1 Hamba Nahashi, mndewa wa Waamoni nakabagama, mwanage yalinguchemigwa Hanuni, nakalongoza honhu ha heye. 2 Lelo, Daudi nakalonga, "Ndomditila ganojile Hanuni, mwana wa Nahashi, kwa vila mhaza wa heye nakanditila igano lya kwimilila." Hamba Daudi nakalajiza wasenga kumhembuliza Hanuni kwa chiwalo cha kubagama kwa mhaza wa heye. Nawo nawaluta kwa Hanuni leka kumhembuliza ako kuli isi ya Waamoni. 3 Ila vilongozi wa Waamoni nawamuuza mndewa Hanuni, "Ndaze! Kwangijesa kota Daudi nakamtogola mhaza wa hegwe kwa kuwalajiza wasenga woye kukuhembuliza? Ndaze, wanhu awa hawoyile kuipugajiza isi leka waisumye?" 4 Lelo, Hanuni nakawebata wasenga awo wa Daudi na kuwabasa soni kwa kubeya lulevu lwa hewo na kuzidadula nguwo za hewo hagati ha madako, hamba nakawaleka walute. 5 Daudi loyalonjelwe vila vyowaditilwe wasenga wa heye, nakawalajiza wanhu leka kuwabochela kwa vila wasenga awo nawali wokona soni ng'hatu. Nakawalonjela, "Mikale kuli muji wa Yeliko mbaka lulevu lwa hemwe holukota ndo mhiluche kaye."

6 Waamoni lowavizele kota nawamzudiza mndewa Daudi, Hanuni na Waamoni nawahilika kilo elufu makumi gadatu na miya sita (30,600) za sendi leka wazichigwe mituka ja ngondo hamwe na walingwendesa mituka ajo ja kukwejigwa na falasi kulawa Mesopotamiya na Alamu-maaka na Soba. 7 Nawazichigwa mituka ja ngondo elufu makumi gadatu na mili (32,000) hamwe na walingwendesa mituka ajo. Mndewa wa Maaka na vilundo vya wamizi wa heye nawaluta kuwika kambi ya hewo habehi na muji wa Medeba. Nawo Waamoni nawekungajiza kulawa kuli miji ja hewo, nawewika goya kwa chiwalo cha kitowa ngondo.

8 Daudi loyahuliche mbuli azo, nakamlajiza Yoabu yalute na wamizi weng'ha wazidahe. 9 Mhela awo Waamoni nawalawa na kiwika goya hali lwizi lwa muji wa hewo, wandewa wanji wawele nawoya kuwatanza nawewika goya kwa kitowa ngondo na nawali waliyeka hali honhu hazelu.

10 Yoabu loyawene kota wang'honyo wa heye nawewika goya kwa ngondo kumbele na kumwando kwa heye, nakahagula wamwe wa wamizi wazidahe ng'hatu hali Waisilaeli, nakawawika goya kwa kitowa na Waalamu. 11 Wala wamizi wanji wasigale, Yoabu nakawawika hali ulongozi wa Abishayi, mng'holoze, nawo nawawichigwa goya kwa chiwalo cha kitowa na Waamoni. 12 Yoabu nakamlonjela Abishayi, "Wone Waalamu wowa na mong'ho ng'hatu kusinda heni, lelo yokulapa uye kunhanza na wone Waamoni wowa na mong'ho kusinda hegwe, nani ndokuya kukutanza. 13 Uwe uzidahe! Titowe kwa kikangaza kwa chiwalo cha wanhu wa hetwe na kwa chiwalo cha miji ja Nguluwi wa hetwe. Mkulu Nguluwi kotuditila linojile hali meho ga heye."

14 Lelo, Yoabu na wamizi wawele hali ulongozi wa heye nawaluta kumwando kitowa na Waalamu mbaka Waalamu nawabilima. 15 Waamoni lowawawene kota Waalamu wangubilima, nawo nawambilima Abishayi, mng'holoze Yoabu, nawenjila mgati mwa muji wa hewo. Ahyo Yoabu nakahiluka Yelusalemu.

16 Waalamu lowawene kota nawasumigwa na Waisilaeli, nawawalajiza wasenga walute kuwegala Waalamu wanji wawele nawali kumwambu mwa lwanda lwa Eyufulate wawele nawali wolongozwa na Shofaki, chilongozi wa wamizi wa Hadadeseli. 17 Daudi loyahuliche mbuli azo, nakawakungajiza Waisilaeli weng'ha na kuloka lwanda lwa Yolodani. Nakawawika wamizi wa heye kwa chiwalo cha kitowa ngondo na hewo. Daudi nakewika goya kitowa ngondo na Waalamu, nawo Waalamu nawetowa na heye. 18 Ila Waalamu nawawabilima Waisilaeli. Daudi nakawakopola Waalamu walingwendesa mituka ja ngondo elufu saba (7,000) na wamizi walingujenda kwa magulu elufu makumi gane (40,000). Kahi nakamkopola Shofaki, chilongozi wa wamizi wa hewo. 19 Vitumagwa wa Hadadeseli lowawene kota nawasumigwa na Waisilaeli, nawadita ilagano lya kikala goya na Daudi, nawo nawawa vitumagwa wa Daudi. Ahyo Waalamu nawalema kuwatanza kahi Waamoni.