1 Hamba Solomoni nakalanda yolonga, "Mkulu Nguluwi nakulonga kota hegwe kochikala kuli ng'hungugu ng'hulu. 2 Ena, ndikomya nandikuzenjela ng'handa inojile ng'hatu, honhu ha hegwe ha kikala mazuwa gose."

3 Hamba mndewa Solomoni nakaligaluchila na kulitambichiza ikugusi lya wanhu wa Isilaeli wawele wemile hala, 4 nakalonga, "Yatogoligwe Mkulu Nguluwi, Nguluwi wa Isilaeli, yawele kwa moko wa heye nakeneza lila lyoyalagane na mhaza wa heni Daudi, yolonga, 5 ‘Kulawa zuwa lila londiwalavile wanhu wa heni Isilaeli kulawa kuli isi ya Misili, sihagule muji kuli nhanzi yoneche ya Isilaeli leka ng'handa ya heni izenjigwe amo leka itagwa lya heni liwe amo na simhagule munhu yoneche leka yawe chilongozi wa wanhu wa heni Isilaeli. 6 Ila lelo nandiuhagula muji wa Yelusalemu uwe muji uwele ndowa ndifugamilwa na nandimhagula Daudi yawalongoze wanhu wa heni Isilaeli.’

7 "Ahyo, mhaza wa heni Daudi, nakanuwila kuzenga ng'handa kwa chiwalo cha Mkulu Nguluwi, Nguluwi wa Isilaeli, 8 ila Mkulu Nguluwi nakamlonjela mhaza wa heni Daudi, ‘Nakudita goya kuwika mnhumbula majesa ga kuzenga ng'handa ya heni kwa chiwalo cha itagwa lya heni. 9 Ila, haiwele hegwe uwele konzenjela ng'handa, ila mwanago, yawele kolawa mlukuli lwa hegwe, heye ndo kozenga ng'handa kwa chiwalo cha itagwa lya heni.’

10 "Lelo, Mkulu Nguluwi nakeneza kulagana kwa heye koyalagane, kwa vila nandiwa mndewa honhu ha mhaza wa heni Daudi na sambi ndangikalisa kuli chigoda cha undewa cha Isilaeli, kota vila Mkulu Nguluwi vyoyalagane, nani nanzenga ng'handa ya Nguluwi kwa chiwalo cha itagwa lya Mkulu Nguluwi, Nguluwi wa Isilaeli. 11 Mzidi wa ago, nambika amo isanduku lya ilagano, liwele mgati mwa alyo mna vila vibawo vya maganga vya ilagano lya Mkulu Nguluwi, lyoyaliwichile na wanhu wa Isilaeli."

12 Hamba Solomoni nakema hali honhu ha kulavila nhambiko ha Mkulu Nguluwi na hali nhing'hano ya Waisilaeli weng'ha, nakenula moko ga heye. 13 Solomoni nayali yagongomanye honhu ha shaba ha kwima na kulonga na wanhu hagati ha lugagala. Ulefu na ugazi wake navyali mita mbili na lobo na wimo wake nawali mita imwe na lobo. Nakakwina hali honhu aho na kufugama hali nhing'hano ya Waisilaeli weng'ha, hamba nakenula moko ga heye kulutila kilanga. 14 Nakalonga, "Gwa Mkulu Nguluwi, Nguluwi wa Isilaeli, haduhu Nguluwi yunji kota hegwe, kuchanya kilanga ne hasi muisi! Hegwe ndo wa kukundigwa, ulingubatilila ilagano na kulajila igano lya kwimilila kwa vitumagwa wa hegwe walinguwinza nzila za hegwe kwa nhumbula za hewo zeng'ha. 15 Nakweneza kulagana kwa hegwe kwa chitumagwa wa hegwe Daudi, mhaza wa heni, kwa mlomo wa hegwe nakulagana na kwa moko wa hegwe nakweneza, kota vyoiwele lehano.

16 "Ahyo, gwa Mkulu Nguluwi, Nguluwi wa Isilaeli, ndangukulanda kahi mwenezele chitumagwa wa hegwe Daudi, mhaza wa heni, kulagana kwa hegwe koulagane loulonjile, ‘Mazuwa geng'ha kowa na mlelwa wa kikalisa kuli chigoda cha undewa cha Isilaeli, wone walelwa wa hegwe wowinza goya malajizo ga heni kota hegwe vyouditile hali heni.’ 17 Lelo, gwa Mkulu Nguluwi, Nguluwi wa Isilaeli, weneze ulonzi wa hegwe woulagane na chitumagwa wa hegwe Daudi, mhaza wa heni.

18 "Ila gwa Nguluwi, kwangukomya kochikala muisi na wanhu? Ulole, ukulu uwele kilanga hauweza kuhega kwa hegwe, yowa ndaze kuli ng'handa ayi izenjigwe? 19 Gwa Mkulu Nguluwi, Nguluwi wa heni, heni chitumagwa wa hegwe ndangukulanda uhulichize kulanda kwa heni lehano. 20 Uyamile ng'handa ayi nemisi na nechilo, honhu hawele nauhahagula leka uliwiche itagwa lya hegwe aho. Unyhulichize, heni chitumagwa wa hegwe hondikuya honhu aha kulanda. 21 Uhulichize kulanda kwa heni chitumagwa wa hegwe na kwa wanhu wa hegwe Waisilaeli howolanda kuno wahinduchile honhu aha. Uhulichize kulawa ako kilanga na louhulika, utulechele.

22 "Wone munhu kolonjelezwa kwa kumditila vibi myage na wone wanhu womhilika kumwando mwa honhu ha kulavila nhambiko hanze ha ng'handa ya Nguluwi na wone kolonga, ‘Ndangilaha, siditile nongwa. Wone ndangudeta, Nguluwi yanhowe,’ 23 lelo, uhulichize kulawa kilanga na uwaditile vitumagwa wa hegwe kota vyoulingona inoga. Utaguse hali vitumagwa wa hegwe, kuno umtagusa yula yawele na nongwa na kigala gala goyaditile mchanya mwake. Umuwikulile yula yawele yatanganiche kota kahela nongwa.

24 "Wone mhela wanhu wa hegwe Waisilaeli howolemwela hali wang'honyo wa hewo kwa chiwalo cha gehile gowaditile hali hegwe na wone wokugaluchila na kulikunda itagwa lya hegwe na kukudedeza kuli ng'handa ayi, 25 lelo, uhulichize kulawa ako kilanga na ugalechele gehile ga wanhu wa hegwe Waisilaeli na kuwahilusa kuli isi youwapele wasekulu wa hewo.

26 "Mhela ulanga houwa udinyigwe leka kuleche kuwa na nhonya kwa vila wanhu wa hegwe nawadita gehile hali hegwe na wone wolanda kulutila honhu aha kulikunda itagwa lya hegwe na kugaleka gehile ga hewo kwa vila nakuwagaza, dedede 27 uhulichize kulawa ako kilanga na ugalechele gehile ga wanhu wa hegwe Waisilaeli. Uwalanguse nzila inojile ya kikala na uwatowele nhonya mchanya mwa isi youwapele wanhu wa hegwe, iwele ndo uhalizi wa hewo.

28 "Wone kuwe na lufemba muisi ama utamwa ulinguchemigwa tauni ama lungwi ama nzije ama lung'hwawa ama wone wang'honyo wowazunguluta kuli muji wa hewo woneche wula ama utamwa woneche uwele woweza kuwafika, 29 dedede, uhulichize kulanda koneche kwa munhu yoneche ama wanhu wa hegwe Waisilaeli, wone chila munhu kogazela magazo ga heye na masinzo ga heye na wone kokulanda na kugolola moko ga heye kulutila kuli ng'handa ayi, 30 lelo uhulichize kulawa kilanga, haluga ha hegwe. Uwalechele na umhe chila munhu kwa kiwhana na madito ga heye, kwa vila kwanguizela nhumbula ya heye na kwa vila ndo hegwe uliyeka ulinguzizela nhumbula za wanhu weng'ha, 31 leka wakudumbe mhela weng'ha howowa wochikala kuli isi youwapele wasekulu wa hetwe.

32 "Hihyo du, kwa mbuli ya mjenzi yawele hawele yumwe wa wanhu wa hegwe Waisilaeli, ila nakoya kulawa isi ya kutali kwa chiwalo cha itagwa lya hegwe likulu na moko wa hegwe uwele na mong'ho, hoyokuya kulanda kulutila kuli ng'handa ayi, 33 lelo, uhulichize kulawa ako kilanga, haluga ha hegwe na udite kota vyoulingona inoga na udite lyoneche liwele mjenzi ayo kangukulanda, leka wanhu wa isi zeng'ha walizele itagwa lya hegwe na wakudumbe kota vyowalingudita wanhu wa hegwe Waisilaeli leka nawo wavizele kota ng'handa ayi yondiizenjile naichemigwa kwa itagwa lya hegwe.

34 "Mhela wanhu wa hegwe howoluta kitowa ngondo na wang'honyo wa hewo koneche kula kouwahilika na mhela howokulanda kulutila kuli muji awu uwele nauhaguligwa na kuli ng'handa iwele nandiizenga kwa chiwalo cha itagwa lya hegwe, 35 lelo, uhulichize kulanda kwa hewo kulawa ako kilanga, uwadite hewo wawasumye wang'honyo wa hewo.

36 "Wone wanhu wa hegwe wodita gehile hali hegwe, kwa vila haduhu munhu yoneche yawele halingudita gehile na hegwe kozudizwa na hewo na kuwawika kwa wang'honyo wa hewo wawele wowahilika kuli isi ya chijenzi, kutali ama habehi 37 na wone mhela lowowa ako kuli isi ya chijenzi wogalula nhumbula za hewo na kulonga gehile ga hewo na kukulilila kuli isi ya wala wawele nawawasumya na kulonga, ‘Natudita gehile na kwajilila na natudita wihe,’ 38 na wone wokugaluchila kwa nhumbula za hewo zeng'ha kuli isi ya wang'honyo wa hewo wawele nawawahola na wone wokulanda kulutila kuli isi youwapele wasekulu wa hewo na kulutila kuli muji wouuhagule na ng'handa yondiizenjile kwa chiwalo cha itagwa lya hegwe, 39 lelo, kulawa ako kilanga haluga ha hegwe, uhulichize kulanda kwa hewo na kudedeza kwa hewo na kuilewela hachi ya hewo. Uwalechele wanhu wa hegwe wawele nawadita gehile hali hegwe.

40 "Lelo, Nguluwi wa heni, utulole na ubochele kulanda kwa hetwe honhu aha.

41 Lelo ndangukulanda winuche, gwa Mkulu Nguluwi, ulute hali honhu ha hegwe ha kwesela,

hegwe, hamwe na isanduku lya ilagano lya mong'ho wa hegwe.

Gwa Mkulu Nguluwi, watambika wa hegwe wagubikwe na ulohozi,

na watanganiche wa hegwe wasangalale kwa chiwalo cha kunoga kwa hegwe.

42 Gwa Mkulu Nguluwi, uleche kumleka yabakalizwe mafuta wa hegwe.

Ukumbuchile igano lya hegwe lya kwimilila, kwa chitumagwa wa hegwe Daudi."