1 Mndewa Daudi nakawachema vilongozi wakulu weng'ha wa Isilaeli wekungajize ako Yelusalemu. Vilongozi awo ndo vilongozi wakulu wa nhanzi zeng'ha na vilongozi wa wakulu wa wamizi wa mndewa na vilongozi wa wakulu wa maelufu na wa mamiya na vilongozi walingulolela lufufu lweng'ha na migongolo ja mndewa na wanage, hamwe na vilongozi wa ng'handa ya chiundewa na wazidahe kitowa ngondo na wamizi weng'ha wazidahe. 2 Hamba mndewa Daudi nakema na kulonga, "Hemwe wang'holozangu na wanhu wa heni, mnyhulichize. Nanuwila kuzenga ng'handa leka iwe honhu ha kuwika isanduku lya ilagano lya Mkulu Nguluwi, kwa chiwalo cha kuwa honhu ha kuwichila magulu ga Nguluwi wa hetwe kuli isanduku alyo. 3 Ila Nguluwi nakandemeza kwa vila nda munhu wa kitowa ngondo na kwa vila nambohola danda nyinji. 4 Ila Mkulu Nguluwi, Nguluwi wa Isilaeli nakanyhagula hali ivyazi lya mhaza wa heni leka ndiwe mndewa wa Isilaeli mazuwa gose. Nakaihagula nhanzi ya Yuda leka ilongoze na kulawa kuli nhanzi ayo, nakalihagula ivyazi lya mhaza wa heni na hali wana wa mhaza wa heni, nakanojezwa kumbika leka ndiwe mndewa wa Isilaeli yeng'ha. 5 Mkulu Nguluwi nakamha heni wana wenji na hali wana awo weng'ha nakamhagula Solomoni leka yekalise hali chigoda cha undewa wa heye Mkulu Nguluwi, leka yailongoze Isilaeli.

6 "Mkulu Nguluwi nakandonjela, ‘Mwanago Solomoni ndo yawele konzenjela ng'handa na lugagala lwa heni, kwa vila nandimhagula heye leka yawe mwana wa heni, nani ndowa mhaza wa heye. 7 Ndowimiza nzinzili undewa wa heye mazuwa gose wone kolutilila kibatilila mizilo ja heni na malajizo ga heni kota vyoyalingudita lehano.’ 8 Ahyo lelo, ndanguwalajiza hali Waisilaeli weng'ha na nhing'hano ayi ya Mkulu Nguluwi, kuno Nguluwi wa hetwe yohulika kota mibatilile malajizo ga Mkulu Nguluwi, Nguluwi wa hemwe, leka isi ayi inojile iwe ya hemwe na kuwalechela walelwa wa hemwe, leka iwe uhalizi wa hewo wa mazuwa gose.

9 "Nagwe Solomoni, mwana wa heni, umzele Nguluwi wa mhaza wa hegwe na umkolele mijito kwa nhumbula ya hegwe yeng'ha na kwa kunuwila kumwe, heye Mkulu Nguluwi kangupugajizaga nhumbula na kangukuzela kunuwila na kiwika goya kwa wanhu. Houmpala, komona, ila wone umleche, naye kokutoza kutali na heye mazuwa gose. 10 Wilolele lelo, kwa vila Mkulu Nguluwi nakakuhagula leka uzenje Ng'handa ya Nguluwi, iwele yowa ndo honhu ha chiuyeng'ha. Uwe uzidahe na udite mijito joupegwe."

11 Ahyo Daudi nakamha Solomoni lamani ya chituka cha Ng'handa ya Nguluwi na ng'handa zake na ng'hano zake na milingo jake na vihengo vyake vya mgati na honhu ha chigoda cha uhanyisi. 12 Nakamha malajizo geng'ha goyejesile mnhumbula kuwala lugagala lwa Ng'handa ya Mkulu Nguluwi na vihengo vilinguzunguluta lugagala na ng'hano za ng'handa ya Nguluwi na ng'hano za kuwichila vinhu viwichigwe chiuyeng'ha. 13 Nakamha kahi malajizo kuwala mijito ja watambika na Walawi na kwa chiwalo cha mijito jeng'ha ja kuli Ng'handa ya Mkulu Nguluwi. Nakamha kahi malajizo kuwala vinhu vyeng'ha vya kufugamila vya kuli Ng'handa ya Mkulu Nguluwi. 14 Nakamha chasi cha zahabu ilinguganigwa kugongomanyila vinhu vyeng'ha vya zahabu vya kuli mijito jilivinji na chasi cha sendi ilinguganigwa kuli mijito jilivinji 15 na chasi cha zahabu kwa chiwalo cha vinhu vya kuwichila chenje na vyenje vyake na chasi cha zahabu cha chila chinhu cha kuwichila chenje na vyenje vyake na chasi cha sendi cha kugongomanyila chinhu cha kuwichila chenje na vyenje vyake kwa kiwhana na mijito ja chila chinhu cha kuwichila chenje 16 na chasi cha zahabu kwa chiwalo cha kugongomanyila chisaga cha kuwichila mibumunda jiwichigwe chiuyeng'ha na chasi cha sendi kwa chiwalo cha chisaga cha sendi. 17 Nakalavya kahi malajizo kwa chiwalo cha chasi cha zahabu inojile ilinguganigwa kwa chiwalo cha kugongomanyila uma na mibuli na vizombe na kahi chasi cha zahabu na sendi chilinguganigwa kwa chiwalo cha kugongomanyila visaye 18 na chasi cha zahabu inojile kwa chiwalo chakugongomanyila honhu ha kulavila nhambiko ha kufunyizila ubani. Nakamha kahi malajizo kuwala mutuka wa zahabu wa vilumbigwe viwele na mabawa viwele navigonzola mabawa na kuligubika isanduku lya ilagano lya Mkulu Nguluwi. 19 Ago geng'ha, mndewa Daudi nakagawika hazelu kwa gandichigwe goyapegwe na Mkulu Nguluwi. Mijito jeng'ha jikoleche kwa kuwinza lamani ayo.

20 Hamba, mndewa Daudi nakamlonjela Solomoni, mwanage, "Wime nzinzili na uzidahe, ukole mijito aji. Uleche kudumba ne kuwa na lunhwinhwi. Nguluwi, Mkulu Nguluwi, yawele ndo Nguluwi wa heni, ka hamwe na hegwe. Hokuleka ila kowa hamwe na hegwe mbaka housinda mijito jeng'ha jilinguganigwa kukoleka kuli Ng'handa ya Mkulu Nguluwi. 21 Watambika na Walawi nawawichilwa mijito jowalinguganigwa kukola kuli ng'handa ya Nguluwi. Wakola mijito wawele na uwanzi wa chila mbuli wowa goya kukutanza na wanhu weng'ha hamwe na vilongozi wa hewo wowinza malajizo ga hegwe."