1 Aga ndo matagwa ga Waisilaeli, wawele nawali vilongozi wa ivyazi na vilongozi wa wakulu wa wamizi maelufu na mamiya na wang'hangala wawo, wawele nawamkolela mijito mndewa Daudi kwa mbuli zilinguwala vilundo vya wamizi viwele navyali kuli kuwalila chila mwezi kuli mwaka weng'ha. Chila chilundo nachali na wanhu elufu makumi meli na zine (24,000).

2 Yashobeamu, mwana wa Sabudieli, nayali chilongozi wa chilundo cha mwezi wa mwaluko. Chilundo cha heye nachali na wanhu elufu makumi meli na zine (24,000). 3 Heye nayali mlelwa wa Pelesi, naye nayali chilongozi wa wang'hangala wa wamizi weng'ha kuli chila mwezi wa mwaluko wa mwaka. 4 Chilongozi wa chilundo cha mwezi wa keli nayali Dodayi, Mwahohi. Mikiloti ndo yawele nayali chilongozi wa chilundo cha heye. Chilundo acho nachali na wamizi elufu makumi meli na zine (24,000). 5 Chilongozi wa wakulu wa wamizi wa chilundo cha mwezi wa kadatu nayali Benaya, mwana wa Yehoyada, mtambika mkulu. Heye nayali mkulu wa chilundo chiwele na wanhu elufu makumi meli na zine (24,000). 6 Ayu ndo Benaya yawele nayali yazidahe hali chilundo cha wanhu makumi gadatu na nayali chilongozi wa chilundo acho. Amisabadi, mwana wa Benaya, nayali hali chilundo acho. 7 Chilongozi wa chilundo cha mwezi wa kane nayali Asaheli, mng'holoze Yoabu. Mwana wa Asaheli yalinguchemigwa Sebadiya nakahola honhu ha heye ha ulongozi. Chilundo cha heye nachali na wanhu elufu makumi meli na zine (24,000). 8 Chilongozi wa chilundo kuli mwezi wa kahano nayali Shamuhuti, Mwisilahi. Chilundo cha heye nachali na wanhu elufu makumi meli na zine (24,000). 9 Chilongozi wa chilundo cha mwezi wa sita nayali Ila, mwana wa Ikeshi, Mtekowa. Chilundo cha heye nachali na wanhu elufu makumi meli na zine (24,000). 10 Chilongozi wa chilundo cha mwezi wa saba nayali Helesi, Mpeloni wa lulelo lwa Efulaimu. Chilundo cha heye nachali na wanhu elufu makumi meli na zine (24,000). 11 Chilongozi wa chilundo cha mwezi wa nane nayali Sibekayi, Mhushahi wa lulelo lwa Sela. Chilundo cha heye nachali na wanhu elufu makumi meli na zine (24,000). 12 Chilongozi wa chilundo cha mwezi wa tisa nayali Abieseli, Mwanatoti wa lulelo lwa Benjamini. Chilundo cha heye nachali na wanhu elufu makumi meli na zine (24,000). 13 Chilongozi wa chilundo cha mwezi wa kumi nayali Mahalayi, Mnetofahi wa lulelo lwa Sela. Chilundo cha heye nachali na wanhu elufu makumi meli na zine (24,000). 14 Chilongozi wa chilundo cha kumi na imwe nayali Benaya, Mpilatoni wa lulelo lwa Efulaimu. Chilundo cha heye nachali na wanhu elufu makumi meli na zine (24,000). 15 Chilongozi wa chilundo cha mwezi wa kumi na mbili nayali Helidayi, Mnetofahi wa lulelo lwa Otinieli. Chilundo cha heye nachali na wanhu elufu makumi meli na zine (24,000).

16 Aga ndo matagwa ga vilongozi wakulu wa nhanzi za Isilaeli. Kwa Walubeni nayali Elieseli, mwana wa Sikili na kwa Wasimeoni nayali Shefatiya, mwana wa Maaka 17 na kwa Walawi nayali Hashabiya, mwana wa Kemueli na kwa Aluni nayali Sadoki. 18 Kwa Wayuda nayali Elihu, mng'holoze mndewa Daudi na kwa Waisakali nayali Omali, mwana wa Mikaeli 19 na kwa Wasebuluni nayali Ishimaya, mwana wa Obadiya na kwa Wanafutali nayali Yelemoti, mwana wa Asilieli 20 na kwa Waefulaimu nayali Hoseya, mwana wa Asasiya na kwa nusu ya nhanzi ya Manase nayali Yoeli, mwana wa Pedaya 21 na kwa nusu iyage ya nhanzi ya Manase ya Gileadi nayali Ido, mwana wa Sekaliya na kwa Wabenjamini nayali Yaasieli, mwana wa Abuneli 22 na kwa Wadani nayali Asaleli, mwana wa Yelohamu. Awo nawali ndo vilongozi wakulu wa nhanzi za Isilaeli.

23 Mndewa Daudi hawawazile wala wawele hasi ha miyaka makumi meli, kwa vila Mkulu Nguluwi nakelaha kuwadita Waisilaeli wawe wenji kota nhondwe za kilanga. 24 Yoabu, yawele mayake nayali yochemigwa Seluiya nakaluka kuwawaza ila hasindile. Ng'halazi ya Nguluwi naiwafika Waisilaeli kwa chiwalo cha mbuli ayo na hisabu ya hewo hayandichigwe kuli chitabu cha kukumbuchila kwa mndewa Daudi.

25 Asimaweti, mwana wa Adieli ndo nayali yololela ng'hano za mndewa Daudi. Munhu yawele nayali yololela ng'hano za kuli migunda na miji na vijiji na kuli ngome nayali Yonatani, mwana wa Usiya. 26 Esili, mwana wa Kelubu, nayali chilongozi wa walingukola mijito ja kulima kuli migunda. 27 Shimeyi, Mlamati, nayali chilongozi wa kuli migunda ja zabibu. Sabudi, Mshifumi, nayali chilongozi wa kuli mijito ja zabibu na kugongomanya na kulolela divai kuli midalamu mikulu. 28 Baali-hanani, Mgedeli ndo nayali yololela migunda ja mndewa ja mizeituni na mikuyu kuli vidunda vya kolizinjilaga isanya. Yoashi nayali yololela ng'hano za mafuta ga zeituni. 29 Shitilayi, Mshaloni, nayali yovilolela vilundo vya misenga jiwele najali jidimigwa ako Shaloni. Shafati, mwana wa Adilayi, nayali yovilolela vilundo vya misenga jiwele najali jidimigwa kuli mibindi. 30 Obili, Mwishimaeli, nayali yololela ngamiya. Yedeya, Mmelonoti, nayali yojilolela midogowi. 31 Yasisi, Mhagali, nayali yololela vilundo vya ming'holo na mhene. Awo weng'ha nawali vilongozi wa kulolela lufufu lwa mndewa Daudi.

32 Yonatani, mng'holoze mndewa Daudi, nayali yomtanza mndewa kwa kumlonjela mbuli zilivinji, nayali kahi muwanzi na yalingwandika. Yenieli, mwana wa Hakimoni, nayali yowalangusa wana wa mndewa. 33 Ahitofeli nayali yomtanza mndewa kwa kumlonjela mbuli zilivinji na Hushayi, Mwaliki, nayali goloko wa mndewa. 34 Ahitofeli loyabagame, Yehoyada, mwana wa Benaya na Abiatali nawahola honhu hake kwa kumtanza mndewa kwa kumlonjela mbuli zilivinji. Yoabu nayali chilongozi mkulu wa wamizi wa mndewa.