1 Hamba wanhu weng'ha wa Yuda nawamhola Usiya yawele na miyaka kumi na sita na kumdita yawe mndewa honhu ha Amasiya, mhaza wa heye. 2 Mndewa Amasiya loyabagame, Usiya nakauhola kahi muji wa Eloti na kuuhilula kwa Yuda na kuuzenga kahi muji awo. 3 Usiya nakaluka kulongoza loyawele na miyaka kumi na sita, nakalongoza ako Yelusalemu kwa miyaka makumi gahano na mili (52). Mayake nayali yochemigwa Yekoliya, kulawa Yelusalemu. 4 Usiya nakadita ganojile hali Mkulu Nguluwi, kota vyoyaditile Amasiya, mhaza wa heye. 5 Nakamkolela mijito Mkulu Nguluwi kuli mhela wa ukomu wa Sekaliya, yamlanguse kumdumba Nguluwi. Mhela weng'ha loyawele yompala Nguluwi, Nguluwi nakadita mbuli za heye zilutilile goya.

6 Usiya naketowa na Wafilisti na kubomola ng'hanzi za muji wa Gati na Yabune na Ashidodi. Hamba nakazenga kahi miji habehi na Ashidodi na honhu hanji ha Wafilisti. 7 Nguluwi nakamtanza kuwasumya Wafilisti na Wameuni na Waalabu wawele nawali wochikala Guli-baali. 8 Waamoni nawamgalila Usiya kodi, ahyo lutogo lwa heye nalwenela mbaka Misili, kwa vila nayali na mong'ho lukami.

9 Usiya kahi nakazenga milingo ja kwamila ako Yelusalemu kuli Lwizi lwa Hafungo na kuli Lwizi lwa Kibindi na hali honhu hawele ng'hanzi zanguting'hana na kujimiza nzinzili milingo ajo. 10 Nakazenga kahi milingo kuchiwala na kubawa mideho minji, kwa vila nayali na migongolo minji kuli honhu hawele muwegawega na hali ibalalika. Nayali na wanhu walingukola mijito kuli migunda ja heye na kuli migunda ja heye ja mizabibu ako kuli vidunda na kuli misanga jiwele na mboto, kwa vila nakagana kulima.

11 Mzidi wa ago, Usiya nayali na wamizi wawele nawali goya kuluta kitowa ngondo kwa vilundo kwa kuwinza hisabu ya hewo kota vyowagawanulwe na Yeieli, yalingwandika na chilongozi yalinguchemigwa Maaseya, kwa malajizo ga Hananiya, yumwe wa vilongozi wa mndewa. 12 Hisabu yeng'ha ya vilongozi wa wamizi, nayali elufu mbili na miya sita (2,600). 13 Hali ulongozi wa hewo, nakwali na wamizi lachi zidatu na elufu saba na miya zihano (307,500), wawele goya kitowa ngondo, wamizi wawele na mong'ho kwa chiwalo cha kumtanza mndewa kwa wang'honyo wa heye. 14 Usiya nakawapa wamizi wa heye ngawo na migoha na kofia za chuma na vizibao vya chuma na upinde na maganga kwa chiwalo cha mhembeyo. 15 Ako Yelusalemu wawanzi wa heye nawamgongomanyila vinhu vya kutozela misale na maganga makulu na kuwika kuli milingo na nzingo za kwamilila. Lutogo lwa heye nalwenela chila honhu, kwa vila nayali yatanzigwe na nayali na mong'ho lukami.

16 Usiya loyawele na mong'ho lukami, kidaya kwa heye nakumwambuza kugwa. Zuwa limwe Usiya nakalema kumhulichiza Mkulu Nguluwi, Nguluwi wa heye, kwa kwinjila kuli ng'handa ya Nguluwi na kufunyiza ubani kuli honhu hakulavila nhambiko za kulakazwa. 17 Mtambika Asaliya, hamwe na watambika wanji wa Mkulu Nguluwi makumi nane (80), nawamuwinza mndewa mla mgati, hanga yahawezile kuwagaza. 18 Nawamlonjela, "Hailingukundigwa kumfunyizila Mkulu Nguluwi ubani. Ajo ndo mijito ja watambika wa lulelo lwa Aluni, wawele nawahaguligwa kwa mijito ajo ja kufunyiza ubani. Uche honhu hano helile, kwa vila kwahela kukundigwa nagwe hutogoligwa na Mkulu Nguluwi."

19 Usiya, yawele nayali yemile hali honhu ha kulavila nhambiko, yawele na chifunyizi mmoko mwake yawele goya kufunyiza ubani kwa Mkulu Nguluwi, nakazudila ng'hatu loyahuliche makanyo ga mtambika Asaliya. Baho du utamwa wa ngozi naumfika kuli chihanga cha heye. 20 Asaliya, mtambika mkulu, hamwe na wala watambika wanji weng'ha lowamlolile nawamona kota nayali na utamwa wa ngozi kuli chihanga cha heye. Nawadita himahima kumlavya mgati. Ena, mbaka heye yuye nayali yogana kuka, kwa vila Mkulu Nguluwi nayali yamgazile.

21 Mndewa Usiya nayali na utamwa wa ngozi mbaka loyabagame. Nayali yabaguligwe na kuwichigwa kuli ng'handa ibaguligwe, kwa vila nayali haganigwe kahi kwinjila kuli ng'handa ya Mkulu Nguluwi. Yotamu, mwanage, nayali yoilolela ng'handa ya mndewa na kuwalongoza wanhu wa isi ayo.

22 Madito ganji ga ulongozi wa Usiya, kulawa mwaluko mbaka kuduma, nagandichigwa na mloli Isaya, mwana wa Amosi. 23 Usiya nakabagama na kutiligwa kuli mgunda wa kutilila wa wandewa habehi na vilaga vya wandewa. Kwa vila Usiya nayali na utamwa wa ngozi, ahyo hatiligwe kuli vilaga vya chiundewa kwa vila wanhu nawalonga, "Nayali na utamwa wa ngozi." Naye Yotamu, mwanage, nakalongoza honhu ha heye.