1 Amasiya nayali na miyaka makumi meli na jihano (25) loyaluche kulongoza. Nakalongoza ako Yelusalemu kwa mhela wa miyaka makumi meli na tisa (29). Mayake nayali yochemigwa Yehoadani, kulawa Yelusalemu. 2 Nakadita ganojile hali Mkulu Nguluwi, ila haiwele kwa nhumbula ya heye yeng'ha. 3 Undewa wa heye lowimile nzinzili hali ulongozi wa heye, nakawakopola wala wang'hangala wawele nawamkopola mndewa, yawele ndo mhaza wa heye. 4 Ila hawawakopole wana wa hewo, kota vyoyandichigwe kuli chitabu cha Malajizo ga Musa, Mkulu Nguluwi vyoyalajize, "Wahaza hawokopoligwa kwa chiwalo cha gehile ga wana wa hewo na wana hawokopoligwa kwa chiwalo cha gehile ga wahaza wa hewo. Chila munhu yakopoligwe kwa chiwalo cha gehile ga heye yuye."

5 Mndewa Amasiya nakawachema wanhu wa Yuda hamwe, nakawawika hali ulongozi wa wakulu wa wamizi wa maelufu na wakulu wa wamizi wa mamiya kwa kuwinza ng'holo za hewo kuli Yuda yeng'ha na Benjamini. Hamba nakawawaza wala wawele na miyaka makumi meli na mzidi, nakona kota nakwali na walume lachi zidatu (300,000) wanhu wawele wazidahe kitowa ngondo, wawele nawali woweza kutumiya igoha na ngawo. 6 Nakawawika kahi wamizi wa kitowa ngondo lachi imwe (100,000) kulawa Isilaeli, kwa kuwapa sendi migwala kilo elufu zidatu na miya zine (3,400). 7 Ila munhu wa Nguluwi, mloli nakamuyila na kumlonjela, "Gwa mndewa, uleche kuluta kuli ngondo hamwe na awa wamizi wa Isilaeli, kwa vila Mkulu Nguluwi hawele hamwe na wanhu wa Efulaimu ne yoneche yunji hali wanhu Waisilaeli. 8 Hanga koluta kuli ngondo na kitowa kwa kikangaza ng'hatu, Nguluwi kokudita ubilime hali wang'honyo, kwa vila Nguluwi kana ludali lwa kumha munhu kusumya ama kusumigwa."

9 Amasiya nakamuuza yula munhu wa Nguluwi, "Yowa ndaze kwa jila migwala ja sendi kilo elufu zidatu na miya zine (3,400) jiwele nandijilavya kwa chiwalo cha wamizi wa Isilaeli?" Yula mloli nakamwidichila, "Mkulu Nguluwi koweza kukupa mzidi wa ajo." 10 Ahyo Amasiya nakawalonjela wamizi wawele nawali woyile kulawa Efulaimu, wahiluche haluga ha hewo. Wala wamizi kulawa Efulaimu nawawazudila lukami wanhu wa Yuda, nawahiluka haluga ha hewo kuno wawele na ng'halazi lukami. 11 Lelo, Amasiya nakekangaza nhumbula na kuchilongoza chilundo cha wamizi wa heye mbaka kuli ibindi lya Mwino, loyawele ako naketowa na kuwakopola Waedomu elufu kumi (10,000). 12 Wamizi wa Yuda kahi nawawahola wanhu wa Seili elufu kumi (10,000) wawele wakomu, nawawakwiniza mchanya mwa italawe na kuwakundujiza kulutila hasi ha italawe mbaka weng'ha nawabagama. 13 Mhela wuwo, wala wamizi wawele Amasiya nayali yawahiluse haluga ha hewo, wala wawele nayali yawalemeze kihanza kuli kitowa ngondo, nawajivaba miji ja Yuda kwaluchila Samaliya mbaka Beti-holoni. Wamizi awo nawawakopola wanhu elufu zidatu (3,000) na kuhola vinhu vinji lukami.

14 Amasiya loyahiluche kulawa kuwakopola Waedomu, nakegala kahi milungu ja wanhu wa Seili. Nakajimiza na kujidita jiwe milungu ja heye yuye, nakajifugamila na kujilavila nhambiko za kulakazwa. 15 Mbuli azi nazimzudiza ng'hatu Mkulu Nguluwi, ahyo nakamlajiza mloli kwa Amasiya, yawele nakalonga, "Lekachoni kwangujitumbila milungu ja wanhu, jiwele najilemwela kuwalohola wanhu wake kulawa mmoko mwa hegwe?"

16 Mhela mloli loyawele yang'hali yolutulila kulonga, mndewa Amasiya nakamlonjela yula mloli, "Ndaze, natukuhagula leka uwe munhu ulingumlonjela mbuli mndewa? Kwangugana kukopoligwa?" Ahyo, mloli nakanyamalila kwa mhela uchefu, hamba nakalonga, "Ndanguvizela kota Nguluwi nakanuwila kukudumya kwa vila nakudita mbuli ayi na nakulema kuuhulichiza ulonzi wa heni."

17 Hamba Amasiya, mndewa wa Yuda, nakalongasa na wanhu wa heye. Nakalajiza usenga kwa Yehoashi, mwana wa Yehoahasi, mwana wa Yehu, mndewa wa Isilaeli, yolonga, "Uye titowe." 18 Ila Yehoashi, mndewa wa Isilaeli, nakamwidichila Amasiya, mndewa wa Yuda, yolonga, "Zuwa limwe izuchila lya mbigili lya Lebanoni nalilajiza usenga kwa igodi lya mwelezi liwele ako Lebanoni, ‘Mlavye mhinza wa hegwe yaholeche na msongolo wa heni.’ Hamba igongolo lya kisolo lya Lebanoni nalyuya na kulibiga lila izuchila lya mbigili. 19 Nakulonga mnhumbula mwa hegwe kota nakuwasumya Waedomu, nagwe lelo kwangidaya na kiwona, ila wikale haluga ha hegwe. Lekachoni kwangugana kigalila magazo gawele gokudumya gwegwe baho na wanhu wa Yuda?"

20 Ila Amasiya hahulichize, kwa vila Nguluwi nakadita ahyo leka yawawiche mmoko mwa Yehoashi, kwa vila nayali yojitumbila milungu ja Edomu. 21 Ahyo Yehoashi, mndewa wa Isilaeli, nakaluta kitowa na Amasiya, mndewa wa Yuda ako Beti-shemeshi kuli isi ya Yuda. 22 Wanhu wa Yuda nawalemwela hali wanhu wa Isilaeli na chila munhu nakabilimila kaye kwa heye. 23 Hamba Yehoashi, mndewa wa Isilaeli, nakamibata Amasiya, mndewa wa Yuda, mwana wa Yoashi, mwana wa Ahasiya ako Beti-shemeshi, nakamhilika mbaka Yelusalemu na kubomola lukanzi lwa muji wa Yelusalemu, kwaluchila kuli Lwizi lwa Efulaimu mbaka Lwizi lwa Hafungo, utali wa kota mita miya imwe na makumi nane (180). 24 Nakahola zahabu zeng'ha na sendi na vinhu vyeng'ha viwele navyali mgati mwa ng'handa ya Nguluwi, viwele navyali hali ulongozi wa Obedi-edomu, hamwe na ng'hano za ng'handa ya chiundewa na wapogozi wa ngondo, hamba nakahiluka Samaliya.

25 Amasiya, mwana wa Yoashi, mndewa wa Yuda, nakekala kwa miyaka kumi na jihano kulawa loyabagame Yehoashi, mwana wa Yehoahasi, mndewa wa Isilaeli. 26 Madito ganji ga ulongozi wa Amasiya, kulawa mwaluko mbaka kuduma, nagandichigwa kuli chitabu cha kukumbuchila kwa wandewa wa Yuda na wa Isilaeli. 27 Kwaluchila mhela wula Amasiya loyalechile kumuwinza Mkulu Nguluwi, nawali wochijesa kumditila mbuli yihile Amasiya ako Yelusalemu, Amasiya nakabilimila Lakishi. Nawawalajiza wanhu wamuwinze ako Lakishi na kumkopola kuko. 28 Mtufi wa heye naugaligwa uwele mchanya mwa falasi na kutiligwa kuli vilaga vya chiundewa kuli muji wa Daudi.