1 Hamba, wamizi wa Moabu na wa Amoni, hamwe na wamwenga kulawa Meuni, nawaluta kitowa na Yehoshafati. 2 Wanhu wamwenga nawaluta kumlonjela mndewa Yehoshafati, "Chilundo chikulu cha wamizi changuya kitowa na hegwe kulawa Edomu, iwele kumwambu mwa bahali ya mwino. Sambi nawafika kuli muji wa Hasasoni-tamali, uwele ndo Eni-gedi." 3 Yehoshafati nakadumba, nakamlanda Mkulu Nguluwi yamlongoze. Nakawawikulila wanhu weng'ha wa isi ya Yuda wesele kulya. 4 Wanhu kulawa miji jeng'ha ja Yuda, nawaluta Yelusalemu. Nawating'hana leka kumlanda Mkulu Nguluwi yawatanze. 5 Hamba Yehoshafati nakema hagati ha nhing'hano ya wanhu wa Yuda na wa Yelusalemu kumwando mwa lugagala lunyale lwa ng'handa ya Mkulu Nguluwi, 6 nakalonga, "Gwa Mkulu Nguluwi, Nguluwi wa wasekulu wa hetwe, hegwe ndo Nguluwi uwele kilanga! Hegwe kwangulongoza undewa weng'ha muisi na kuna ludali na mong'ho, haduhu munhu yawele koweza kitwanza na hegwe. 7 Ndo hegwe, gwa Nguluwi wa hetwe, uwawinjile wenyeng'haye wa isi yino mhela wanhu wa hegwe Waisilaeli lowenjile kuli isi ayi, nakuwapa walelwa wa Abulahamu goloko wa hegwe, leka iwe ya hewo mazuwa gose. 8 Nawekala amo na kukuzenjela ng'handa kwa lutogo lwa itagwa lya hegwe, wolonga, 9 ‘Hotufichigwa na magazo goneche, wone liwe ipanga ama ngondo ama matamwa ama lufemba, tokuya na kwima kumwando mwa ng'handa ayi iwele naichemigwa kwa itagwa lya hegwe na kukulanda utanzi, nagwe kohulika na kutulohola.’

10 "Lelo, wanhu wano wa kulawa Amoni na Moabu na chidunda cha Seili, wawele huwakundize Waisilaeli wazitowe isi za hewo lowalawile Misili, nawakola hafungo na kuleka kuwadumya, 11 ulole vila vyowalingutuditila, wanguya kutuwinga kuli isi youtupele leka iwe uhalizi wa hetwe. 12 Gwa Nguluwi wa hetwe! Uwagaze, kwa vila twahela mong'ho wa kitowa na chilundo achi cha wamizi chilinguya kwa hetwe. Hatuvizelele cha kudita, ila twangitumbila utanzi kulawa kwa hegwe."

13 Wanhu weng'ha wa Yuda, wawele ndo walume na wadala na wana, nawali wemile hali Mkulu Nguluwi. 14 Muhe wa Mkulu Nguluwi naumuyila yumwe wa Walawi yawele hala kuli nhing'hano, yawele nayali yochemigwa Yahasieli, mwana wa Sekaliya, mwana wa Benaya, mwana wa Yeieli, mwana wa Mataniya, kulawa kuli lukolo lwa Asafu. 15 Yahasieli nakalonga, "Mhulichize hemwe wanhu wa Yuda na mweng'ha mlingikala Yelusalemu, nagwe mndewa Yehoshafati. Mkulu Nguluwi kanguwalonjela hemwe hino, ‘Mleche kudumba ne kuwa na lunhwinhwi kuwala chilundo achi chikulu cha wamizi. Ngondo ayi haiwele ya hemwe, ila ndo ya Nguluwi. 16 Mitondo mlute kuwating'haniza mhela howowa woluta kuli ibindi lya Sisi. Mowafika kuli kuduma kwa ibindi, kolilawilaga isanya mwa kuchiwala cha Yelueli. 17 Hamlinguganigwa kitowa ngondo ayi. Mikale chila munhu kuli honhu hake miwiche goya hela, hamba mbeteze leka muwone ulohozi wa Mkulu Nguluwi, uwele kowapa hemwe wanhu wa Yuda na Yelusalemu. Mleche kudumba ne kuwa na lunhwinhwi. Mitondo mlute kitowa nawo, Mkulu Nguluwi kowa hamwe na hemwe.’ "

18 Aho mndewa Yehoshafati nakafugama, wanhu weng'ha wa Yuda na walingikala Yelusalemu nawo nawenamiza na kumfugamila Mkulu Nguluwi. 19 Walawi wa lukolo lwa Kohati na lwa Kola nawema na kumtogola Mkulu Nguluwi, Nguluwi wa Isilaeli kwa lizi likulu ng'hatu.

20 Hamitondo nawalilimka, nawaluta kuli chiwala cha Tekowa. Lowawele wogana kwaluka majendo, Yehoshafati nakema na kulonga, "Mnyhulichize, hemwe wanhu wa Yuda na mlingikala Yelusalemu! Mitumbile kwa Mkulu Nguluwi, Nguluwi wa hemwe, namwe mowa nzinzili. Muwe na makundo kwa waloli wa heye, namwe mosumya." 21 Mndewa Yehoshafati loyasindile kulongasa na wanhu, nakawahagula walingwimba wamwenga, nakawalajiza walongole kumwando kwa wamizi, kuno wokwimba na kumtogola Nguluwi, kwa vila heye ndo yelile na wa kububuwaza,

"Mumtogole Mkulu Nguluwi,

Kwa vila igano lya heye lya kwimilila lyangikala mazuwa gose."

22 Mhela lowaluche kwimba na kutogola, Mkulu Nguluwi nakawatigula nyhala wamizi wa Amoni na wa Moabu na wa chidunda cha Seili walutile kuitowa isi ya Yuda. Wamizi awo nawasumigwa. 23 Wanhu wa Amoni na Moabu nawawatowa wenyeng'haye wa chidunda cha Seili, nawawakopola na kuwadumya ng'hatu. Lowawasumile wenyeng'haye wa chidunda cha Seili, nawaluka kikopola, nawedumya. 24 Wamizi wa Yuda nalowafichile kuli ilingo lya wamizi ako kuchiwala, nawalola ubanzi wa wang'honyo, nawajona mitufi ja wamizi jenele chila honhu. Haduhu munhu yoneche yasulupuche.

25 Yehoshafati na wamizi wa heye nawaluta kuhola migongolo na vinhu viwele navilechigwa na wala wabagame, nawajifika migongolo na nguwo na vinhu vya sendi nyinji, viwele navyali vinji kusinda vila vyowawezile kuvihola. Nawakungajiza vinhu avyo kwa mhela wa mazuwa gadatu, kwa vila navyali vinji lukami. 26 Zuwa lya kane, nawekungajiza kuli Ibindi lya Belaka* na kumtogola Mkulu Nguluwi kwa geng'ha goyawaditile. Acho ndo chiwalo cha ibindi alyo kuchemigwa ibindi la Belaka kulawa mhela wula. 27 Hamba wanhu weng'ha wa Yuda na Yelusalemu, kuno wolongozwa na Yehoshafati, nawahiluka Yelusalemu kuno wosangalala kwa vila Mkulu Nguluwi nakawadita wasangalale kwa kuwasumya wang'honyo wa hewo. 28 Nawenjila Yelusalemu na kuluta kuli ng'handa ya Mkulu Nguluwi wawele wotowa ving'weleng'wele na igombogombo na kupemba talumbeta. 29 Wandewa weng'ha nawadumba vyowahuliche gala goyaditile Mkulu Nguluwi kwa kuwasumya wang'honyo wa Isilaeli. 30 Lelo undewa wa Yehoshafati nawali na kikala goya, kwa vila Nguluwi wa heye nayali yampele kikala goya banzi zeng'ha.

31 Ahyo Yehoshafati nakailongoza isi ya Yuda. Nayali na miyaka makumi gadatu na jihano (35) loyaluche kulongoza. Nakalongoza ako Yelusalemu kwa miyaka makumi meli na jihano (25). Mayake nayali yochemigwa Asuba, mhinza wa Shilihi. 32 Nakadita mbuli zigoloche hali Mkulu Nguluwi kota vyoyaditile Asa, mhaza wa heye ne kubelenhuka. 33 Ila honhu ha kufugamila milungu hahosigwe. Wanhu nawali wang'hali kwamula kumgaluchila Nguluwi wa wasekulu wa hewo kwa nhumbula za hewo. 34 Mbuli zinji za ulongozi wa Yehoshafati, kulawa mwaluko wa ulongozi wa heye mbaka kuduma, nazandichigwa kuli chitabu cha kukumbuchila kwa Yehu, mwana wa Hanani, ziwele nazandichigwa kuli chitabu cha Wandewa wa Isilaeli. 35 Hamba Yehoshafati, mndewa wa Yuda nakelumba na Ahasiya, mndewa wa Isilaeli, yaditile mbuli zihile lukami. 36 Nawelumba kugongomanya meli nyinji za kuluta Talishishi. Meli azo nazigongomanyigwa ako Esioni-gebeli. 37 Ahyo, Elieseli, mwana wa Dodavahu, kulawa muji wa Malesha, nakalavya uloli ulingumuwala Yehoshafati, yolonga, "Kwa vila kwa hamwe na Ahasiya, Mkulu Nguluwi kozibena meli zeng'ha zomgongomanye." Ahyo zila meli nazibeneka, haziwezile kuluta Talishishi.