1 Mndewa Daudi loyenjile kuli ng'handa ya heye ya chiundewa, nakamlonjela mloli Natani, "Ulole, heni ndangikala kuli ng'handa inojile izenjigwe na migodi ja mielezi, ila isanduku lya ilagano lya Mkulu Nguluwi lya mgati mwa ihema." 2 Natani nakamwidichila mndewa Daudi, "Udite choneche choulingijesa mnhumbula mwa hegwe, kwa vila Nguluwi ka hamwe na hegwe."

3 Ila nechilo yiyila ulonzi wa Nguluwi nawuya kwa Natani na kulonga, 4 "Ulute ukamlonjele chitumagwa wa heni Daudi kota Mkulu Nguluwi kangulonga hino, ‘Huweza kunzenjela ng'handa ya kikala. 5 Kulawa mhela wula londiwalavile Waisilaeli kulawa Misili mbaka lehano, sikale kuli ng'handa. Nandali kuli majendo kuno ndichikala kuli ihema kulawa kuli honhu hamwenga mbaka hayage. 6 Hali chila honhu hondutile na Waisilaeli weng'ha, ndaze nandonga ulonzi woneche na vilongozi woneche wa Waisilaeli wawele nandiwalajiza wawadime wanhu wa heni kuno ndilonga, "Lekachoni hamnzenjele ng'handa ya migodi ja mielezi?" ’ "

7 "Lelo mlonjele chitumagwa wa heni Daudi kota Mkulu Nguluwi Yawele na Mong'ho kangulonga hino, ‘Nandikulavya kula kuwele nawali udima ming'holo, leka uwe chilongozi wa wanhu wa heni Waisilaeli. 8 Kulawa mhela wula nandali hamwe na hegwe honhu honeche houlutile na nandiwakopola wang'honyo wa hegwe weng'ha hali hegwe. Lelo ndolidita itagwa lya hegwe lizeleche kota matagwa ga wanhu wanji wawele ndo wakulu ng'hatu muisi. 9 Nani ndowapa wanhu wa heni Waisilaeli honhu ha kikala, leka wekale goya hali honhu ha hewo wawo, leka waleche kutunyigwa kahi. Wanhu wehile hawoweza kuwatunya kahi kota vyowaditile aho hamwande 10 na kota vyowaditile kuli mazuwa geng'ha kulawa londiwahagule watagusa kwa chiwalo cha wanhu wa heni Waisilaeli. Kahi ndowadumya wang'honyo wa hegwe weng'ha na mzidi wa ago ndangukulonjela kota ndokupa walelwa wenji. 11 Mhela wa kilumba na wasekulu wa hegwe houfika, ndomuwika yumwe wa wana wa hegwe yawe mndewa, nani ndowimiza nzinzili undewa wa heye. 12 Heye ndo yawele kozenga ng'handa kwa chiwalo cha heni, nani ndochidita chigoda cha heye cha undewa chiwe nzinzili mazuwa gose. 13 Ndowa mhaza wa heye, naye kowa mwana wa heni. Nani sikusa igano lya heni lya kwimilila kwa heye, kota vyondilyusile kwa Sauli. 14 Mazuwa gose ndolwimiza nzinzili ludali lwa heye kuli ng'handa ya heni na kuli undewa wa heni. Ivyazi lya heye lyolongoza mazuwa gose.’ "

15 Natani nakamlonjela mndewa Daudi ulonzi weng'ha woyagubuligwe.

16 Hamba mndewa Daudi nakenjila mgati mwa ihema liwele nayali yaliwichile kwa chiwalo cha isanduku lya Ilagano na kikalisa hali Mkulu Nguluwi, nakaluka kulanda, "Gwa Mkulu Nguluwi, heni na wang'holozangu twa whaani mbaka nakutuditila mbuli azi zinojile? 17 Mbuli ayi nayali ndodo hali hegwe, gwa Nguluwi, kahi nakulonga kuwala walelwa wa heni kuli mazuwa galinguya. Nakundola kota mkulu kusinda wanhu wenji, gwa Mkulu Nguluwi. 18 Ndikulonjele choni kahi mzidi wa ago? Hanga kwangunzela lukami, heni chitumagwa wa hegwe, ung'hali kwangunyinula. 19 Gwa Mkulu Nguluwi, kwa chiwalo cha chitumagwa wa hegwe na kahi kwa chiwalo cha kunuwila kwa hegwe, nakudita mbuli ayi ng'hulu na kunzelesa kulagana ako kweng'ha kuwele kukulu ng'hatu. 20 Gwa Mkulu Nguluwi, haduhu yawele kota hegwe na haduhu Nguluwi yunji ila hegwe, kota vyotuhuliche kwa makutu ga hetwe. 21 Kahi hana wanhu wachi kuli isi ayi wawele woweza kuwhanizwa na wanhu wa hegwe Waisilaeli, wawele waliyeka Nguluwi wa hewo nakaluta kuwagombola leka wawe wanhu wa heye? Nakizelesa kwa wanhu kwa kudita mbuli ng'hulu na zilingudumbiza louwawinjile wanhu wa isi zinji hali wanhu wa hegwe, wawele nakuwagombola kulawa kuli isi ya Misili. 22 Gwa Mkulu Nguluwi, nakuwadita Waisilaeli wawe wanhu wa hegwe mazuwa gose, nagwe nakuwa Nguluwi wa hewo.

23 "Gwa Mkulu Nguluwi, mazuwa gose wimize nzinzili ulonzi wa hegwe woulonjile kuwala heni, chitumagwa wa hegwe na kuwala ivyazi lya heni. 24 Itagwa lyako lyotogoligwa mazuwa gose na wanhu wolonga, ‘Mkulu Nguluwi Yawele na Mong'ho, Nguluwi yawele mchanya mwa Isilaeli, ndo Nguluwi wa Waisilaeli.’ Ivyazi lya heni Daudi, chitumagwa wa hegwe, lokwima nzinzili hali hegwe. 25 Gwa Nguluwi wa heni, nandali ndikangaza kukulanda kwa vila nakungubulila kota koludita lulelo lwa heni luwe lwa chiundewa. 26 Gwa Mkulu Nguluwi, hegwe ndo Nguluwi! Nakulagana na heni chitumagwa wa hegwe mbuli ayi inojile. 27 Ahyo, gwa Mkulu Nguluwi, nakuwatambichiza walelwa wa heni chitumagwa wa hegwe, leka walongoze mazuwa gose hali hegwe. Ena, kwa vila nakuwatambichiza na kwangulutilila kuwatambichiza mazuwa gose."