1 Hamba nawaliwika isanduku lya ilagano mgati mwa ihema liwele naliwichigwa goya na Daudi. Hamba nawalavya nhambiko za kulakazwa na nhambiko za kikala goya hali Nguluwi. 2 Daudi loyasindile kulavya nhambiko azo, nakawatambichiza wanhu kwa itagwa lya Mkulu Nguluwi, 3 nakawagawila Waisilaeli weng'ha walume kwa wadala, chila yumwe nakapegwa ibumunda na chihande cha iwunde na chilundo cha zabibu zikalile.

4 Kwa ago geng'ha, Daudi nakawahagula wamwe wa Walawi leka wawe vitumagwa hali Isanduku lya ilagano lya Mkulu Nguluwi, kwa chiwalo cha kumlanda na kulonga malumbo na kumtogola Mkulu Nguluwi, Nguluwi wa Isilaeli. 5 Nakamhagula Asafu leka yawe chilongozi wa hewo, yotanzigwa na Sekaliya. Yeieli na Shemilamoti na Yehieli na Matitiya na Eliabu na Benaya na Obedi-edomu na Yehieli nakawahagula wawe watowa ving'hweleng'hwele na igombogombo. Asafu nayali yotowa matowazi 6 na hewo watambika, wawele ndo Benaya na Yahalieli, nawahaguligwa wawe walingupemba mhalamhanda chila mhela hali isanduku lya Ilagano lya Nguluwi. 7 Lelo kuli zuwa lila, chinhu cha mwaluko chiwele Daudi nakaluka kudita ndo kumha Asafu na wayage lwimbo alu lwa lutogo kwa Mkulu Nguluwi.

8 Mlonje malumbo kwa Mkulu Nguluwi,

mliwikule itagwa lya heye,

muwazelese wanhu wa isi zeng'ha madito ga heye goyaditile.

9 Mumwimbile heye, mumwimbile heye lutogo,

msimile madito ga heye ga kububuwaza.

10 Msangalale kwa chiwalo cha itagwa lya heye lyelile,

nhumbula za walingumpala Mkulu Nguluwi zisangalale.

11 Mumpale Mkulu Nguluwi na mong'ho wa heye,

mumhejelele Mkulu Nguluwi mazuwa gose.

12,13 Hemwe walelwa wa Yakobo, vitumagwa wa heye,

hemwe wana wa Isilaeli, wahaguligwe wa heye,

mkumbuchile madito ga heye ga kububuwaza goyaditile,

vinduzanduza vya heye na nhaguso zoyazilavile.

14 Heye ndo Mkulu Nguluwi, Nguluwi wa hetwe,

nhaguso za heye nazenela muisi yeng'ha.

15 Mlikumbuchile ilagano lya heye mazuwa gose,

kangwenezaga kulagana kwa heye kwa lulelo elufu.

16 Kangubatililaga ilagano lyoyaliditile na Abulahamu,

na ilagano lyoyamlahile Isaka.

17 Nakalitawiza kwa Yakobo kota ndo ilajizo,

kwa Isilaeli liwe ndo ilagano lya mazuwa gose.

18 Nakalonga, "Ndokupa isi ya Kanaani,

leka iwe uhalizi wa hegwe."

19 Waisilaeli lowawele wachefu,

wachefu na wajenzi kuli isi ya Kanaani,

20 nawalubaluba kulawa honhu hamwe mbaka hayage,

isi imwe mbaka yinji.

21 Nguluwi hakundile munhu yoneche yawabunze,

kwa chiwalo cha hewo nakawang'hanuchila wandewa,

22 yolonga, "Mleche kuwadoliza wabakalizwe mafuta wa heni,

ne kuwalumiza waloli wa heni."

23 Mumwimbile Mkulu Nguluwi, hemwe wanhu wa isi yeng'ha.

Chila zuwa mdamle madito ga heye ga ulohozi.

24 Muuwikule ukulu wa heye hali wanhu wa isi,

muwalonjele wanhu weng'ha madito ga heye ga vinduzanduza.

25 Kwa vila Mkulu Nguluwi ndo mkulu, yalinguganigwa kutogoligwa kusinda weng'ha,

heye ndo wa kudumbigwa kusinda milungu jeng'ha.

26 Kwa vila milungu jeng'ha ja wanhu wa isi ndo jimalukolo hela,

ila Mkulu Nguluwi nakalumba ulanga.

27 Ukulu na lutogo vya hali heye,

mong'ho na usangalalo vya hali honhu ha heye helile.

28 Mumhe Mkulu Nguluwi lutogo, hemwe ivyazi lya isi yeng'ha,

ena, mumtogole kwa ukulu na mong'ho wa heye.

29 Mumfugamile Mkulu Nguluwi kwa ukulu wa itagwa lya heye,

migale nhambiko na mlute hali heye,

mumfugamile Mkulu Nguluwi kuli welile ng'hatu wa heye.

30 Ukakame hali heye, hegwe isi yeng'ha!

Isi yeng'ha nayima nzinzili, haitigasika.

31 Usangalale hegwe ulanga, utowe luchenze hegwe isi,

wanhu weng'ha muisi walonje, "Mkulu Nguluwi, kangulongoza."

32 Bahali ibogome na vilumbigwe vyeng'ha viwele mumo vitowe iyowe lya kusangalala.

Migunda na vyeng'ha viwele amo visangalale.

33 Hamba migodi ja kumhulo,

jokwimba kwa kusangalala hali Mkulu Nguluwi,

kwa vila kanguya kuitagusa isi yeng'ha.

34 Mlonje malumbo kwa Mkulu Nguluwi, kwa vila ka yanojile,

igano lya heye lya kwimilila lyangikala mazuwa gose.

35 Mumlilile Nguluwi,

"Gwa Nguluwi mlohozi wa hetwe, utulohole.

Utukungajize kahi na utulohole kulawa kuli wanhu wa isi,

leka tulonje malumbo kwa chiwalo cha itagwa lya hegwe lyelile,

na kusangalala kwa chiwalo cha lutogo lwa hegwe."

36 Yatogoligwe Mkulu Nguluwi, Nguluwi wa Isilaeli,

kulawa mazuwa gose mbaka mazuwa gose.

Hamba Daudi loyasindile kulonga ahyo, wanhu weng'ha nawedichila, "Ena. Tumtogole Mkulu Nguluwi."

37 Ahyo, mndewa Daudi nakawawika Asafu na Walawi wanji hali isanduku lya ilagano lya Mkulu Nguluwi, leka wakole mijito ja isanduku chila mhela kwa kiwhana na mijito jilinguganigwa kuli chila zuwa. 38 Nakawawika kahi Obedi-edomu, mwana wa Yedutuni, hamwe na wayage makumi sita na nane (68) leka wakole mijito hamwe na hewo. Obedi-edomu na Hosa nawali wamizi wa lwizi.

39 Mndewa Daudi nakawawika mtambika Sadoki hamwe na watambika wayage leka wawe vitumagwa wa ihema lya Mkulu Nguluwi liwele nalyali hali honhu ha kufugamila ako Gibeoni, 40 leka kumlavila Mkulu Nguluwi nhambiko za kulakazwa hali honhu ha kulavila nhambiko za kulakazwa chila mhela, kuli mhela wa mitondo na matinazo, kwa kiwhana na malajizo ga Mkulu Nguluwi gawele nakawapa Waisilaeli. 41 Wanhu wanji wawele nawakola mijito hamwe na hewo nawali Hemani na Yedutuni na wala weng'ha wawele nawahaguligwa na kuchemigwa matagwa gawo, leka kulonga malumbo kwa Mkulu Nguluwi kwa vila igano lya heye lya kwimilila ndo lya mazuwa gose. 42 Hemani na Yedutuni nawali woganigwa kupemba mhalamhanda na kutowa matowazi na kutumiya vinhu vinji vya muzichi kwa chiwalo cha nzimbo za kumtogola Nguluwi. Wana wa Yedutuni nawali wamizi wa lwizi.

43 Hamba wanhu weng'ha nawoka, chila yumwe nakahiluka haluga ha heye, naye Daudi nakaluta haluga ha heye leka kulitambichiza ivyazi lyake.