1 Isakali nayali na wana walume wane wawele ndo Tola na Pua na Yashubu na Shimuloni.

2 Tola nayali na wana walume wawele ndo Usi na Lefaya na Yelieli na Yahimayi na Ibusamu na Shemueli, wawele nawali ndo vilongozi wa ivyazi lyawo. Mhela wa ulongozi wa mndewa Daudi, walelwa wa Tola nawali ndo wazidahe kitowa ngondo kuli lukolo lwawo na hisabu ya hewo nayali ndo wanhu elufu makumi meli na mbili na miya sita (22,600).

3 Usi nayali na mwana mlume yawele nayali yochemigwa Isilahiya. Wana walume wa Isilahiya nawali ndo Mikaeli na Obadiya na Yoeli na Ishiya. Isilahiya na wanage nawali vilongozi wa ivyazi lyawo. 4 Kwa kiwhana na lukolo lwa ivyazi lyawo, nakwali na walume elufu makumi gadatu na sita (36,000) wazidahe kitowa ngondo, kwa vila nawali na wache wenji na wana wenji.

5 Ivyazi lya wanhu wawele nawali wazidahe kitowa ngondo kulawa kuli ng'holo zeng'ha za Isakali, kota vyowandichigwe kuli lukolo lwawo, hisabu ya hewo nayali wanhu elufu makumi nane na saba (87,000).

6 Benjamini nayali na wana walume wadatu wawele ndo Bela na Bekeli na Yediaeli.

7 Bela nayali na wana walume wahano wawele ndo Esiboni na Usi na Usieli na Yelemoti na Ili. Awo weng'ha nawali wazidahe kitowa ngondo na kahi vilongozi wa ivyazi lyawo. Hisabu ya wamizi kuli lukolo lwawo nayali wanhu elufu makumi meli na mbili na makumi gadatu na wane (22,034).

8 Bekeli nayali na wana walume tisa wawele ndo Semila na Yoashi na Elieseli na Eliehonayi na Omuli na Yelemoti na Abiya na Anatoti na Alemeti. 9 Nawandichigwa kwa kuwinza ng'holo zawo na ivyazi lyawo. Hisabu ya vilongozi wa hewo na wamizi nayali wanhu elufu makumi meli na miya mbili (20, 200), weng'ha wawele wazidahe kuli kitowa ngondo.

10 Yediaeli nayali na mwana mlume yawele nayali yochemigwa Bilihani. Bilihani nayali na wana walume saba wawele ndo Yeushi na Benjamini na Ehudi na Kenaana na Setani na Talishishi na Ahishahali. 11 Awa weng'ha nawali vilongozi wa ivyazi kuli ng'holo zawo na wamizi wazidahe kuli kitowa ngondo. Kulawa kuli walelwa wa hewo nakwali na wamizi elufu kumi na saba na miya mbili (17,200).

12 Shupimu na Hupimu nawali walelwa wa Ili. Dani nayali na mwana mlume yawele nayali yochemigwa Hushimu.

13 Nafutali nayali na wana walume wane wawele ndo Yaasieli na Guni na Yeseli na Shalumu. Awo nawali walelwa wa Biliha.

14 Manase nayali na wana walume weli, wawele ndo Asilieli na Makili, kulawa kwa mhawake Mwalamu. Makili nayali mhaza wa Gileadi. 15 Makili nakawafika wache kwa Hupimu na Shupimu. Lumbulye Makili nayali yochemigwa Maaka. Mwana wa keli wa Makili nayali yochemigwa Selofehadi. Selofehadi nayali na wahinza hela.

16 Maaka, mche wa Makili nakaponda wana walume weli, wawele ndo Peleshi na Sheleshi. Sheleshi nayali na wana walume weli, wawele ndo Ulamu na Lakemu. 17 Ulamu nayali na mwana mlume yawele nayali yochemigwa Bedani. Awa weng'ha ndo walelwa wa Gileadi, mwana wa Makili, mwana wa Manase.

18 Hamoleketi, lumbulye Gileadi nakawaponda Ishihodi na Abieseli na Mahila. 19 Shemida nayali na wana walume wane, wawele ndo Ahiani na Shekemu na Liki na Aniamu.

20 Efulaimu nayali na mwana mlume yawele nayali yochemigwa Shutela, naye Shutela nayali na mwana mlume yawele nayali yochemigwa Beledi, naye Beledi nayali na mwana mlume yawele nayali yochemigwa Tahati, naye Tahati nayali na mwana mlume yawele nayali yochemigwa Eleada, naye Eleada nayali na mwana mlume yawele nayali yochemigwa Tahati, 21 naye Tahati nayali na mwana mlume yawele nayali yochemigwa Sabadi, naye Sabadi nayali na mwana mlume yawele nayali yochemigwa Shutela. Efulaimu nayali na wana walume wanji, wawele ndo Eseli na Eleadi, wawele nawakopoligwa na wenyeng'haye wa isi ya Gati, kwa vila nawaluta ako kuwaboka migongolo jawo. 22 Efulaimu nakalombocheza kubagama kwa hewo kwa mazuwa menji ng'hatu na wang'holoze nawoya kumhembuliza. 23 Hamba Efulaimu nakawasa na mchewake, naye mchewake nakamponda mwana mlume yunji. Efulaimu nakamchema mwana ayo Beliya*, kwa chiwalo cha mbuli yihile iwele nailawila kuli ivyazi lyake.

24 Efulaimu nayali na mhinza yawele nayali yochemigwa Sheela. Ayu ndo yalajize miji ja Beti-holoni ya kuchanya na Beti-holoni ya hasi na Useni-sheela jizenjigwe.

25 Efulaimu nayali na mwana mlume yunji kahi, yawele nayali yochemigwa Lefa. Lefa nayali na mwana mlume yawele nayali yochemigwa Leshefu, naye Leshefu nayali na mwana mlume yawele nayali yochemigwa Tela, naye Tela nayali na mwana mlume yawele nayali yochemigwa Tahani, 26 naye Tahani nayali na mwana mlume yawele nayali yochemigwa Ladani, naye Ladani nayali na mwana mlume yawele nayali yochemigwa Amihudi, naye Amihudi nayali na mwana mlume yawele nayali yochemigwa Elishama, 27 naye Elishama nayali na mwana mlume yawele nayali yochemigwa Nuni, naye Nuni nayali na mwana mlume yawele nayali yochemigwa Yoshua.

28 Isi za hewo na haluga hawo nahali Beteli na vijiji vilinguuzunguluta muji awo mbaka ako Nalaani ubanzi wa kolilawilaga isanya na ako Geseli nawali ubanzi wa kolizinjilaga isanya, hamwe na vijiji vyake. Nawali wochikala kahi kuli miji ja Shekemu na vijiji vyake na Aya na vijiji vyake.

29 Kuli mbaka wa isi ya Manase nawali Beti-sheani na vijiji vyake na Taanaki na vijiji vyake na Megido na vijiji vyake na Doli na vijiji vyake. Ajo ndo miji jiwele nawekala walelwa wa Yusufu, mwana wa Isilaeli.

30 Asheli nayali na wana walume wane na mhinza. Wana walume nawali ndo Imuna na Ishiva na Ishivi na Beliya. Lumbulyawo nayali yochemigwa Sela. 31 Beliya nayali na wana walume weli wawele ndo Hebeli na Malikieli. Malikieli nayali ndo chaluchizo cha muji wa Bilisaiti. 32 Hebeli nayali na wana walume wadatu na mhinza. Wana walume nawali ndo Yafuleti na Shomeli na Hotamu. Lumbulyawo nayali yochemigwa Shuwa. 33 Yafuleti nayali na wana walume wadatu wawele ndo Pasaki na Bimuhali na Ashivati. 34 Wana wa Shomeli nawali ndo Ahi na Loga na Yehuba na Alamu. 35 Hotamu nayali na wana walume wane wawele ndo Sofa na Imuna na Sheleshi na Amali. 36 Sofa nayali na wana walume wawele ndo Sua na Halinefeli na Shuali na Beli na Imula 37 na Beseli na Hodu na Shama na Shilisha na Itilani na Beela.

38 Yeseli nayali na wana walume wawele ndo Yefune na Pisipa na Ala.

39 Ula nayali na wana walume wawele ndo Ala na Hanieli na Lisiya.

40 Awo weng'ha nawali walelwa wa Asheli na nawali kahi vilongozi wa ivyazi lyawo, wawele nawali ndo vilongozi walinguzeleka ng'hatu na wazidahe kitowa ngondo. Hisabu ya wala wawele nawandichigwa kwa kuwinza ng'holo zawo, nawali elufu makumi meli na sita (26,000).