1 Lozikolile mbuli azo zeng'ha zoyaditile mndewa Hesekiya kwa kukundigwa ng'hatu, Senakelibu, mndewa wa Ashulu, nakaivaba isi ya Yuda. Nakaluta na kuwika kambi za heye habehi na miji jiwele na ngome yochijesa kota kojihola leka jiwe ja heye. 2 Mndewa Hesekiya loyawene kota mndewa Senakelibu nakoya na nakanuwila kuitowa Yelusalemu, 3 nakalongasa na vilongozi wa heye na wazidahe wa heye kuwala kuzidinya nzasa za mazi ziwele hanze ha muji, nawo nawamtanza. 4 Nawawakungajiza wanhu wenji hamwe na kuzidinya nzasa zeng'ha hamwe na kazanda kalingukola hagati ha honhu aho, wolonga, "Lekachoni wandewa wa Ashulu woye na kugafika mazi menji?" 5 Mndewa Hesekiya nakekangaza kukola mijito kwa kuzenga kahi honhu heng'ha ha lukanzi habomoche na kuzenga milingo mchanya mwake. Nakazenga lukanzi lunji lwa keli hanze ha lula lukanzi lwa mwaluko na kuhawika nzinzili honhu halinguchemigwa Milo kuli muji wa Daudi. Nakagongomanya vinhu vinji vya kitowela ngondo. 6 Nakawawika wanhu weng'ha wa kuli muji awo hali ulongozi wa wakulu wa wamizi wa ngondo, nakawalajiza wekungajize kuli luga lwa kuli lwizi lwa muji. Aho nakawakangaza nhumbula yolonga, 7 "Muwe nzinzili na mzidahe. Mleche kudumba ne kuwa na lunhwinhwi hali mndewa wa Ashulu na wamizi wa heye, kwa vila yawele hamwe na hetwe ndo mkulu kusinda yawele hamwe na heye Senakelibu. 8 Heye kana mong'ho wa chiwunhu hela, ila hetwe twanaye Mkulu Nguluwi, Nguluwi wa hetwe, yawele kotutanza na kitowa kwa chiwalo cha hetwe." Ulonzi awu wa mndewa Hesekiya nauwakangaza nhumbula ng'hatu wanhu awo. 9 Hamba, Senakelibu, mndewa wa Ashulu na wamizi wa heye weng'ha lowawele nawauzunguluta muji wa Lakishi, nakawalajiza vilongozi wa heye kuluta Yelusalemu kuhilika usenga kwa Hesekiya, mndewa wa Yuda na kwa wanhu weng'ha wa Yuda wawele nawali ako Yelusalemu, yolonga, 10 "Heni ndo Senakelibu, mndewa mkulu wa Ashulu! Ndaze, mwangitumbila choni mbaka mwangulutilila kikala Yelusalemu, muji uwele nauzungulutwa na wamizi? 11 Mndewa Hesekiya hoyowalonjela, ‘Mkulu Nguluwi, Nguluwi wa hetwe kotulohola kulawa kuli moko ga mndewa wa Ashulu,’ kanguwajiliza hemwe na kowaleka mbagame kwa lufemba na ng'halu. 12 Ndaze, hawele yuye Hesekiya yawifile honhu ha kufugamila na honhu ha kulavila nhambiko, ila honhu hamwe hela, yowalonjela wanhu weng'ha wa Yuda wawele ako Yelusalemu yolonga, ‘Mwanguganigwa kufugamila hali honhu hamwe ha kulavila nhambiko na kulakaza nhambiko za hemwe mchanya mwake?’ 13 Ndaze, hamgazelele gala geng'ha gawele heni na wasekulu wa heni natugadita kwa wanhu wa isi zinji? Ndaze, milungu ja isi azo najiweza kuzilohola isi za hewo kulawa mmoko mwa heni? 14 Ndo mlungu wachi hali milungu ja isi azo ziwele wasekulu wa heni nawazidumya nakaweza kuwalohola wanhu wake kulawa mmoko mwa heni, mbaka namwe muwe mchitumbila kota Nguluwi wa hemwe koweza kuwalohola kulawa mmoko mwa heni? 15 Lelo mleche kukunda kuhadigwa na Hesekiya ne kwajilizwa. Mleche kumkunda heye, kwa vila haduhu mlungu wa wanhu wa isi yoneche ama mndewa wa isi yoneche yawezile kuwalohola wanhu wake kulawa mmoko mwa mndewa wa Ashulu. Nguluwi wa hemwe howeza kuwalohola hemwe kulawa mmoko mwa heni!"

16 Vilongozi wa Senakelibu, mndewa wa Ashulu, nawalonga ulonzi wihile kwa Mkulu Nguluwi na kwa Hesekiya, chitumagwa wa Nguluwi. 17 Mndewa wa Ashulu naye nakandika baluwa ilingumliga Mkulu Nguluwi, Nguluwi wa Isilaeli, yolonga, "Kota vila milungu ja isi zinji vyojilemwele kuwalohola wanhu wawo kulawa mmoko mwangu, hihyo du, Nguluwi wa Hesekiya howeza kuwalohola wanhu wake kulawa mmoko mwangu." 18 Hamba, vilongozi awo nawawalonjela kwa lizi likulu kwa Chiebulaniya, wanhu wa Yelusalemu wawele mchanya mwa lukanzi leka kuwakabusa na kuwadita wawe na lunhwinhwi leka waweze kuuhola muji. 19 Nawalonga vibi kuwala Nguluwi wa Yelusalemu kota vila vyowalonjile kuwala milungu ja isi zinji, jiwele najigongomanyigwa kwa moko ga wanhu.

20 Mndewa Hesekiya na mloli Isaya, mwana wa Amosi, nawamlanda Nguluwi na kumlilila leka yawatanze kwa chiwalo cha mbuli azo. 21 Mkulu Nguluwi nakamlajiza mhilisi yawele nakawadumya wamizi weng'ha na vilongozi wa wamizi na wakulu kuli kambi ya Ashulu. Ahyo, mndewa wa Ashulu nakahiluka kuli isi ya heye yawele yamemile soni. Loyalutile kuli ng'handa ya mlungu wa heye, wanage wamwenga nawamkopola kwa ipanga. 22 Kwa nzila ayi, Mkulu Nguluwi nakawalohola Hesekiya na wenyeng'haye wa Yelusalemu kulawa mmoko mwa Senakelibu, mndewa wa Ashulu na kulawa mmoko mwa wang'honyo wa hewo weng'ha. Mkulu Nguluwi nakawadita wekale goya na wanhu wa chila ubanzi wa isi ya hewo. 23 Wanhu wenji nawahilika nhambiko Yelusalemu kwa chiwalo cha Mkulu Nguluwi na ndolendole za sendi nyinji kwa chiwalo cha Hesekiya, mndewa wa Yuda. Ahyo kulawila mhela awo Hesekiya nakatogoligwa ng'hatu na wanhu wa isi zeng'ha.

24 Kuli mazuwa ago, Hesekiya nakatamika ng'hatu mbaka nayali habehi kubagama. Nakamlanda Mkulu Nguluwi, yawele nakamwidichila na kumha heye ulajilo kota komdita yapone utamwa wa heye. 25 Ila Hesekiya halonjile malumbo kwa Mkulu Nguluwi kwa ago geng'ha goyaditilwe na Nguluwi, kwa vila nhumbula ya heye nayali imemile kidaya. Mbuli ayo nayambuza kugazika kwa wanhu wa Yuda na wa Yelusalemu. 26 Lelo, Hesekiya nakalonga gehile ga heye kwa chiwalo cha kidaya kwa nhumbula ya heye kota vyowaditile wanhu wa Yelusalemu, ahyo kuzudila kwa Mkulu Nguluwi hakuwafichile kuli mhela wa ukomu wa Hesekiya.

27 Mndewa Hesekiya nayali na lufufu lwinji na kuhulichizwa lukami. Nakegongomanyila ng'hano kwa chiwalo cha sendi za heye na zahabu na kwa chiwalo cha maganga ga sendi nyinji na vifunyizi na ngawo na vinhu vyeng'ha vya sendi nyinji. 28 Nakazenga kahi ng'hano za kuwichila mbena za nyhule na divai na mafuta. Kahi nakazenga mibani kwa chiwalo cha misenga na ming'holo na mhene. 29 Hihyo du nakazenga miji na nayali na mhene nyinji na ming'holo minji hamwe na misenga minji kwa vila Mkulu Nguluwi nayali yampele lufufu lwinji ng'hatu. 30 Mndewa Hesekiya ndo yazidinyile nzasa za mazi ga Gihoni, nakagabawila nyhinda leka mazi gakole hasi mbaka ubanzi wa kolizinjilaga isanya kuli muji wa Daudi. Mbuli za Hesekiya nazilutilila goya kwa chila chinhu choyachiditile. 31 Mhela uwele wasenga wa wakulu wa Babuloni lowalajizwe kwa heye kumuuza kuwala ulajilo wa vinduzanduza uwele naulawila kuli isi ayo, Nguluwi nakamleka yamule yuye, leka kumjeza na kuvizela geng'ha gawele mnhumbula mwa heye.

32 Madito ganji ga mndewa Hesekiya na igano lya heye lya kwimilila, navyandichigwa kuli uloli wa mloli Isaya, mwana wa Amosi, kuli chitabu cha kukumbuchila kwa wandewa wa Yuda na wa Isilaeli. 33 Hesekiya nakabagama na kutiligwa kuli honhu ha kuchanya ha vilaga vya walelwa wa Daudi. Wanhu weng'ha wa Yuda na wenyeng'haye wa Yelusalemu nawalutogola lukuli lwa heye mhela wa kubagama kwa heye. Manase, mwanage, nakalongoza honhu ha heye.