1 Lehoboamu loyafichile Yelusalemu, nakawakungajiza wamizi wazidahe lachi imwe na elufu makumi nane (180,000) kulawa kuli nhanzi ya Yuda na ya Benjamini, leka wetowe ngondo na Isilaeli na kuuhilula undewa kwa heye yuye Lehoboamu, mwana wa Solomoni. 2 Ila ulonzi wa Mkulu Nguluwi naumuyila mloli Shemaya na kulonga, 3 "Mlonjele Lehoboamu, mwana wa Solomoni, mndewa wa Yuda na Waisilaeli weng'ha wawele ako Yuda na Benjamini, 4 kota heni Mkulu Nguluwi ndangulonga hino, ‘Mleche kuluta kitowa na wang'holozenu, wanhu wa Isilaeli. Mhiluche chila munhu na kaye kwa heye, kwa vila ago galawile ndo vyonganile heni.’ " Lelo, nawawinza ulonzi wa Mkulu Nguluwi, nawahiluka kaye kota Mkulu Nguluwi vyoyalajize, hawalutile kitowa na Yeloboamu.

5 Lehoboamu nakekala Yelusalemu nakazenga miji jiwele na ngome kuli isi ya Yuda. 6 Miji ajo ndo Betelehemu na Etamu na Tekowa 7 na Beti-suli na Soko na Adulamu 8 na Gati na Malesha na Sifu 9 na Adolaimu na Lakishi na Aseka 10 na Sola na Aiyaloni na Hebuloni. Aji ndo miji jiwele na ngome ako Yuda na Benjamini. 11 Nakemiza nzinzili ngome azo na mgati mwake nakawika vilongozi wa wamizi na ng'hano za chilyo na mafuta ga mzeituni na divai. 12 Nakawika ngawo na migoha kuli chila muji na kujidita miji ajo jiwe nzinzili lukami. Ahyo Yuda na Benjamini nazali hali ulongozi wa heye.

13 Watambika na Walawi weng'ha kulawa honhu heng'ha ha isi ya Isilaeli nawali ubanzi wa Lehoboamu. 14 Walawi nawaleka honhu hawo ha kudila migongolo ja hewo na lufufu lwa hewo, nawaluta Yuda na Yelusalemu kwa vila Yeloboamu na wanage nawawalemeza hewo kumkolela mijito Mkulu Nguluwi, kota watambika wa Mkulu Nguluwi. 15 Yeloboamu nakehagulila heye yuye watambika kwa chiwalo cha honhu ha kufugamila jimalukolo ja mhene na jimalukolo ja milogota joyajigongomanyile. 16 Wala walawile kuli chila nhanzi ya Isilaeli wawele nawali wompala Mkulu Nguluwi, Nguluwi wa Isilaeli kwa nhumbula za hewo zeng'ha, nawawawinza Walawi ako Yelusalemu leka kumlavila nhambiko Mkulu Nguluwi, Nguluwi wa wasekulu wa hewo. 17 Nawauwika nzinzili ulongozi wa undewa wa Yuda na kilumba na Lehoboamu, mwana wa Solomoni kwa miyaka jidatu, wowinza nzila za mndewa Daudi na mndewa Solomoni.

18 Lehoboamu nakamhesa Mahalati, yawele nayali mhinza wa Yelemoti, mwana wa Daudi. Mayake Mahalati nayali yochemigwa Abihaili, mhinza wa Eliyabu, mwana wa Yese. 19 Mahalati nakampondela Lehoboamu wana walume wadatu, wawele ndo Yeushi na Shemaliya na Sahamu. 20 Hamba nakamhesa Maaka, mhinza wa Abusalomu, naye nakampondela Lehoboamu wana walume, wawele ndo Abiya na Atayi na Sisa na Shelomiti. 21 Lehoboamu nakamgana lukami Maaka, mhinza wa Abusalomu, kusinda wache wake na waha wake. Heye Lehoboamu nayali na wache kumi na nane (18) na waha makumi sita (60) na wana walume makumi meli na nane (28) na wahinza makumi sita (60). 22 Lehoboamu nakamhagula Abiya, mwana wa Maaka, yawe chilongozi wa wana wa mndewa hali wang'holoze, leka yamdite yawe mndewa. 23 Lehoboamu nayali yodita mbuli za heye kwa luhala, nakawasambalula wanage wamwe kuli honhu heng'ha ha isi yeng'ha ya Yuda na Benjamini, hamwe na miji jeng'ha jiwele na ngome. Nakawapa vilyo vinji na kuwahesela wache wenji.