1 Avi ndo vilundo vya Walawi viwele navikola mijito ja kwamila. Kulawa kuli lukolo lwa Kola, nayali Meshelemiya mwana wa Kole wa ivyazi lya Asafu. 2 Heye Meshelemiya nayali na wana walume saba, wa mwaluko nayali Sekaliya na wa keli nayali Yediaeli na wa kadatu nayali Sebadiya na wa kane nayali Yasineli 3 na wa kahano nayali Elamu na wa sita nayali Yohanani na wa saba nayali Eliehoenayi.

4,5 Kahi nakwali na Obedi-edomu, yawele Nguluwi nakamtambichiza kwa kumha wana nane, wa mwaluko nayali Shemaya na wa keli nayali Yehosabadi na wa kadatu nayali Yowa na wa kane nayali Sakali na wa kahano nayali Netaneli na wa sita nayali Amieli na wa saba nayali Isakali na wa nane nayali Peuletayi. 6 Shemaya, mwana wa Obedi-edomu nayali na wana walume wawele nawali vilongozi kuli ivyazi lya mhaza wa hewo, kwa vila nawali wazidahe ng'hatu. 7 Wana awo nawali ndo Otini na Lefaeli na Obedi na Elisabadi. Wang'holoze Shemaya wawele nawali wazidahe ng'hatu nawali ndo Elihu na Semakiya. 8 Awo weng'ha nawali ndo walelwa wa Obedi-edomu, hewo na wana wa hewo na ivyazi lyawo nawali wanhu wazidahe na wawele na mong'ho wa kukola mijito. Lulelo lwa Obedi-edomu nalwali wanhu makumi sita na weli. 9 Naye Meshelemiya nayali na wana na wang'holoze, wawele nawali wazidahe. Hisabu ya hewo nayali wanhu kumi na nane.

10 Hosa, yumwe wa wana wa Melali nayali na wana wane, wawele ndo Shimuli yawele nakawichigwa na mhaza wa heye leka yawe chilongozi, hanga hawele mlelwa wa mwaluko 11 na Hilikiya na Tebaliya na Sekaliya. Hisabu ya wana weng'ha wa Hosa hamwe na wang'holoze nawali wanhu kumi na wadatu.

12 Wamizi awo nawagawanulwa kuli vilundo kwa kiwhana na ivyazi lyawo, nawo kahi nawapegwa mijito ja kwamila lwizi lwa ng'handa ya Mkulu Nguluwi kota wala Walawi wanji. 13 Chila ivyazi ne kulola winji wa hewo, nalitowelwa simbi kuhagula lwizi lwa kulolela. 14 Simbi ya kumhagula munhu wa kwamila lwizi lwa kolilawilaga isanya naimgwila Shelemiya. Nawatowa simbi kahi kwa chiwalo cha mwanage yalinguchemigwa Sekaliya, yawele nayali yalingulonga ulonzi uwele na luhala, naye naimgwila simbi ya kwamila lwizi lwa kasikazini. 15 Simbi ya kwamila lwizi lwa kusini naimgwila Obedi-edomu, nayo simbi ya kwamila ng'hano naiwagwila wanage. 16 Simbi za kwamila lwizi ja kolizinjilaga isanya na lwizi lwa Shaleketi kuli nzila ya kuchanya naziwagwila Shupimu na Hosa. Wamizi nawakola mijito kwa kiwalila. 17 Chila zuwa kuli ubanzi wa kolilawilaga isanya nakwali na wamizi sita na kasikazini nakwali na wamizi wane na kusini nakwali na wamizi wane, kahi kuli ng'hano nakuwichigwa wamizi weli 18 na kuli chibumuli cha kulutila kolizinjilaga isanya, nakwali na wamizi wane mnzila na wamizi weli kuli chibumuli acho. 19 Avi ndo vilundo vya wamizi hali lukolo lwa Kola na walelwa wa Melali wawele nawakola mijito ja kwamila.

20 Hali Walawi, Ahiya nayali na mijito ja kulolela ng'hano za ng'handa ya Nguluwi na ng'hano za vinhu viwichigwe chiuyeng'ha. 21 Ladani, nakalawa kuli lukolo lwa Gelishoni na nayali mhaza wa Yehieli. Walelwa wanji wa heye nawali vilongozi wa ivyazi kuli lukolo. 22 Wana wa Yehieli, nawali ndo Setamu na Yoeli, nawali walingulolela ng'hano ya ng'handa ya Mkulu Nguluwi. 23 Mijito aji kahi nawapegwa walelwa wa Amulamu na walelwa wa Isihali na walelwa wa Hebuloni na walelwa wa Usieli.

24 Shebueli, mlelwa wa Gelishomu, mwana wa Musa, nayali chilongozi mkulu wa ng'hano. 25 Walelwa wa Elieseli, yawele ndo mng'holoze Gelishomu, nawali ndo Lehabiya na Yolamu na Sikili na Shelomoti. 26 Shelomoti na ivyazi lya heye nawali wololela ng'hano zeng'ha za vinhu viwele naviwichigwa chiuyeng'ha na mndewa Daudi kwa vilongozi wa ivyazi liwele nalyali ndo wakulu wa wamizi maelufu na mamiya na kwa vilongozi wakulu wanji wa wamizi. 27 Vinhu vimwenga viwele naviholigwa kulawa kuli ngondo nawaviwika chiuyeng'ha kwa chiwalo cha kuzenga kahi ng'handa ya Mkulu Nguluwi. 28 Chila chinhu chiwele nachiwichigwa chiuyeng'ha na Samweli, mloli na Sauli, mwana wa Kishi na Abuneli, mwana wa Neli na Yoabu, yawele mayake nayali yochemigwa Seluiya, hamwe na vinhu viyage vyeng'ha viwele naviwichigwa chiuyeng'ha, vyeng'ha navyali hali ulolezi wa Shelomoti na ivyazi lya heye.

29 Kulawa kwa walelwa wa Isihali, Kenaniya na wanage nawapegwa mijito ja kulongoza kota wang'hangala na watagusa hali Waisilaeli. 30 Hali Wahebuloni, Hashabiya na wang'holoze elufu imwe na miya saba (1,700), weng'ha wawele wazidahe, nawapegwa mijito ja kwimilila honhu ha Isilaeli ha ubanzi wa kolizinjilaga isanya mwa lwanda lwa Yolodani. Nawemilila mijito jeng'ha ja Mkulu Nguluwi na ja mndewa Daudi. 31 Hali Wahebuloni, Yeliya nayali chilongozi wa lukolo na ivyazi lyeng'ha. Kuli mwaka wa makumi gane wa ulongozi wa mndewa Daudi, nakwali na kupugajiza, nawoneka Wahebuloni wazidahe ng'hatu kula Yaseli, ako Gileadi. 32 Mndewa Daudi nakamhagula Yeliya na wang'holoze elufu mbili na miya saba (2,700) wawele wazidahe na vilongozi wa ng'holo, leka kwimilila mbuli zeng'ha zilingumuwala heye na Nguluwi, kuli nhanzi za Lubeni na Gadi na nusu ya nhanzi ya Manase, ziwele nazali kuli ubanzi wa kolilawilaga isanya mwa lwanda lwa Yolodani.