1 Yosiya nayali na miyaka nane loyaluche kulongoza. Nakalongoza ako Yelusalemu kwa miyaka makumi gadatu na umwe (31). 2 Yosiya nakadita ganojile hali Mkulu Nguluwi na kuwinza nzila zeng'ha za Daudi, sekulu wa heye, hagaluchile kumoso ne kudilo.

3 Kuli mwaka wa nane wa ulongozi wa heye Yosiya, nakaluka kumfugamila Nguluwi kota Daudi, sekulu wa heye. Miyaka jine hamba nakamula kuhabomola honhu ha kujifugamila milungu kuli Yuda na Yelusalemu, kahi nakajibenanga mizengo ja jimalukolo ja Ashela na jimalukolo ja milungu. 4 Wanhu wa heye nawabomola honhu ha kulavila nhambiko ha Mabaali hali heye na kuhabomola honhu ha kulavila nhambiko ha kufunyizila ubani. Kahi nawajibalasa mizengo ja Ashela na jinji ja kuhongola na ja kuponda, nakajidita jiwe nhimbwisi, hamba nhimbwisi ayo nakaibohola mchanya mwa vilaga vya wala wawele aho hamwande nawali wojilavila nhambiko. 5 Kahi, nakajilakaza mizeje ja watambika wa milungu ajo hali honhu hawo ha kulavila nhambiko, ahyo, nakazeliza Yuda na Yelusalemu. 6 Nakadita hihyo du kuli miji ja isi za Manase na Efulaimu na Simeoni mbaka kuli isi ya Nafutali na kuli mahame gawele hafungo ha miji ajo. 7 Nakahabomola honhu ha kulavila nhambiko na kujibenanga mizengo ja jimalukolo ja Ashela na jimalukolo ja kuhongola mbaka najiwa nhimbwisi. Hihyo du, nakahabomola honhu ha kulavila nhambiko ha kufunyizila ubani kuli isi yeng'ha ya Isilaeli. Hamba nakahiluka Yelusalemu.

8 Kuli mwaka wa kumi na nane wa ulongozi wa Yosiya, leka kuvyelize isi na ng'handa ya Nguluwi, nakawalajiza wanhu wadatu, wawele ndo Shafani, mwana wa Asaliya na Maaseya, chilongozi wa muji na Yowa, mwana wa Yowahasi, yalingwandika kukumbuchila, walute kuizenga kahi ng'handa ya Mkulu Nguluwi, Nguluwi wa heye. 9 Nawaluta kwa Hilikiya, mtambika mkulu na kumha sendi ziwele nazigaligwa kuli ng'handa ya Nguluwi ziwele Walawi wawele wokwamila lwizi nawali wazikungajize kulawa kwa wanhu wa Manase na Efulaimu na Waisilaeli weng'ha wasigale na kulawa Yuda na Benjamini na kwa muji wa Yelusalemu. 10 Hamba nawawapa sendi azo wanhu walingulolela mijito ja ng'handa ya Mkulu Nguluwi. Wanhu awo nawawapa sendi azo walingukola mijito ja kuzenga kahi ng'handa ya Nguluwi leka iwe kota vyoiwele hamwande. 11 Nawawapa kahi sendi walinguhongola vinhu vya mbawo na walinguzenga ng'handa kwa chiwalo cha kugula maganga gahongoligwe na mbawo za kulumbiza na boliti kwa chiwalo cha ng'handa ziwele wandewa wa Yuda nawali wazilechile ziwe mahame. 12 Wanhu awo nawakola mijito ajo kwa kukundigwa. Walawi wawele nawawichigwa hali hewo leka kuwalongoza, nawali Yahati na Obadiya wa lukolo lwa Melali na Sekaliya na Meshulamu wa lukolo lwa Kohati. Walawi awo weng'ha nawali woweza lukami kutowa vinhu vya muzichi, 13 nawawalongoza wanhu weng'ha wawele nawali wokola mijito. Walawi wamwenga nawali walingwandika na vilongozi na wamizi wa lwizi.

14 Mhela lowawele wolavya sendi zigaligwe kuli ng'handa ya Mkulu Nguluwi, mtambika Hilikiya nakachifika chitabu cha malajizo ga Mkulu Nguluwi, chiwele nachilavigwa kwa kukolela Musa. 15 Hilikiya nakamlonjela Shafani yalingwandika, "Nandichona chitabu cha malajizo mgati mwa ng'handa ya Mkulu Nguluwi." Hamba Hilikiya nakamha Shafani chitabu chila. 16 Shafani nakachihilika chitabu kwa mndewa na kumlonjela, "Vitumagwa wa hegwe wangudita chila chinhu kota vyowalonjelwe. 17 Nawazilavya zila sendi ziwele nazali mgati mwa ng'handa ya Mkulu Nguluwi na nawawapa wala walingukola mijito." 18 Hamba yalingwandika Shafani nakamlonjela mndewa, "Mtambika Hilikiya nakamha heni chitabu." Naye Shafani nakachisoma chitabu acho hali mndewa. 19 Mndewa loyahuliche wula ulonzi wa malajizo, nakadadula nguwo za heye zoyavalile. 20 Mndewa nakawalajiza Hilikiya na Ahikamu, mwana wa Shafani na Abudoni, mwana wa Mika na Shafani yalingwandika na Asaya, chitumagwa wa mndewa, yolonga, 21 "Mlute mkamuuze Mkulu Nguluwi kwa chiwalo cha heni na kwa chiwalo cha weng'ha wawele nawasigala kuli Isilaeli na Yuda, kuwala ulonzi wandichigwe kuli chitabu chiwele nachoneka. Mkulu Nguluwi kangutuzudila ng'hatu kwa vila wasekulu wa hetwe hawebatilile ulonzi wa Mkulu Nguluwi ne kudita kwa kiwhana na gala geng'ha gandichigwe kuli chitabu achi."

22 Ahyo, Hilikiya hamwe na wala wanji walajizwe na mndewa, nawaluta kulongasa na mloli mdala, yalinguchemigwa Huluda, yawele nayali mche wa Shalumu, mwana wa Tokati, mwana wa Hasala, yalingulolela chihengo cha mivalo. Huluda nayali yochikala Yelusalemu kuli chijiji cha keli. 23 Lelo yula mloli mdala nakawalonjela kota Mkulu Nguluwi, Nguluwi wa Isilaeli, kangulonga hino, "Mumlonjele mndewa wa Yuda yawele nakawalajiza hemwe kwa heni, 24 kota heni Mkulu Nguluwi ndokugala kudumya hali honhu hano na kwa wanhu wake na upanjilo weng'ha uwele nawandichigwa kuli chitabu acho chisomigwe hali mndewa wa Yuda. 25 Kwa vila nawandeka na kujifunyhizila ubani milungu na kunzudiza kwa jimalukolo jeng'ha jiwele najigongomanyigwa kwa mijito ja moko ga hewo, ahyo ng'halazi ya heni yokwaka mchanya mwa honhu aha, haiweza kuditigwa isindamale. 26 Ila mumlonjele mndewa wa Yuda kota, 27 kwa vila nhumbula ya heye nayali ya kuhulichiza na kunyenyetela hali heni loyauhuliche ulonzi wa heni kuwala honhu aha na wanhu wake na kwa vila nayali yonyenyetela hali heni na nakadadula mivalo ja heye na kulila hali heni, nandimhulika. Heni Mkulu Nguluwi nandonga. 28 Ahyo, ndomuwika hamwe na wasekulu wa heye, naye kotiligwa kwa kikala goya. Meho ga heye hagokona kudumya kweng'ha kuwele ndokugala hali honhu aha na wenyeng'haye walingikala mgati mwake." Ahyo nawahilika mbuli ayo kwa mndewa Yosiya.

29 Hamba mndewa Yosiya nakawachema na kuwakungajiza hamwe hali heye wasekulu weng'ha wa Yuda na wa Yelusalemu. 30 Naye mndewa nakaluta kuli ng'handa ya Mkulu Nguluwi hamwe na wanhu weng'ha wa Yuda na wa Yelusalemu na watambika na Walawi na wanhu wanji weng'ha wakulu na wadodo. Nakasoma ulonzi weng'ha wa chila chitabu cha ilagano chiwele nachoneka kuli ng'handa ya Mkulu Nguluwi, kuno wanhu weng'ha wohulika. 31 Hamba mndewa nakema habehi na izengo na kudita kahi ilagano hali Mkulu Nguluwi, liwele ndo kumuwinza Mkulu Nguluwi na kibatilila mizilo ja heye na malajizo na kwamula kwa heye kwa nhumbula ya heye yeng'ha na kwa muhe wa heye weng'ha na kuuhulichiza ulonzi wa ilagano wandichigwe kuli chitabu acho. 32 Mndewa nakamlajiza chila yumwe kuli Yelusalemu na Benjamini kuwika kulagana kwa hewo kuwala ilagano alyo. Wanhu wa Yelusalemu nawadita ahyo kwa kibatilila ilagano lya Mkulu Nguluwi, Nguluwi wa wasekulu wa hewo. 33 Hamba Yosiya nakosa jimalukolo jeng'ha jiwele ndo izudizo jiwele najali kwa Waisilaeli, kulawa kuli isi yeng'ha ya Isilaeli na kuwalajiza wanhu weng'ha wa Isilaeli wamfugamile Mkulu Nguluwi, Nguluwi wa wasekulu wa hewo. Kwa mhela weng'ha awo Yosiya loyawele mndewa, Waisilaeli hawalechile kumuwinza Mkulu Nguluwi, Nguluwi wa wasekulu wa hewo.