1 Muhe wa Nguluwi naumuyila Asaliya, mwana wa Obedi. 2 Nakaluta kumona mndewa Asa na kumlonjela, "Unyhulichize gwa mndewa Asa na wanhu weng'ha wa Yuda na Benjamini. Mkulu Nguluwi ka hamwe na hemwe, wone mowa hamwe na heye. Wone mompala, kokoneka kwa hemwe, ila wone momleka naye kowaleka hemwe. 3 Kwa mhela winji Waisilaeli nawali walihela Nguluwi wa kukomya ne watambika wa kuwalangusa ne malajizo. 4 Ila lowafichigwe na magazo nawamgalamchila Mkulu Nguluwi, Nguluwi wa Isilaeli, nawampala, naye nakoneka kwa hewo. 5 Kuli mazuwa ago hakuwele na kikala goya kwa yoneche yawele nayali kuli majendo, kulawa ne kwinjila, kwa vila wenyeng'haye weng'ha wa isi nawali kuli ivuche ng'hatu. 6 Nakumema kilewa kwinji, wanhu wa isi imwe nawetowa na wanhu wa isi iyage na wanhu wa muji umwe nawali wochitowa na wanhu wa muji uyage, kwa vila Nguluwi nayali yowagaza kwa magazo galivinji. 7 Ila hemwe muwe nzinzili na mleche kutweguka nhumbula, kwa vila mopegwa chonolo kwa mijito jomlingukola."

8 Asa loyahuliche ulonzi awo na uloli wa Asaliya, mwana wa Obedi, nakekangaza nhumbula. Nakosa jimalukolo jeng'ha jiwele ndo izudizo kuli isi yeng'ha ya Yuda na Benjamini na kulawa kuli miji jeng'ha joyajiholile kuli isi ya vidunda vya Efulaimu. Nakazenga kahi honhu ha kulavila nhambiko ha Mkulu Nguluwi, hawele kumwando mwa chituka cha ng'handa ya Mkulu Nguluwi. 9 Hamba Asa nakawachema wanhu weng'ha wa Yuda na Benjamini na wanji weng'ha wawele nawali wochikala kuli isi ya heye kulawa Efulaimu na Manase na Simeoni. Wanhu awo nawaluta kwa heye kulawa Isilaeli, lowawene kota Mkulu Nguluwi, Nguluwi wa heye ka hamwe na heye. 10 Weng'ha nawekungajiza hamwe Yelusalemu kuli mwezi wa kadatu wa mwaka wa kumi na kahano wa ulongozi wa Asa. 11 Mhela awo nawamlavila Mkulu Nguluwi nhambiko za misenga miya saba (700) na ming'holo na mhene elufu saba (7,000) kulawa kuli lufufu lula lowaholile kulawa kuli kitowa ngondo. 12 Nawadita ilagano kota womhulichiza Mkulu Nguluwi, Nguluwi wa wasekulu wa hewo kwa nhumbula za hewo zeng'ha na kwa muhe wa hewo weng'ha 13 na kota yoneche yohambe yamhulichize Mkulu Nguluwi, Nguluwi wa Isilaeli, yawe mdodo ama mkulu, mlume ama mdala, koganigwa yakopoligwe. 14 Nawelaha kwa Mkulu Nguluwi kwa lizi likulu na kwa kutowa iyowe na kutowa talumbeta na mhalamanda. 15 Wanhu weng'ha wa Yuda nawasangalala kwa vila nawelaha kwa nhumbula za hewo zeng'ha. Nawampala ng'hatu Nguluwi, naye nakoneka kwa hewo. Ahyo Mkulu Nguluwi nakawapa kikala goya kuli banzi zeng'ha.

16 Mndewa Asa nakamusa Maaka kuli ulongozi, papa wa heye, kota chilongozi mkulu wa chidala, kwa vila nakagongomanya limalukolo lya Ashela, liwele ndo izudizo. Asa nakajibenanga na kujilakaza ajo jimalukolo kuli ibindi lya Kidiloni. 17 Hanga nayali hahosile honhu ha kufugamila milungu kuli Isilaeli, ila Asa nayali yomkolela mijito Mkulu Nguluwi kwa nhumbula ya kukundigwa kuli kikala kwa heye kweng'ha. 18 Nakaviwika mgati mwa ng'handa ya Nguluwi sendi na zahabu na vila vinhu viwele heye na mhaza wa heye nawali waviwichile chiuyeng'ha. 19 Hakuwele na ngondo kahi kuli isi mbaka mwaka wa makumi gadatu na gahano (35) wa ulongozi wa Asa.