1 Hamba Waisilaeli weng'ha nawekungajiza hamwe kwa Daudi ako Hebuloni, nawamlonjela, "Ulole, hetwe ndo ivyazi lya Abulahamu. 2 Katali, mhela uwele Sauli loyawele mndewa, hegwe nakuwalongoza Waisilaeli kuli kitowa ngondo, naye Mkulu Nguluwi, Nguluwi wa hegwe nakakulonjela, ‘Kowa mdimi wa wanhu wa heni Waisilaeli na kowa chilongozi wa hewo.’ " 3 Ahyo wasekulu weng'ha wa Isilaeli nawaluta kwa mndewa ako Hebuloni, naye mndewa Daudi nakadita ilagano na hewo hali Mkulu Nguluwi, hamba wasekulu awo nawambakaliza mafuta Daudi leka yawe mndewa wa Waisilaeli, kwa kiwhana na ulonzi wa Mkulu Nguluwi woyaulonjile kwa kukolela Samweli.

4 Hamba Daudi na Waisilaeli weng'ha nawaluta Yelusalemu, muji uwele nawali uzeleka kwa itagwa lya Yebusi na Wayebusi nawali wochikala amo. 5 Wenyeng'haye wa Yebusi nawamlonjela Daudi, "Hukwinjila kuli muji awu." Ila Daudi nakauhola muji awo na ngome ya Siyoni, iwele ndo muji wa Daudi. 6 Daudi nakalonga, "Munhu yoneche yawele kowa wa mwaluko kuwatowa Wayebusi, kowa chilongozi mkulu wa wamizi." Lelo, Yoabu, mwana wa Seluiya, nakawa wa mwaluko kuwatowa, ahyo nakawa chilongozi. 7 Daudi nakaidita ngome ayo kuwa ndo haluga hake, ahyo muji awo nauchemigwa Muji wa Daudi. 8 Nakauzenga muji banzi zeng'ha, kwaluchila Milo mbaka kuli lukanzi kuizunguluta ngome, mhela wuwo Yoabu nakazenga honhu hanji hasigale ha Yelusalemu. 9 Daudi nakalutilila kuwa na mong'ho ng'hatu kwa vila Mkulu Nguluwi Yawele na Mong'ho nayali hamwe na heye.

10 Aga ndo matagwa ga vilongozi wa wamizi wazidahe wa Daudi, wawele hewo hamwe na Waisilaeli weng'ha, nawawimiza nzinzili undewa wa Daudi leka wenele kuli Isilaeli yeng'ha, kota Mkulu Nguluwi vyoyalagane.

11 Wamizi awo wazidahe wa Daudi ndo Yashobeamu, Mhakimoni, nayali mng'hangala wa wakulu wa wamizi. Heye naketowa kwa igoha lya heye na kuwakopola wanhu miya zidatu (300) kuli ngondo imwe. 12 Yazidahe yunji nayali Eleasali, mwana wa Dodo, Mwahohi. Yumwe wa wala wazidahe wadatu. 13 Ayo Eleasali nayali hamwe na Daudi kula Pasi-damimu, mhela uwele Wafilisti nawali wekungajize kwa chiwalo cha kitowa ngondo. Ako nakwali na mgunda wa shayili nyinji ng'hatu, wamizi wa Waisilaeli nawawabilima wamizi wa Wafilisti. 14 Ila Daudi na Eleasali nawema nzinzili hagati ha mgunda wula leka kuulewela, nawawakopola Wafilisti. Mkulu Nguluwi nakawalohola kwa kuwapa kusumya kukulu.

15 Hamba wazidahe wadatu hali wala wakulu makumi gadatu, nawaluta kwa Daudi kunyenje, ako kuli mhalika ya Adulamu, mhela awo wamizi wa Wafilisti nawali wawichile kambi kuli ibindi lya Lefaimu. 16 Naye Daudi mhela awo nayali kuli ngome na wamizi wa Wafilisti nawali kuli muji wa Betelehemu. 17 Daudi nayali na ng'halu lukami, nakelonjela, "Ndangugana ng'hatu kunwa mazi ga kunwa kulawa kuli izimbo lya habehi na lwizi lwa Betelehemu!" 18 Wala wazidahe wadatu nawafyela hagati ha kambi ya wamizi wa Wafilisti, nawaluta na kudeha mazi kuli ideho liwele habehi na lwizi lwa Betelehemu na kumigalila Daudi. Ila Daudi nakalema kunwa, nakagabohola hanyi kota nhambiko kwa Mkulu Nguluwi, 19 yolonga, "Mbuli kota ayi ikole kutali na heni, siweza kuidita hali Nguluwi wa heni. Ndaze, nyinwe danda ya wanhu wawele nawawika ukomu wa hewo mmoko mwa wang'honyo kwa kigala mazi aga?" Kwa vila nawawika ukomu wa hewo mmoko mwa wang'honyo kwa kigala mazi, Daudi nakalema kunwa mazi gala. Ayo ndo mbuli iditigwe na wala wazidahe wadatu.

20 Abishayi, mdodowe Yoabu, nayali ndo chilongozi wa wamizi wazidahe makumi gadatu. Heye naketowa kwa igoha lya heye hali wanhu miya zidatu (300) nakawakopola, nakawa na lutogo lukami hali wala wazidahe wadatu. 21 Lelo, nayali na lutogo ng'hatu kusinda wala wazidahe makumi wadatu, mbaka nayali chilongozi wa hewo, ila hawele yumwe wa wala wazidahe Wadatu.

22 Benaya, mwana wa Yehoyada, kulawa Kabuseeli, nayali mwamizi yazidahe, yawele nakadita mbuli nyinji za vinduzanduza. Nakawakopola wazidahe weli kulawa Moabu. Zuwa limwe mhela wa seluji nakadulika na kulikopola isimba kuli isimo. 23 Kahi nakamkopola Mmisili yawele nayali ng'wemang'wema kota mita mbili na nusu. Hanga Mmisili ayo nayali na igoha ikulu ng'hatu mmoko mwake kota igodi lya mtawa nguwo, Benaya nakaluta kwa Mmisili ayo yawele na nyhimbati hela, nakamsukula igoha alyo na kumkopola Mmisili ayo kwa igoha lya heye yuye. 24 Benaya, mwana wa Yehoyada, nakadita mbuli azo na nakawa na lutogo kota wala wazidahe Wadatu. 25 Ahyo Benaya nayali na lutogo ng'hatu kusinda wala wazidahe makumi gadatu, hanga hawazigwe hamwe na wala wazidahe wadatu. Daudi nakamuwika yawe chilongozi wa wamizi wa kumwamila heye.

26 Wamizi wazidahe wa Daudi nawali ndo Asaheli, mdodowe Yoabu na Elihanani, mwana wa Dodo kulawa Betelehemu 27 na Shamoti, Mhaloli na Helesi, Mpeloni 28 na Ila, mwana wa Ikeshi kulawa Tekowa na Abieseli kulawa Anatoti 29 na Sibekayi, Mhushahi na Ilayi, Mwahohi 30 na Mahalayi, Mnetofahi na Heledi, mwana wa Baana, Mnetofahi 31 na Itayi, mwana wa Libayi kulawa Gibeya, wa nhanzi ya Benjamini na Benaya, Mpilatoni 32 na Hulayi kulawa kuli nzanda za Gaashi na Abieli, Mwalibati 33 na Asimaweti, Mbahalumu na Eliaba Mshaaliboni 34 na wana wa Hashemu, Mgiloni na Yonatani, mwana wa Shagee, Mhalali 35 na Ahiamu, mwana wa Sakali, Mhalali na Elifali, mwana wa Uli 36 na Hefeli, Mmekelati na Ahiya, Mpeloni 37 na Hesilo, Mkalimeli na Naalayi, mwana wa Esibayi 38 na Yoeli, mng'holoze Natani na Mibuhali, mwana wa Hagili 39 na Seleki, Mwamoni na Nahalayi, Mbeeloti yawele nayali yopapa vinhu vya kitowela ngondo vya Yoabu, mwana wa Seluiya 40 na Ila na Galebu wawele nawali Waitili 41 na Uliya, Mhiti na Sabadi, mwana wa Ahilayi 42 na Adina, mwana wa Shisa, Mlubeni, yawele nayali chilongozi wa Walubeni, yawele nayali hamwe na wanhu makumi gadatu 43 na Hanani, mwana wa Maaka na Yoshafati, Mmitini 44 na Usiya, Mwashitelati na wana wa Hotamu, Mwaloeli, wawele ndo Shama na Yeleli 45 na wana wa Shimuli, Mtisi, wawele ndo Yediaeli na Yoha 46 na Elieli, Mmahawi na Itima, Mmoabu na wana wa Elinaamu, wawele ndo Yelibayi na Yoshaviya 47 na Elieli na Obedi na Yaasieli, Mmesobayi.