1 Kuli kuduma kwa miyaka makumi meli, miyaka jiwele mndewa Solomoni nakazenga ng'handa ya Mkulu Nguluwi na ng'handa ya heye yuye, 2 mndewa Solomoni nakazenga kahi miji joyapegwe na Hilamu, hamba nakawalonjela Waisilaeli wekale kuli miji ajo. 3 Hamba mndewa Solomoni nakaluta kuli muji wa Hamati-soba na kuuhola. 4 Nakauzenga kahi muji wa Tadimoli uwele ako kuchiwala na miji jeng'ha ja ng'hano jiwele ako Hamati. 5 Mndewa Solomoni nakauzenga kahi muji wa Beti-holoni ya Kuchanya na Beti-holoni ya Hasi, miji jiwele na ngome na ng'hanzi na lwizi na mhajilo. 6 Mndewa Solomoni kahi nakauzenga muji wa Baalati na vijiji vyake vyeng'ha viwele na ng'hano na vijiji kwa chiwalo cha mituka ja heye na kwa chiwalo cha falasi wa heye weng'ha. Nakazenga choneche choyaganile kuzenga kuli muji wa Yelusalemu na Lebanoni na kuli honhu heng'ha halingulongozwa na heye. 7 Wanhu weng'ha wasigale hali Waamoli na Wahiti na Wapelisi na Wahivi na Wayebusi, wawele kahi weng'ha hawawele Waisilaeli, 8 hamwe na walelwa wa hewo wasigale kuli isi, wawele Waisilaeli hawawakopole, Solomoni nakawadita wakole mijito kwa lupichi, kulawa mhela wula. 9 Ila hali Waisilaeli, Solomoni hamditile munhu ne yumwe yawe mpogozi kuli mijito ja heye, ila nawali wamizi na vilongozi wa wamizi wa heye na vilongozi wa mituka ja heye ja kukwejigwa na wakwina falasi wa heye. 10 Nakwali kahi na wang'hangala wa mndewa Solomoni miya mbili na makumi gahano, wawele nawali wowalolela wanhu. 11 Mndewa Solomoni nakamlavya mchewake, mhinza wa Falao, kulawa kuli muji wa Daudi na kumhilika kuli ng'handa yoyamzenjele, kwa vila nakalonga, "Mchewangu hochikala kuli ng'handa ya chiundewa ya Daudi, mndewa wa Isilaeli, kwa vila honhu heng'ha hawele na isanduku lya ilagano lya Mkulu Nguluwi, ndo helile."

12 Mndewa Solomoni nakamlavila Nguluwi nhambiko za kulakazwa hali hala honhu ha kulavila nhambiko, hoyamzenjele Mkulu Nguluwi, kuli chituka cha ng'handa ya Nguluwi. 13 Nakalavya nhambiko azo kota vyoiganigwe kuli malajizo ga Musa, kwa chiwalo cha mazuwa ga Kwesela na kwa chiwalo cha mnvina za kulawa kwa nyelezi na mnvina zinji zidatu za chila mwaka, ziwele ndo mnvina ya mibumunda johajiwichigwe usaso na mnvina ya mbena na mnvina ya vibumuli. 14 Nakalajiza kwa kiwhana na malajizo ga Daudi, mhaza wa heye, nakawawichila watambika kiwalila kwa mazuwa ga kukola mijito na Walawi kulongoza kutogola na kuwatanza watambika kwa kiwhana na mijito ja chila zuwa. Nakadita hihyo du kwa wamizi wa lwizi kuli chila lwizi. 15 Hawagalechile malajizo ga mndewa goyawalajize watambika na Walawi kuli mbuli yoneche na kuwala ng'hano.

16 Lelo mijito jeng'ha ja mndewa Solomoni najikoleka kwaluchila zuwa liwele msisi wa ng'handa ya Mkulu Nguluwi vyouwichigwe mbaka kusinda kuzenga ng'handa ayo. Ahyo, ng'handa ya Mkulu Nguluwi nayali isindile kuzenjigwa. 17 Hamba mndewa Solomoni nakaluta kuli muji wa Esioni-gebeli na kuli muji wa Eloti uwele hafungo ha bahali, kuli isi ya Edomu. 18 Mndewa Hilamu nakamhilichila mitumbwi jilingulongozwa na wang'hangala wa heye na wanhu walingudaha kwendesa meli. Wanhu awo hamwe na vitumagwa wa mndewa Solomoni nawenula majendo mbahali kuluta kuli isi ya Ofili, kulawa ako nawoya na zahabu kilo elufu kumi na zihano (15,000) na nawamha mndewa Solomoni.