya chilumbigwe cha mwaluko hagati ha chihengo. 13 Ulefu wa mabawa meli ga jimalukolo ja vilumbigwe avyo viwele na mabawa, nawali mita zine na nusu. Nawema hamwe kuno kumeho kwa avyo vilumbigwe nakwali kulola kulutila kuli lwizi. 14 Nakagongomanya ipaziya kwa chibende cha kitani inojile cha lanji ya buluu na ya zambalau na ndung'hu. Nakalinoliga kwa kuchola vilumbigwe viwele na mabawa.

15 Mndewa Solomoni nakagongomanya mizengo mili, chila limwe nalyali na ulefu wa mita kumi na sita, hamba nakajiwika kumwando mwa ng'handa. Chila izengo nalyali na itaji mchanya mwake, liwele na ulefu wa mita mbili na nusu. 16 Nakagongomanya vinoligo kota ugasi mchanya mwa vitwi vya mizengo ajo, nakahongola kahi vinoligo vya makomamanga miya imwe mchanya mwake. 17 Nakajimiza mizengo ajo kumwando mwa ng'handa ya Nguluwi, limwe nakaliwika kuli ubanzi wa kusini na liyage nakaliwika kuli ubanzi wa kasikazini. Lila lya ubanzi wa kusini nakalichema Yakini na lila lya ubanzi wa kasikazini nakalichema Boasi.