1 Mndewa Yosiya nakamditila Mkulu Nguluwi mnvina ya Pasaka ako Yelusalemu, nawalidumula singo ing'holo lya mnvina ya Pasaka kuli zuwa ya kumi na zine lya mwezi wa mwaluko. 2 Nakawahagula watambika kwa mijito ja hewo jowaganigwe kudita na kuwakangaza nhumbula kuli uchitumagwa wa ng'handa ya Mkulu Nguluwi. 3 Hamba nakawalonjela Walawi, wawele nawawalangusa wanhu weng'ha wa Isilaeli, wewichile chiuyeng'ha kwa chiwalo cha mijito ja Mkulu Nguluwi, "Mliwiche isanduku lya ilagano mgati mwa ng'handa izenjigwe na mndewa Solomoni, mwana wa Daudi, mndewa wa Isilaeli. Halilinguganigwa kupichigwa mmayega kahi kulihilika honhu hanji. Lelo mumkolele mijito Mkulu Nguluwi, Nguluwi wa hemwe na wanhu wa heye Waisilaeli. 4 Mkole mijito ja hemwe kwa kiwhana na ivyazi na ng'holo za hemwe, kwa kuwinza malajizo ga Solomoni, mwana wa Daudi, mndewa wa Isilaeli.

5 "Walawi mwime hali ng'handa ya Nguluwi kuli vilundo, chila chilundo kwa chiwalo cha kulutanza chila lukolo lwa wanhu. 6 Miyelize na kiwika goya kujidumula singo ming'holo ja Pasaka kwa chiwalo cha wang'holozenu, kota ulonzi wa Mkulu Nguluwi vyoulingulonga kwa kukolela Musa."

7 Hamba Yosiya nakawapa wanhu ming'holo na mhene elufu makumi gadatu (30,000) na mibuguma elufu zidatu (3,000) kwa chiwalo cha nhambiko ya mnvina ya Pasaka, jeng'ha aji najilawa kuli migongolo ja mndewa. 8 Vilongozi wa heye kahi, kwa kunuwila kwa hewo nawalavya ndolendole za hewo nawawapa wanhu na watambika na Walawi. Hilikiya na Sekaliya na Yehieli na wakulu wa ng'handa ya Nguluwi, nawawapa watambika nhambiko za Pasaka ming'holo myana na mhene elufu mbili na miya sita (2,600) na mibuguma miya zidatu (300). 9 Naye Konaniya na wang'holoze weli, wawele ndo Shemaya na Netaneli, hamwe na Hashabiya na Yeieli na Yosabadi, wawele nawali vilongozi wa Walawi, nawo kahi nawawapa Walawi ming'holo myana na mhene elufu zihano (5,000) na mibuguma miya zihano (500), kwa chiwalo cha nhambiko ya Pasaka.

10 Lowasindile kuwika goya vinhu vyeng'ha kwa chiwalo cha Pasaka, watambika nawema hali honhu ha hewo na Walawi kuli vilundo vyawo, kota vyoyalajize mndewa. 11 Nawajidumula singo ming'holo myana ja Pasaka, watambika nawamiza yila danda yowapegwe na Walawi, mhela Walawi awo lowawele wojiwambula ngozi migongolo jidumuligwe singo. 12 Hamba nawabagula nhambiko za kulakazwa leka waweze kuzigawa kwa kuwinza ivyazi lya hewo wawele ndo watambika, leka wamlavile Mkulu Nguluwi kota vyoyandichigwe kuli chitabu cha malajizo ga Musa. Nawadita hihyo du kwa jila mibuguma. 13 Nawajibanika jila migongolo ja Pasaka kuli chiluli kota vyoilajizwe na kuzihemsa zila nhambiko zelile kuli mibiga na visaye na viya na kuwagawila wanhu weng'ha himahima. 14 Hamba Walawi nawawika goya miwunde ja Pasaka kwa chiwalo cha hewo wawo na kwa chiwalo cha watambika, kwa vila wala watambika, wawele ndo walelwa wa Aluni, nawali wokola mijito ja kulavya nhambiko za kulakazwa hamwe na vihande vya mafuta mbaka nechilo. 15 Walingwimba, walelwa wa Asafu, nawali chila yumwe kuli mijito ja heye kota vyoyalajize mndewa Daudi na Asafu na Hemani na Yedutuni, mlaguzi wa mndewa. Wamizi kuli chila lwizi hawalechile mijito ja hewo kwa vila Walawi wayao nawali wowawichila goya chilyo cha Pasaka. 16 Lelo, mijito jeng'ha ja Mkulu Nguluwi najikoleka kuli zuwa lilyo, leka kudita mnvina ya Pasaka na kulavya nhambiko za kulakazwa mchanya mwa honhu ha kulavila nhambiko ha Mkulu Nguluwi, kota vyoyalajize mndewa Yosiya. 17 Mhela awo Waisilaeli weng'ha wawele hala nawadita mnvina ya Pasaka na mnvina ya mibumunda johajiwichigwe usaso, kwa mhela wa mazuwa saba. 18 Pasaka kota ayo hainawahika kuditigwa kuli Isilaeli yeng'ha kulawa kuli mhela wa mloli Samweli. Halawile mndewa yoneche wa Isilaeli yawele nakaidita Pasaka kota ayi iwele naiditigwa na mndewa Yosiya, hamwe na watambika na Walawi na wanhu weng'ha wa Yuda na wanhu wa Isilaeli na wenyeng'haye wa Yelusalemu. 19 Pasaka ayo naiditigwa kuli mwaka wa kumi na nane (18) wa ulongozi wa mndewa Yosiya.

20 Logakwete ago geng'ha goyaditile mndewa Yosiya kwa chiwalo cha ng'handa ya Nguluwi, Falao Neko, mndewa wa Misili, nakaluta kitowa ako Kalikemishi kuli lwanda lwa Eyufulate. Naye Yosiya nakaluta kitowa naye. 21 Ila Falao Neko nakamhilichila Yosiya usenga ulingulonga, "Hana kilewa kwachi hali heni na hegwe, gwa mndewa wa Yuda? Mhela awu silingitowa na hegwe ila ndangitowa na wang'honyo wa heni. Nguluwi nakandajiza ndite himahima, ahyo uleche kitwanza na Nguluwi, yawele ka hamwe na heni, wone haiwa ahyo, kokudumya." 22 Yosiya hakundile kumlechela. Nakalema kuhulichiza ulonzi woyalonjile Nguluwi kwa nzila ya Neko, ahyo nakegalula leka yaleche kuzeleka, hamba nakenjila kuli kitowa ngondo kuli ibalalika lya Megido.

23 Watoza misale nawamuhoma mndewa Yosiya, mndewa nakawalonjela vitumagwa wa heye, "Mmbuse! Nandumizwa ng'hatu." 24 Vitumagwa wa heye nawamlavya kuli mutuka wa falasi na nawamuwika kuli mutuka wunji na kumhilika mbaka Yelusalemu, naye nakabagama ako na kutiligwa kuli vilaga vya chiundewa. Wanhu weng'ha wa Yuda na wa Yelusalemu nawalombocheza kwa chiwalo cha kubagama kwa Yosiya.

25 Mloli Yelemiya nakandika lwimbo lwa kulombocheza kwa chiwalo cha kubagama kwa heye. Walingwimba weng'ha, walume na wadala wangumchema Yosiya kuli kulombocheza kwa hewo kulawa mhela wula. Mbuli ayo naiwa chihendo kuli Isilaeli nayo nayandichigwa kuli chitabu cha nzimbo za masinzo. 26 Mbuli zinji za ulongozi wa Yosiya na madito ga heye ganojile kota vyogandichigwe kuli malajizo ga Mkulu Nguluwi, 27 kulawa mwaluko mbaka kuduma, nagandichigwa kuli chitabu cha wandewa wa Isilaeli na wa Yuda.