1 Lawi nayali na wana walume wadatu wawele ndo Gelishoni na Kohati na Melali.

2 Kohati nayali na wana walume wane wawele ndo Amulamu na Isihali na Hebuloni na Usieli.

3 Amulamu nayali na wana walume weli na mhinza, wawele ndo Aluni na Musa na Miliamu. Aluni nayali na wana walume wane wawele ndo Nadabu na Abihu na Eleasali na Itamali.

4 Eleasali nayali na mwana mlume yawele nayali yochemigwa Finehasi, naye Finehasi nayali na mwana mlume yawele nayali yochemigwa Abishua, 5 naye Abishua nayali na mwana mlume yawele nayali yochemigwa Buki, naye Buki nayali na mwana mlume yawele nayali yochemigwa Usi, 6 naye Usi nayali na mwana mlume yawele nayali yochemigwa Selahiya, naye Selahiya nayali na mwana mlume yawele nayali yochemigwa Melayoti. 7 Melayoti nayali na mwana mlume yawele nayali yochemigwa Amaliya, naye Amaliya nayali na mwana mlume yawele nayali yochemigwa Ahitubu, 8 naye Ahitubu nayali na mwana mlume yawele nayali yochemigwa Sadoki, naye Sadoki nayali na mwana mlume yawele nayali yochemigwa Ahimaasi. 9 Ahimaasi nayali na mwana mlume yawele nayali yochemigwa Asaliya, naye Asaliya nayali na mwana mlume yawele nayali yochemigwa Yohanani, 10 naye Yohanani nayali na mwana mlume yawele nayali yochemigwa Asaliya. Asaliya ndo yakolile mijito ja utambika kuli ng'handa ya Nguluwi iwele naizenjigwa na mndewa Solomoni ako Yelusalemu. 11 Asaliya nayali na mwana mlume yawele nayali yochemigwa Amaliya, naye Amaliya nayali na mwana mlume yawele nayali yochemigwa Ahitubu, 12 naye Ahitubu nayali na mwana mlume yawele nayali yochemigwa Sadoki, naye Sadoki nayali na mwana mlume yawele nayali yochemigwa Shalumu. 13 Shalumu nayali na mwana mlume yawele nayali yochemigwa Hilikiya, naye Hilikiya nayali na mwana mlume yawele nayali yochemigwa Asaliya, 14 naye Asaliya nayali na mwana mlume yawele nayali yochemigwa Selaya, naye Selaya nayali na mwana mlume yawele nayali yochemigwa Yehosadaki. 15 Yehosadaki nakahilikwa kuli isi ya chijenzi, mhela uwele Mkulu Nguluwi loyawahiliche wanhu wa Yuda na wa Yelusalemu kuli isi ya chijenzi, kwa moko wa mndewa Nebukadinesa.

16 Lawi nayali na wana walume wadatu wawele ndo Gelishoni na Kohati na Melali. 17 Chila yumwe wa hewo kahi nayali na wana. Gelishoni nayali na wana walume weli wawele ndo Libini na Shimeyi. 18 Kohati nayali na wana walume wane wawele ndo Amulamu na Isihali na Hebuloni na Usieli. 19 Melali nayali na wana walume weli wawele ndo Mahili na Mushi.

Alu ndo lulelo lwa Walawi kwa kiwhana na ng'holo zawo. 20 Awa ndo walelwa wa Gelishoni. Gelishoni nayali na mwana mlume yawele nayali yochemigwa Libini, naye Libini nayali na mwana mlume yawele nayali yochemigwa Yahati, naye Yahati nayali na mwana mlume yawele nayali yochemigwa Sima, 21 naye Sima nayali na mwana mlume yawele nayali yochemigwa Yowa, naye Yowa nayali na mwana mlume yawele nayali yochemigwa Ido, naye Ido nayali na mwana mlume yawele nayali yochemigwa Sela, naye Sela nayali na mwana mlume yawele nayali yochemigwa Yeatelayi.

22 Awa ndo walelwa wa Kohati. Kohati nayali na mwana mlume yawele nayali yochemigwa Aminadabu, naye Aminadabu nayali na mwana mlume yawele nayali yochemigwa Kola, naye Kola nayali na mwana mlume yawele nayali yochemigwa Asili, 23 naye Asili nayali na mwana mlume yawele nayali yochemigwa Elikana, naye Elikana nayali na mwana mlume yawele nayali yochemigwa Ebiasafu, naye Ebiasafu nayali na mwana mlume yawele nayali yochemigwa Asili, 24 naye Asili nayali na mwana mlume yawele nayali yochemigwa Tahati, naye Tahati nayali na mwana mlume yawele nayali yochemigwa Ulieli, naye Ulieli nayali na mwana mlume yawele nayali yochemigwa Usiya, naye Usiya nayali na mwana mlume yawele nayali yochemigwa Shauli.

25 Wana walume wa Elikana nawali weli, wawele ndo Amasayi na Ahimoti. 26 Ahimoti nayali na mwana mlume yawele nayali yochemigwa Elikana, naye Elikana nayali na mwana mlume yawele nayali yochemigwa Sofayi, naye Sofayi nayali na mwana mlume yawele nayali yochemigwa Nahati, 27 naye Nahati nayali na mwana mlume yawele nayali yochemigwa Eliabu, naye Eliabu nayali na mwana mlume yawele nayali yochemigwa Yelohamu, naye Yelohamu nayali na mwana mlume yawele nayali yochemigwa Elikana. 28 Wana walume wa Samweli nawali weli, wawele ndo Yoeli na Abiya. Yoeli nayali ndo mlelwa wa mwaluko na wa keli nayali ndo Abiya.

29 Awa ndo walelwa wa Melali. Melali nayali na mwana mlume yawele nayali yochemigwa Mahili, naye Mahili nayali na mwana mlume yawele nayali yochemigwa Libini, naye Libini nayali na mwana mlume yawele nayali yochemigwa Shimeyi, naye Shimeyi nayali na mwana mlume yawele nayali yochemigwa Usa, 30 naye Usa nayali na mwana mlume yawele nayali yochemigwa Shimeya, naye Shimeya nayali na mwana mlume yawele nayali yochemigwa Hagiya, naye Hagiya nayali na mwana mlume yawele nayali yochemigwa Asaya.

31 Matagwa galinguya ndo ga wanhu wawele mndewa Daudi nakawawika leka wawe vilongozi wa walingwimba kuli ihema lya Mkulu Nguluwi hala lowasindile kuwika isanduku lya ilagano mgati mwa ihema alyo. 32 Nawakola mijito ja hewo ja kwimba hali ihema lya Nguluwi mbaka mhela mndewa Solomoni loyazenjile ng'handa ya Mkulu Nguluwi ako Yelusalemu. Nawali wokola mijito ja hewo goya kota vyoilinguganigwa. 33 Wanhu awo wawele nawali wokola mijito ja kwimba hamwe na wana wa hewo nawali ndo Hemani, kulawa kuli lukolo lwa Kohati yawele nayali yalingwimba. Hemani nayali mwana wa Yoeli, mwana wa Samweli, 34 mwana wa Elikana, mwana wa Yelohamu, mwana wa Elieli, mwana wa Toa, 35 mwana wa Sufu, mwana wa Elikana, mwana wa Mahati, mwana wa Amasayi, 36 mwana wa Elikana, mwana wa Yoeli, mwana wa Asaliya, mwana wa Sefaniya, 37 mwana wa Tahati, mwana wa Asili, mwana wa Ebiasafu, mwana wa Kola, 38 mwana wa Isihali, mwana wa Kohati, mwana wa Lawi, mwana wa Isilaeli.

39 Asafu nayali ubanzi wa kudilo wa Hemani. Lukolo lwake kulawa kwa Lawi nalwali hino, Asafu, mwana wa Belekiya, mwana wa Shimeya, 40 mwana wa Mikaeli, mwana wa Baaseya, mwana wa Malikiya, 41 mwana wa Etini, mwana wa Sela, mwana wa Adaya, 42 mwana wa Etani, mwana wa Sima, mwana wa Shimeyi, 43 mwana wa Yahati, mwana wa Gelishoni, mwana wa Lawi.

44 Etani, kulawa kuli lukolo lwa Melali, nayali ubanzi wa kumoso wa Hemani. Lukolo lwake kulawa kwa Lawi nalwali hino, Etani, mwana wa Kishi, mwana wa Abidi, mwana wa Maluki, 45 mwana wa Hashabiya, mwana wa Amasiya, mwana wa Hilikiya, 46 mwana wa Amusi, mwana wa Bani, mwana wa Shemeli, 47 mwana wa Mahili, mwana wa Mushi, mwana wa Melali, mwana wa Lawi.

48 Walawi wayao wanji wasigale nawapegwa mijito jinji kuli honhu helile ha ihema lya Nguluwi.

49 Aluni na walelwa wa heye ndo wawele nawali wolavya nhambiko hali honhu ha kulavila nhambiko za kulakazwa na kahi hali honhu ha kufunyizila ubani. Nawakola mijito jeng'ha jiwele najiganigwa hali honhu helile ng'hatu leka kuiditila Isilaeli uhanyisi. Nawagadita aga geng'ha kota vyowalajizwe na Musa, chitumagwa wa Nguluwi. 50 Awa ndo walelwa wa Aluni. Aluni nayali na mwana mlume yawele nayali yochemigwa Eleasali, naye Eleasali nayali na mwana mlume yawele nayali yochemigwa Finehasi, naye Finehasi nayali na mwana mlume yawele nayali yochemigwa Abishua, 51 naye Abishua nayali na mwana mlume yawele nayali yochemigwa Buki, naye Buki nayali na mwana mlume yawele nayali yochemigwa Usi, naye Usi nayali na mwana mlume yawele nayali yochemigwa Selahiya, 52 naye Selahiya nayali na mwana mlume yawele nayali yochemigwa Melayoti, naye Melayoti nayali na mwana mlume yawele nayali yochemigwa Amaliya, naye Amaliya nayali na mwana mlume yawele nayali yochemigwa Ahitubu, 53 naye Ahitubu nayali na mwana mlume yawele nayali yochemigwa Sadoki, naye Sadoki nayali na mwana mlume yawele nayali yochemigwa Ahimaasi.

54 Aha ndo honhu howapegwe walelwa wa Aluni wa lukolo lwa Wakohati. Nawabochela honhu aho kwa vila nawali wa mwaluko kutowelwa simbi. 55 Nawapegwa muji wa Hebuloni na honhu hake ha kudimila kuli isi ya Yuda. 56 Ila migunda hamwe na vijiji viwele naviuzunguluta muji awo nakapegwa Kalebu, mwana wa Yefune. 57 Lelo, walelwa wa Aluni nawapegwa miji aji hamwe na honhu hake ha kudimila. Nawapegwa Hebuloni, uwele ndo muji wa kubilimila na Libuna, hamwe na honhu hake ha kudimila. Nawapegwa kahi Yatili na Eshitemoa, hamwe na honhu hake ha kudimila 58 na Hileni na Debili, hamwe na honhu hake ha kudimila 59 na Ashani na Beti-shemeshi, hamwe na honhu hake ha kudimila. 60 Kulawa kuli honhu ha nhanzi ya Benjamini, nawapegwa miji ja Geba na Alemeti na Anatoti, hamwe na honhu hake ha kudimila. Miji jeng'ha jowapegwe kwa kiwhana na ng'holo zawo, najali kumi na jidatu. 61 Walelwa wasigale wa Wakohati nawapegwa miji kumi kulawa kuli ng'holo za nusu ya nhanzi ya Manase.

62 Lukolo lwa Gelishoni kwa kuwinza ng'holo zawo nawapegwa miji kumi na jidatu kulawa kuli nhanzi za Isakali na Asheli na Nafutali na Manase ako Bashani. 63 Walelwa wa Melali kwa kuwinza ng'holo zawo nawapegwa miji kumi na mili kulawa kuli nhanzi za Lubeni na Gadi na Sebuluni. 64 Ahyo Waisilaeli nawawapa Walawi miji aji hamwe na honhu hake ha kudimila. 65 Miji jilonjigwe aho hachanya* kuli nhanzi za Yuda na Simeoni na Benjamini nawapegwa Walawi.

66 Ivyazi linji lya lukolo lwa Wakohati nalipegwa miji hamwe na honhu hake ha kudimila kulawa kuli nhanzi ya Efulaimu. 67 Lelo nawapegwa miji ja kubilimila, jiwele ndo Shekemu na honhu hake ha kudimila, kuli isi ya vidunda vya Efulaimu na Geseli, hamwe na honhu hake ha kudimila 68 na Yokimeamu, hamwe na honhu hake ha kudimila na Beti-holoni, hamwe na honhu hake ha kudimila 69 na Aiyaloni, hamwe na honhu hake ha kudimila na Gati-limoni, hamwe na honhu hake ha kudimila. 70 Kuli nusu ya nhanzi ya Manase nawapegwa miji ja Aneli, hamwe na honhu hake ha kudimila na Balaamu, hamwe na honhu hake ha kudimila.

71 Walelwa wa Wagelishoni nawapegwa miji kota jino hamwe na honhu hake ha kudimila. Kuli isi ya nusu ya Manase nawapegwa Golani kuli Bashani, hamwe na honhu hake ha kudimila na Ashitaloti, hamwe na honhu hake ha kudimila. 72 Kuli isi ya nhanzi ya Isakali nawapegwa, Kedeshi hamwe na honhu hake ha kudimila na Debelati, hamwe na honhu hake ha kudimila 73 na Lamoti, hamwe na honhu hake ha kudimila na Anemu, hamwe na honhu hake ha kudimila.

74 Kuli isi ya nhanzi ya Asheli nawapegwa Mashali, hamwe na honhu hake ha kudimila na Abidoni, hamwe na honhu hake ha kudimila 75 na Hukoki, hamwe na honhu hake ha kudimila na Lehobu, hamwe na honhu hake ha kudimila. 76 Kuli isi ya nhanzi ya Nafutali nawapegwa Kedeshi kuli Galilaya, hamwe na honhu hake ha kudimila na Hamoni, hamwe na honhu hake ha kudimila na Kiliataimu, hamwe na honhu hake ha kudimila.

77 Walelwa wa Wamelali nawapegwa miji jino hamwe na honhu hake ha kudimila hafungo mwa miji ajo. Kuli isi ya nhanzi ya Sebuluni, nawapegwa Limono, hamwe na honhu hake ha kudimila na Taboli, hamwe na honhu hake ha kudimila. 78 Kuli isi ya nhanzi ya Lubeni ubanzi wa kulilawilaga isanya mwa lwanda lwa Yolodani, habehi na muji wa Yeliko, nawapegwa Beseli, muji uwele kuli ibalalika hamwe na honhu hake ha kudimila na Yahasa, hamwe na honhu hake ha kudimila 79 na Kedemoti, hamwe na honhu hake ha kudimila na Mefaati, hamwe na honhu hake ha kudimila. 80 Kuli isi ya nhanzi ya Gadi nawapegwa Lamoti kuli isi ya Gileadi, hamwe na honhu hake ha kudimila na Mahanaimu, hamwe na honhu hake ha kudimila 81 na Heshiboni, hamwe na honhu hake ha kudimila na Yaseli, hamwe na honhu hake ha kudimila.