1 Daudi nakazenga ng'handa za heye kuli muji wa Yelusalemu, uwele kahi nawali uchemigwa muji wa Daudi. Hamba nakawika goya honhu na kuwika ihema kwa chiwalo cha kuwichila isanduku lya ilagano. 2 Hamba Daudi nakalonga, "Haduhu munhu yunji yoneche yawele kolipika isanduku lya ilagano ila Walawi, kwa vila Mkulu Nguluwi nakawahagula hewo kulipika na kukola mijito hali heye mazuwa gose."

3 Ahyo Daudi nakawakungajiza Waisilaeli weng'ha ako Yelusalemu, leka kulihilika isanduku lya ilagano hali honhu hawele nahagongomanyigwa kwa chiwalo cha isanduku alyo. 4 Hamba Daudi nakawachema hamwe walelwa wa Aluni na Walawi. 5 Kulawa kuli lukolo lwa Kohati, nakaluta Ulieli na wang'holoze miya imwe na makumi meli (120) wawele hali ulongozi wa heye. 6 Kulawa kuli lukolo lwa Melali, nakaluta Asaya na wang'holoze miya mbili na makumi meli (220) wawele hali ulongozi wa heye. 7 Kulawa kuli lukolo lwa Gelishoni, nakaluta Yoeli na wang'holoze miya imwe na makumi gadatu (130) wawele hali ulongozi wa heye. 8 Kulawa kuli lukolo lwa Elisafani, nakaluta Shemaya na wang'holoze miya mbili (200) wawele hali ulongozi wa heye. 9 Kulawa kuli lukolo lwa Hebuloni, nakaluta Elieli na wang'holoze makumi nane (80) wawele hali ulongozi wa heye. 10 Kulawa kuli lukolo lwa Usieli, nakaluta Aminadabu na wang'holoze miya imwe na kumi na weli (112) wawele hali ulongozi wa heye.

11 Daudi nakawachema watambika weli, wawele ndo Sadoki na Abiatali. Hamba nakawachema Walawi sita, wawele ndo Ulieli na Asaya na Yoeli na Shemaya na Elieli na Aminadabu, 12 nakawalonjela, "Hemwe ndo vilongozi wa ng'holo za Walawi. Miyelize hamwe na wang'holozenu leka mligale isanduku lya ilagano lya Mkulu Nguluwi, Nguluwi wa Isilaeli mbaka hali honhu hondihagongomanye kwa chiwalo cha isanduku alyo. 13 Kwa vila hamlipichile hamwande, kwa chiwalo acho ng'halazi ya Mkulu Nguluwi, Nguluwi wa hetwe, naiwa kwa hetwe, kwa vila hatulihiliche kota vyoyalajize."

14 Lelo, watambika na Walawi nawehovuga leka wakaligale isanduku lya ilagano lya Mkulu Nguluwi, Nguluwi wa Isilaeli. 15 Walawi nawalipika Isanduku lya ilagano mmayega mwawo wopichila mipichilo jake kota Musa navyoyalajize, kwa wula ulonzi wa Mkulu Nguluwi.

16 Daudi kahi nakalajiza wakulu wa Walawi wahagule wamwe wa wang'holozawo wawe wokwimba na kutowa vinhu vilingudita muzichi, kota vila ving'hweleng'hwele na matowazi, leka kulavya lizi likulu lya usangalalo. 17 Ahyo nawawahagula Hemani na wang'holoze, wawele ndo Asafu na Etani. Hemani nayali ndo mwana wa Yoeli na Asafu nayali mwana wa Belekiya. Etani nayali ndo mwana wa Kushaya, mlelwa wa Melali. 18 Hamba nawawahagula Walawi awa wawe watanzi wa hewo kwa kibata honhu ha keli, Sekaliya na Yaasieli na Shemilamoti na Yehieli na Uni na Eliabu na Benaya na Maaseya na Matitiya na Elifelehu na Mikineya na wamizi wa lwizi, Obedi-edomu na Yehieli. 19 Hemani na Asafu na Etani nawahaguligwa kutowa matowazi ga shaba. 20 Sekaliya na Asieli na Shemilamoti na Yehieli na Uni na Eliabu na Maaseya na Benaya, nawali ndo walingutowa ving'hweleng'hwele kwa kiwhana na lizi lya Alamoti. 21 Ila Matitiya na Elifelehu na Mikineya na Obedi-edomu na Yehieli na Asasiya nawalongoza wawele na igombogombo kwa kiwhana na lizi lya Sheminiti.

22 Kenaniya, chilongozi wa Walawi, nakalongoza walingwimba kwa vila nayali yazidahe kuli mbuli ayo. 23 Belekiya na Elikana nawali wamizi wa isanduku lya ilagano. 24 Shebaniya na Yoshafati na Netaneli na Amasayi na Sekaliya na Benaya na Elieseli, nawali watambika, nawahaguligwa kutowa mhalamhanda kumwando mwa isanduku lya ilagano. Obedi-edomu na Yehiya nawahaguligwa kahi wawe wamizi wa isanduku.

25 Lelo Daudi na wasekulu wa Waisilaeli na vilongozi wa maelufu, nawaluta kulihola isanduku lya ilagano lya Mkulu Nguluwi kulawila haluga ha Obedi-edomu kwa kusangalala. 26 Nawamlavila nhambiko Nguluwi, misenga mibuguma saba na ming'holo milume saba na kwa vila nakawatanza wala Walawi wawele nawalipika lila isanduku lya ilagano lya Mkulu Nguluwi. 27 Daudi nayali yavalile ikanzu lya kitani inojile, hihyo du Walawi weng'ha wawele nawalipika isanduku lya ilagano na walingwimba na chilongozi wa hewo Kenaniya. Kahi Daudi nayali yavalile chizibao cha kitani cha watambika. 28 Ahyo, Waisilaeli weng'ha nawekungajiza hamwe kwa luchenze kulipika isanduku lya ilagano lya Mkulu Nguluwi mbaka Yelusalemu. Nawalihilika kwa mhalamhanda na matowazi na lizi likulu lya igombogombo na ving'hweleng'hwele.

29 Isanduku lya ilagano lya Mkulu Nguluwi loliwele likwinjila kuli muji wa Daudi, Mikali mhinza wa Sauli, nakasunjilila kuli itubuli na nakamona mndewa Daudi yovina na kusangalala, lelo nakambeza mnhumbula ya heye.