1 Abiya nakabagama na kutiligwa kuli muji wa Daudi. Asa mwanage, nakalongoza honhu ha heye. Mhela wa ulongozi wa Asa, isi yeng'ha ya Yuda nayali na kikala goya kwa miyaka kumi.

2 Mndewa Asa nakadita ganojile na hachi hali Mkulu Nguluwi, Nguluwi wa heye. 3 Nakosa honhu ha kulavila nhambiko ha milungu ja chijenzi na honhu ha kufugamila milungu na kutula maganga ga kufugamilwa na kujibenanga jila mizengo ja jimalukolo ja Ashela. 4 Nakawalajiza wanhu wa Yuda kumpala Mkulu Nguluwi, Nguluwi wa wasekulu wa hewo na kibatilila malajizo na mizilo ja heye. 5 Nakosa kahi honhu heng'ha ha kufugamila milungu na honhu ha kufunyizila ubani kuli chila muji wa Yuda, ahyo undewa wa heye nawali na kikala goya hali ulongozi wa heye. 6 Nakazenga miji jiwele na ngome kuli Yuda, mhela awo isi nayali na kikala goya. Haduhu munhu yoneche yawele naketowa ngondo na heye kuli miyaka ajo, kwa vila Mkulu Nguluwi nayali yampele kikala goya.

7 Mndewa nakawalonjela wanhu wa Yuda, "Tujizenje miji aji na kujizungulusila ng'hanzi na milingo na lwizi jiwele na mhajilo. Isi ing'hali ya hetwe kwa vila natudita vyoyaganile Mkulu Nguluwi, Nguluwi wa hetwe, naye nakatupa kikala goya kuli banzi zeng'ha." Lelo, nawazenga na mbuli za hewo nazilutilila goya.

8 Mndewa Asa nayali na chilundo cha wamizi lachi zidatu (300,000) kulawa Yuda, wawele na ngawo ng'hulu na migoha na chilundo chinji cha wamizi lachi mbili na elufu makumi nane (280,000) kulawa Benjamini, wawele na ngawo ndodo na mipinde. Weng'ha nawali wamizi wazidahe ng'hatu kitowa ngondo.

9 Sela, Mkushi, nakaluta kuitowa isi ya Yuda yawele na wamizi milioni imwe (1,000,000) na mituka ja ngondo miya zidatu (300), nawaluta mbaka Malesha. 10 Asa nakaluta kitowa na heye. Ahyo, wamizi wa Sela na wamizi wa Asa nawewika goya kitowa ngondo kuli ibindi lya Sefata habehi na Malesha.

11 Hamba Asa nakamlilila Mkulu Nguluwi, Nguluwi wa heye, yolonga, "Gwa Mkulu Nguluwi, haduhu yawele kota hegwe, yawele na mong'ho wa kuwatanza walihela mong'ho kitowa na wawele na mong'ho. Ututanze, gwa Mkulu Nguluwi, Nguluwi wa hetwe, kwa vila twangitumbila kwa hegwe na kwa itagwa lya hegwe natuya kitowa na chilundo achi chikulu cha wamizi. Gwa Mkulu Nguluwi, hegwe ndo Nguluwi wa hetwe, uleche kukunda wanhu wakusumye."

12 Lelo, Mkulu Nguluwi nakawatowa Wakushi hali Asa na wamizi wa heye wa isi ya Yuda. Wakushi nawabilima. 13 Asa na wamizi wa heye nawawawinza mbaka Gelali, nawawakopola Wakushi wenji ng'hatu, kwa vila nawalemwela hali Mkulu Nguluwi hamwe na wamizi wa heye. Wamizi wa Yuda nawahola vinhu vinji lukami. 14 Nawawifya miji jeng'ha jiwele hafungo ha Gelali kwa vila wanhu wawele nawali kuli miji ajo nawakabusigwa na Mkulu Nguluwi. Wamizi nawahola vinhu vinji lukami kulawa kuli miji ajo kwa vila nakwali na lufufu lwinji ng'hatu. 15 Nawawatowa kahi wadimi wa migongolo na kuhola ming'holo minji na mhene na ngamiya. Hamba nawahiluka Yelusalemu.