1 Mndewa Solomoni nakagongomanya honhu ha kulavila nhambiko ha shaba hawele na ulefu wa mita tisa na ugazi wa mita tisa na wimo wake nawali mita zine na nusu. 2 Hamba nakagongomanya ibiga lya shaba lilinguchemigwa Bahali. Nalyali lya uvilingo liwele na ugazi wa mita zine na nusu kulawa nzingo imwe mbaka nzingo iyage na wimo wa mita mbili na lobo na mzunguluto wa mita kumi na zidatu na nusu. 3 Hasi ha ayo nzingo nakwali na misitali mili ja mibuguma, mibuguma kumi kuli chila sentimita makumi gane na zihano. Mibuguma ajo najigongomanyigwa mhela wuwula wa kuligongomanya ibiga. 4 Ibiga alyo nalyali liwichigwe mchanya mwa jimalukolo ja mibuguma kumi na mili, jidatu najilola ubanzi wa kasikazini na jidatu jinji najilola ubanzi wa kolizinjilaga isanya na jidatu kahi najilola ubanzi wa kusini na jidatu jiyage najilola ubanzi wa kolilawilaga isanya. Ibiga alyo naliwichigwa mchanya mwa mibuguma ajo honhu hawo ha kumbele. 5 Ugazi wa nzingo yake nawali ndo sentimita saba na nusu. Nzingo yake nainoligwa kota uluwa wa yunjiyunji. Ibiga alyo nalyali liweza kuwichigwa mazi lita elufu makumi sita (60,000). 6 Nakagongomanya kahi visaye kumi vya kuhovujila vinhu viwele navyali vitumika kuli nhambiko za kulakazwa. Visaye vihano nakaviwika kuli ubanzi wa kasikazini na vihano viyage nakaviwika kuli ubanzi wa kusini. Ibiga alyo nalyali litumika na watambika hela, kwa chiwalo cha kihovuga. 7 Nakagongomanya vinhu vya kuwichila chenje kumi vya zahabu kota vyoyalajizwe, nakaviwika kuli chituka cha ng'handa ya Nguluwi, vihano kuli ubanzi wa kusini na vihano viyage kuli ubanzi wa kasikazini. 8 Nakagongomanya visaga kumi na kuviwika kuli chituka cha ng'handa ya Nguluwi, vihano nakaviwika kuli ubanzi wa kusini na vihano viyage nakaviwika kuli ubanzi wa kasikazini. Kahi nakagongomanya visaye miya imwe vya zahabu kwa chiwalo cha kumizila. 9 Nakagongomanya lugagala lwa mgati lwa watambika na lugagala lunji lukulu lwa kunze na lwizi ja lugagala jiwele nakajigubika kwa shaba. 10 Lila ibiga nakaliwika kuli ubanzi wa kusini-kolilawilaga isanya mwa ng'handa.

11 Lelo Hilamu nakasinda mijito joyawele yomkolela mndewa Solomoni kuli ng'handa ya Nguluwi. Nakagongomanya mibiga na makoleo na visaye vya kumizila 12 na mizengo mili na mitaji mili jilingiwhana na visaye, navyali mchanya mwa mizengo na utandawala wili, kwa chiwalo cha kunoliga ajo mitaji mili 13 na makomamanga miya zine kwa chiwalo cha utandawala awo wili, nakajiwika kuli misitali mili ja makomamanga kwa chila utandawala leka kunoliga jila mitaji mili jilingiwhana na visaye, jiwele mchanya mwa mizengo. 14 Hihyo du, nakagongomanya mituka hamwe na visaye vyake 15 na lila ibiga likulu lilinguchemigwa Bahali na jila mibuguma kumi na mili hasi hake 16 na mibiga na makoleo na uma. Vinhu vyeng'ha vya ng'handa ya Mkulu Nguluwi viwele Hilamu nakamgongomanyila mndewa Solomoni, navyali vya shaba ilingupulika. 17 Vinhu avyo vyeng'ha mndewa nakavigongomanya kuli misanga ja ilongo lya kulumbila vinhu kuli ibindi lya Yolodani, honhu hawele hagati ha Sukoti na Seleda. 18 Vinhu avi vyeng'ha viwele mndewa Solomoni nakavigongomanya navyali vinji lukami kwa vila itunyo lya shaba haliwezile kuzeleka.

19 Solomoni nakagongomanya vinhu vyeng'ha viwele kuli ng'handa ya Nguluwi, viwele ndo honhu ha kulavila nhambiko ha zahabu na visaga vya zahabu kwa chiwalo cha mibumunda ja kuwika hali Nguluwi 20 na vinhu vya kuwichila vyenje vya zahabu inojile na chenje vya zahabu leka viwe vikwaka kumwando ha honhu helile ng'hatu, kota vyoilajizwe, 21 nakagongomanya kahi uluwa na vyenje na makoleo, vyeng'ha navyali vya zahabu inojile ng'hatu 22 na mikasi ja kudumulila tambi za mishumaa na visaye vya ubani na vifunyizi na bawaba kwa chiwalo cha lwizi ja zahabu kwa chiwalo cha ng'handa ya Mkulu Nguluwi, jiwele ndo lwizi lwa mgati lwa honhu helile ng'hatu na lwizi lwa chituka chikulu.