1 Mndewa Solomoni nakalajiza kuzenjigwa kwa ng'handa ya Mkulu Nguluwi kwa chiwalo cha kufugamila na kuzenga ng'handa ya heye ya chiundewa. 2 Ahyo, nakawawika wanhu elufu makumi saba (70,000) wawe wokola mijito ja kupika mhomolo na wanhu elufu makumi nane (80,000), wawe na mijito ja kuhongola maganga kuli vidunda na wanhu wanji elufu zidatu na miya sita (3,600), wawe vilongozi wa wakola mijito ajo.

3 Hamba, Solomoni nakalajiza usenga kwa Hilamu, mndewa wa Tilo, nakamlonjela, "Ungalile mizinga ja migodi ja mielezi kota vyoumditile mhaza wa heni Daudi, mhela loumhilichile mizinga ja migodi ja mielezi kwa chiwalo cha kuzenjela ng'handa ya chiundewa. 4 Lelo, ndahabehi kwaluka kuzenga ng'handa ya kumfugamila Mkulu Nguluwi, Nguluwi wa heni. Ng'handa ayo ndoiwika iwe ya chiuyeng'ha, nayo yowa ndo honhu ha kufunyizila ubani wa kunhunyilila goya hali heye na honhu ha kuwichila mibumunda jelile hali heye mazuwa gose na nhambiko za kulakazwa mitondo na matinazo na kahi kuli mazuwa ga Kwesela na kuli mnvina za kulawa kwa nyelezi na mnvina zinji za Mkulu Nguluwi, Nguluwi wa hetwe, kota vyoyawalajize wanhu wa Isilaeli mazuwa gose. 5 Ng'handa yondilingugana kuizenga yowa ng'hulu ng'hatu, kwa vila Nguluwi wa hetwe ndo mkulu kusinda milungu jeng'ha. 6 Haduhu yawele koweza kumzenjela ng'handa, kwa vila ukulu wa ulanga hauweza kuhega kikala heye. Lelo, heni nda whaani mbaka ndimzenjele ng'handa? Ila ndoweza kumzenjela honhu ha kumlavila nhambiko za kulakazwa hela. 7 Lelo ngalile munhu yawele na uwanzi wa kugongomanya vinhu kwa zahabu na sendi na shaba na chuma na kugongomanya nguwo za lanji ya zambalau na lanji ndung'hu na lanji ya buluu na yadahile kunoliga. Heye kokola mijito ajo hamwe na wawanzi wawele hamwe na heni kuli isi ya Yuda na Yelusalemu, wawele nawahaguligwa na mhaza wa heni, Daudi. 8 Kahi ungalile mizinga ja migodi ja mielezi na mibeloshi na misandali kulawa Lebanoni, kwa vila ndanguvizela kota vitumagwa wa hegwe wana uwanzi wa kutula mbawo ako Lebanoni. Vitumagwa wa heni wokola mijito hamwe na vitumagwa wa hegwe, 9 leka watule mbawo nyinji, kwa vila ng'handa yondilingugana kuzenga yowa ng'hulu lukami na yowa inojile ng'hatu. 10 Kwa chiwalo cha vitumagwa wa hegwe walingugongomanya vinhu vya mbawo, wotula mbawo, ndolavya lita milioni zine na lachi zine (4,400,000) za ngano ibalaswe na lita milioni zine na lachi zine (4,400,000) za shayili na lita lachi zine (400,000) za divai na lita lachi zine (400,000) za mafuta ga zeituni."

11 Naye Hilamu, mndewa wa Tilo, nakamwidichila Solomoni kwa baluwa yolonga, "Kwa vila Mkulu Nguluwi kanguwagana wanhu wa heye, nakakudita uwe mndewa wa hewo. 12 Yatogoligwe Mkulu Nguluwi, Nguluwi wa Isilaeli, yalumbile ulanga na isi! Nakamha mndewa Daudi mwana yawele na luhala na nyhala na kuvizela, yawele komzenjela ng'handa Mkulu Nguluwi na ng'handa ya chiundewa, kwa chiwalo cha heye. 13 Lelo ndomlajiza Hulamu-abi, munhu yawele ndo muwanzi ng'hatu na kana kuvizela, 14 yawele mayake nakalawa kuli nhanzi ya Dani na mhaza wa heye nayali yochikala Tilo. Heye kana uwanzi ng'hatu wa kugongomanya vinhu na kukola mijito jeng'ha ja kugongomanya vinhu vya zahabu na vya sendi na vya shaba na vya chuma na vya maganga na vya mbawo na kutawa na kuwika lanji ya zambalau na lanji ya buluu na lanji ndung'hu na kugongomanya nguwo za kitani inojile. Kana uwanzi kahi wa kunoliga na kuchola chila chinhu chiwele kolonjelwa yadite. Heye kokola mijito hamwe na walingugongomanya vinhu wa hegwe na walingugongomanya vinhu wa mkulu wa heni Daudi, mhaza wa hegwe. 15 Lelo mkulu wa heni, dedede, uvihiliche kwa vitumagwa wa hegwe vinhu avyo vyoulonjile, viwele ndo ngano na shayili na mafuta ga zeituni na divai, 16 natwe tojiwika goya mizinga joulingujigana kulawa ako Lebanoni. Tojiwoha hamwe na kujiwika mmazi leka jiwe jikwelela mbaka Yopa, hamba koweza kujihola na kujihilika Yelusalemu."

17 Mndewa Solomoni nakalajiza wajenzi weng'ha wawele kuli isi ya Isilaeli wawazigwe. Kuwazigwa aku nakwali ndo kota kula koyaditile Daudi, mhaza wa heye. Nakwali na wanhu lachi imwe na elufu makumi gahano na zidatu na miya sita (153,600). 18 Hali hewo, wanhu elufu makumi saba (70,000) nawali na mijito ja kupapa mhomolo na wanhu elufu makumi nane (80,000), nawali na mijito ja kuhongola maganga kuli vidunda na wanhu elufu zidatu na miya sita (3,600), nawali vilongozi wa wakola mijito ajo, leka wawadite wanhu awo wakole mijito.