1 Ulongozi wa Lehoboamu lowimile nzinzili na kuwa na mong'ho, heye hamwe na wanhu weng'ha wa Isilaeli walingikala Yuda, nawaleka kibatilila malajizo ga Mkulu Nguluwi. 2 Kwa vila hawawele wa kukundigwa kwa Mkulu Nguluwi, Shishaki, mndewa wa Misili nakautowa muji wa Yelusalemu kuli mwaka wa kahano wa ulongozi wa mndewa Lehoboamu, 3 yawele na mituka ja kitowela ngondo elufu imwe na miya mbili (1,200) na wakwina falasi elufu makumi sita (60,000) na wamizi wenji ng'hatu wa Walibiya na Wasukii na Wakushi, woyile hamwe na heye kulawa isi ya Misili. 4 Nakajihola miji jiwele na ngome ako Yuda na nakalutilila mbaka Yelusalemu. 5 Hamba mloli Shemaya nakaluta kwa mndewa Lehoboamu na kwa vilongozi wa Yuda wawele nawali wekungajize ako Yelusalemu kwa chiwalo cha kumdumba Shishaki, naye nakawalonjela, "Mkulu Nguluwi kangulonga hino, ‘Hemwe namndeka, ahyo nani ndanguwaleka hemwe mmoko mwa Shishaki.’ " 6 Vilongozi wa Isilaeli na mndewa nawali wochinyenyeteza wolonga, "Mkulu Nguluwi ndo yawele na hachi."

7 Mkulu Nguluwi loyawene nawali wochinyenyeteza lukami, ulonzi wa Mkulu Nguluwi naumuyila Shemaya, naumlonjela, "Kwa vila nawanyenyetela lukami, siwadumya, ila ndowalohola mhela udo ulinguya. Siudulisila kuzudila kwa heni muji wa Yelusalemu kwa kukolela moko wa Shishaki, 8 ila womkolela mijito Shishaki, leka wavizele kota kuwakolela mijito wandewa wa isi kwa ndaze na kung'holela mijito kwa ndaze."

9 Shishaki mndewa wa Misili loyautowile muji wa Yelusalemu, nakahola ng'hano za ng'handa ya Mkulu Nguluwi na ng'hano za ng'handa ya chiundewa. Nakahola chila chinhu, hamwe na zila ngawo za zahabu ziwele mndewa Solomoni nayali yazigongomanye. 10 Ahyo, mndewa Lehoboamu nakagongomanya ngawo za shaba honhu ha zila za zahabu na kuwapa wakulu wa wamizi walingwamila kuli lwizi lwa ng'handa ya chiundewa. 11 Chila mhela mndewa loyawele yoluta kuli ng'handa ya Mkulu Nguluwi, wamizi nawali woluta hamwe na heye kuno wawele na ngawo azo, hamba nawali wozihilula kuli chihengo cha kwamilila. 12 Kwa vila Lehoboamu nayali yenyenyeteze, ng'halazi ya Mkulu Nguluwi nayali kutali na heye, hadumigwe. Ahyo mbuli za isi ya Yuda nazilutilila goya.

13 Ahyo mndewa Lehoboamu nayali yewichile nzinzili ng'hatu kuli Yelusalemu na nakalutilila kuwa mndewa. Nakaluka kulongoza loyawele na miyaka makumi gane na umwe, naye nakalongoza kwa miyaka kumi na saba ako Yelusalemu, muji uwele Mkulu Nguluwi nayali yauhagule kulawa nhanzi zeng'ha za Isilaeli leka yaliwiche itagwa lya heye amo. Mayake nayali yochemigwa Naama, yawele nayali Mwamoni. 14 Lehoboamu nakadita wihe, kwa vila haganile kumpala Mkulu Nguluwi kwa nhumbula ya heye yeng'ha. 15 Madito ganji ga mndewa Lehoboamu, kulawa mwaluko mbaka kuduma na kuzeleka kwa lukolo lwake, nagandichigwa kuli chitabu cha mloli Shemaya na kukumbuchila kwa Ido, mlaguzi. Mhela awu weng'ha, nakwali na ngondo ilingulutilila hali Lehoboamu na Yeloboamu. 16 Hamba Lehoboamu nakabagama na kutiligwa kuli vilaga vya wasekulu wa heye, kuli muji wa Daudi. Abiya, mwanage, nakalongoza honhu ha heye.