1 Lelo Wafilisti nawetowa na Waisilaeli, nawo Waisilaeli nawabilima na wenji wa hewo nawakopoligwa kuli chidunda cha Gilibowa. 2 Wafilisti nawawawinza Sauli na wanage, hamba nawawakopola wanage wawele ndo Yonatani na Abinadabu na Maliki-shuwa. 3 Ngondo nayali ing'hang'hale ng'hatu kwa ubanzi wa Sauli. Watowa misale lowamuwene Sauli nawamlumiza kwa misale. 4 Ahyo Sauli nakamlonjela munhu yalingupapa vinhu vya heye vya kitowela ngondo, "Uhole ipanga lya hegwe unyhome, leka wanhu awa wohambe wenjile ikumbi waleche kumbeza." Ila ayo yalingupapa vinhu vya heye vya kitowela ngondo nakadumba ng'hatu na hawezile kudita ahyo. Lelo Sauli nakaliwika goya ipanga lya heye yuye na kuligwila. 5 Hamba yula yalingupapa vinhu vya heye vya kitowela ngondo loyamuwene Sauli nakabagama, naye kahi nakaligwila ipanga lyake, nakabagama. 6 Ahi ndo Sauli na wanage wadatu na ivyazi lya heye lyeng'ha, vyowabagame. 7 Waisilaeli weng'ha wawele nawali wochikala kuli ibindi lowawene kota wamizi nawabilima na kota Sauli na wanage nawabagama, nawajileka miji ja hewo na kubilima. Wafilisti nawaluta na kikala kuli miji ajo.

8 Zuwa lya keli, wala Wafilisti lowalutile kuvihola vinhu viwele kuli mitufi, nawajifika mitufi ja Sauli na wanage kuli chidunda cha Gilibowa. 9 Nawauvula nguwo mtufi wa Sauli na kuhola mutwi wa heye hamwe na vinhu vya heye vya kitowela ngondo, hamba nawawalajiza wasenga kuli isi yeng'ha ya Wafilisti kuwikula mbuli azo hali jimalukolo ja hewo na wanhu wa hewo. 10 Nawaviwika vinhu vya Sauli vya kitowela ngondo kuli ng'handa ya milungu ja hewo, hamba nawauniniza mutwi wa heye kuli ng'handa ya mlungu Dagoni. 11 Wenyeng'haye wa Yabeshi-gileadi lowahuliche Wafilisti vyowamditile Sauli, 12 wazidahe kitowa ngondo wa hewo weng'ha nawaluta kujihola mitufi ja Sauli na wanage na kujihilika Yabeshi. Nawajitila mizeje jawo hasi ha igodi lilinguchemigwa mwaloni ako Yabeshi, nawo nawesela kulya kwa mhela wa mazuwa saba.

13 Sauli nakabagama kwa vila hawele wa kukundigwa kwa Mkulu Nguluwi. Hauwinzile ulonzi wa Mkulu Nguluwi, mbaka nakalanda utanzi kwa mlaguzi kwa chiwalo cha ulongozi, 14 honhu ha kumlanda utanzi Mkulu Nguluwi. Kwa chiwalo acho, Mkulu Nguluwi nakamkopola na undewa wa heye nakamha Daudi, mwana wa Yese.