1 Kuli mwaluko wa mwaka, mhela uwele wandewa wangulutaga kitowa ngondo, Yoabu nakachilongoza chilundo cha wamizi. Nakaidumya isi ya Waamoni, kahi nakaluta kuli muji wa Laba na kuuzunguluta, ila Daudi nakasigala Yelusalemu. Yoabu nakautowa muji wa Laba na kuuleka uwele mahame. 2 Hamba Daudi nakaihola kofia kulawa kuli mutwi wa limalukolo lya mlungu wa hewo Milikomu, iwele nayali na itunyo lya kilo makumi gadatu na zine za zahabu na nayali izungulusilwe maganga ga sendi nyinji. Daudi nakawika libwe alyo lya sendi nyinji kuli kofia ya heye. Hamba wamizi wa Daudi nawahola vinhu viyage vya sendi nyinji. 3 Hamba Daudi nakawadita wanhu wa muji wula wakole mijito kwa lupichi kwa misumeno ja chuma na sululu za chuma na miwago ja chuma. Ahyo nakawaditila ahi wanhu wa miji jeng'ha ja Waamoni. Hamba Daudi na wanhu wa heye nawahiluka kuli muji wa Yelusalemu.

4 Logakwete ago, nakulawila ngondo na Wafilisti ako Geseli. Sibekayi, kulawa kuli muji ulinguchemigwa Hushahi, nakamkopola Sipayi, yawele nayali yumwe wa Walefayi wawele ng'wemang'wema, ahyo Wafilisti nawasumigwa.

5 Nakwali na ngondo yinji kahi na Wafilisti. Elihanani, mwana wa Yaili, nakamkopola Lahimi, mng'holoze Goliati, Mgiti, yawele chaka cha igoha lya heye, nachali kota igodi lya yalingutawa nguwo.

6 Hamba nakwali kahi na ngondo ako Gati, kuwele nakwali na munhu yawele nayali ng'wemang'wema ng'hatu na yawele na vidole sita kuli chila moko na vidole sita kuli chila mgulu, vyeng'ha navyali vidole makumi meli na gane (24). Heye kahi nayali yumwe wa Walefayi. 7 Munhu ayo nakawaliga Waisilaeli, ahyo Yonatani, mwana wa Shimeya, mng'holoze Daudi, nakamkopola.

8 Awo nawali lulelo lwa Walefayi ako Gati, nawo nawakopoligwa na Daudi hamwe na vitumagwa wa heye.