1 ଅ ସାକାର୍‌ଇଂ ପେଇଂନେ ଚାକର୍‌ଇଂନେ ଆଡ଼ାତ୍ରା ନ୍ୟାୟ୍ ବାରି ସମାନ୍ ବେବ‍ଆର୍ ଡିଙ୍ଗ୍‌ପା । ମନେ ବପା କିତଙ୍ଗ୍ଇନିନ୍ନିଆ ପେଇଂନେ ଡିଗ୍ ମୁଇଂଜା ମାପ୍‌ରୁ ଲେଃକେ ।

2 କାଲାଆଃ ପାର୍‌ତନା ଡିଙ୍ଗ୍ ଲାଲାପା । ପାର୍‌ତନା ଡିଙ୍ଗ୍‌କେଲା କାଲାଆଃ ପର୍‌ମେସର୍‌କେ ଦନ୍ୟବାଦ୍‌ ବିଃପା । 3 କିସ୍‌ଟନେ ବୁଃଡ଼ି ଲେଃକ୍ନେ ସାମୁଆଁ ବାସଙ୍ଗ୍‌ ଡିଙ୍ଗ୍‌ନେ ଉଦେସ୍‌ନ୍ନିଆ ଇସ୍‌ପର୍ ଡିରକମ୍ ଆନେକେ ସୁଜଗ୍‌ ବିଏ ଆତେନ୍‌ସା ଡିଗ୍ ପାର୍‌ତନା ଡିଙ୍ଗ୍‌ପା । ଆଣ୍ଡିନେ ବ୍ନାଲିର୍ ବାସଙ୍ଗ୍‌ ଡିଙ୍ଗ୍ ନ୍‌ସା ନେଙ୍ଗ୍ ଏବେ ବନ୍ଦିସାଲାନ୍ନିଆ ନ୍‌ଲେକେ 4 ପାର୍‌ତନା ଡିଙ୍ଗ୍‌ପା ଡିରକମ୍ ନେଙ୍ଗ୍ ସତ୍ ବାରି ନିମାଣ୍ଡା ବାବ୍‌ରେ ଆତେନ୍‌ ବାସଙ୍ଗ୍‌ ଡିଙ୍ଗ୍ ଇଁୟାଏ ।

5 ସାପା ସୁଜଗ୍‌ନେ ଟିକ୍‌ ବେବଆର୍‌ ଡିଙ୍ଗ୍‌ଚେ ଅବିସ୍‌ବାସି ଇଂନେ ଡାଗ୍ରା ବୁଦିଗ୍ୟାନ୍‌ ଏତେ ବେବଆର୍‌ ଡିଙ୍ଗ୍‌ପା । 6 ପେଇଂନେ ସାମୁଆଁ ସାପାବେଲା ମନ୍‌କେ ୱେଲେଃ ବାରି ବିତିଗ୍ ରକମ୍‌ ମ୍ବ୍ରେ ଲେଃଲେ । ସାପାରେକେ ଡିରକମ୍ ଟିକ୍‌ନା ଉତର୍ ବିପେୟାଏ ଏନ୍‌ ସାମୁଆଁ ପେଇଂ ମ୍ୟାନେ ଦର୍‌କାର୍ ।

7 ଜିସୁ କିସ୍‌ଟନେ ନ୍‌ସା ନେଙ୍ଗ୍‌ନେ ନିଜର୍‌ ବୟାଁ ତୁଖିକ ବିସ୍‌ବାସ୍‌ ସେବାରେ ବାରି ନେଙ୍ଗ୍ ଏତେ ମାପ୍‌ରୁନେ ମୁଇଙ୍ଗ୍ ସେବାରେ ଡିଙ୍ଗ୍‌କେ । ନେଙ୍ଗ୍ ଏତେ ଆକ୍‌ଅରିଆ ମେଁନେ ସାପା ଗଟେଡିଂକେ ଆତେନ୍‌ ସାପା ସାମୁଆଁ ମେଁ ଆପେକେ ବାସଙ୍ଗ୍ଏ । 8 ଆତେନ୍‌ସା ନେଙ୍ଗ୍ ଆମେକେ ବେଣ୍ଡିଂ । ନେଙ୍ଗ୍ ଇକ୍‌ଚା ଣ୍ଡିଙ୍ଗ୍‌ଏ ଜେ ନେ ଡିରକମ୍ ନେଲେକେ ଆତେନ୍‌ ପେଇଂ ମ୍ୟାପା । 9 ✝ମେଁନେ ସଙ୍ଗେ ନେଙ୍ଗ୍ ବିସ୍‌ବାସ୍‌ ବାରି ନିଜର୍‌ ବୟାଁ ଅନୀସିମକେ ବେଣ୍ଡିଂକେ । ମେଁ ପେନେ ବିତ୍ରେବାନ୍‌ ମୁଇଂଜା । ମେଇଂ ଏନ୍ ଜାଗାନ୍ନିଆ ଗଟେଡିଙ୍ଗ୍‌କ୍ନେ ସାପା ବିସୟ୍ ଆପେକେ ଆମ୍ୟାଏ ।

10 ✝ନେଙ୍ଗ୍‌ ଏତେ ବନ୍ଦି ଡିଙ୍ଗ୍‌ଲେଃକ୍ନେ ଆରିସ୍ତାର୍ଖ ବାରି ବର୍ଣ୍ଣବା ନେ କୁଟୁମ୍‌ନେ ବୟାଁ ମାର୍‌କ ଏନ୍‌ ବିସୟ୍‌ନ୍ନିଆ ପେଇଂ ଅଁ ପେଲେକେ; ମେଁ ଜଦି ପେନେ ଡାଗ୍ରା ପାଙ୍ଗ୍‌ଏ ତେଲା ଆମେକେ ଗ୍ର‍ଅନ୍‌ ଡିଙ୍ଗ୍‌ପା ଆପେକେ ସାର୍‌ଲ ଡିଙ୍ଗ୍‌କେ । 11 ଯୁସ୍ତ ମ୍ନିରେ ସ୍ନାମୁଆଁ ଜିସୁ ଡିଗ୍‌ ସାର୍‌ଲଡିଂକେ । କ୍ରିସ୍ଟ ଦରମ୍ ଗ୍ର‍ଅନ୍‌ ଡିଙ୍ଗ୍‌ବକ୍ନେ ମାତର୍‌ ଏନ୍ ଞ୍ଜି ରୁଆ ଜିହୁଦି ଇସ୍‌ପର୍‌ନେ ରାଇଜ୍ ନ୍‌ସା ନେଙ୍ଗ୍‌ନେ ଏତେ କୁଡ଼େମାଡ଼େଚେ ଆନେଙ୍ଗ୍ ଜାବର୍ ସାଇଜ ଡିଙ୍ଗ୍‌ ବଆର୍‌କେ ।

12 ✝ଏପାଫ୍ରା ଆପେକେ ସାର୍ଲଡିଂକେ । ମେଁ ଜିସୁ କିସ୍‌ଟନେ ମୁଇଙ୍ଗ୍ ସେବକ । ମେଁ ପେଇଂନେ ଦଲ୍‌ନେ ରେମୁଆଁ । ମେଁ କାଲାଆଃ ପେଇଂନେ ସା ପାର୍‌ତନା ଡିଙ୍ଗ୍‌କେ । ପେଇଂ ଆତ୍ମିକ ବାବ୍‌ରେ ପବିତ୍ର ଡିଙ୍ଗ୍‌ପା ବାରି ପର୍‌ମେସର୍‌ ମେଁନେ ଇକ୍‌ଚା ଡିଙ୍ଗ୍‌କେ ଦେତ୍‌ ରକମ୍‌ ଡିଙ୍ଗ୍‌ପା ଡାଗ୍‌ଚେ ମେଁ ପାର୍‌ତନା ଡିଙ୍ଗ୍‌କେ । 13 ପେ ନ୍‌ସା ବାରି ଲାଓଦିକିଆ ବାରି ହିଏରାପଲି ରେମୁଆଁଇଂ ନ୍‌ସା ମେଁ ଡିଙ୍ଗ୍‌ବକ୍ନେ ଜାବର୍ କସ୍ଟ ବିସୟ୍‌ରେ ନେଙ୍ଗ୍ ନିଜେ ସାକି ବିଃଣ୍ଡିଂ । 14 ✝ନିଜର୍‌ ଗଦାର୍‌ ଲୁକ୍‌ ବାରି ଦୀମ ଆପେକେ ସାର୍ଲଡିଂଆର୍‌କେ ।

15 ଲାଓଦିକିଆନେ ବୟାଁ ବାରି ତନାଇଂକେ ତନା ନୁମଫା ବାରି ମେଁନେ ଡୁଆ ମୁଇଂଅରିଆ ରାଃସିଙ୍ଗ୍‌କ୍ନେ ମଣ୍ଡଲିନେ ସାପାରେକେ ନେ ସାର୍‌ଲନେ ଆଃଅଁପା । 16 ପେ ଏନ୍ ଉଲିଆ ପଡ଼େ ଆଡାକ୍ନେ ଇଡ଼ିଙ୍ଗ୍ ଲାଓଦିକିଆ ମଣ୍ଡଲିନ୍ନିଆ ଡିଗ୍ ଡିରକମ୍ ଏନ୍‌ ପଡ଼େ ୟା ଆର୍‌ଏ ଆତେନ୍‌ ନିଅମ୍‌ ଡିଙ୍ଗ୍‌ପା । ଲାଓଦିକିଆ ମଣ୍ଡଲିନେ ବୟାଁଇଂ ପେନେ ଡାଗ୍ରା ଆଣ୍ଡିନେ ଉଲିଆ ବେଆର୍‌ଏ ଆତେନ୍‌ ଡିଗ୍ ପଡ଼େପା । 17 ✝ବାରି ଆର୍ଖିପାକେ ପେବାସଙ୍ଗ୍‌ଏ "ମାପ୍‌ରୁନେ ସେବା ଡିଙ୍ଗ୍‌ନେସା ଆପେକେ ଆଣ୍ଡିନେ ଦାଇତ୍‌ ବିବ ଆର୍‌କେ ଆତେନ୍‌ ଡିଲାଡିଗ୍‌ ଆଡା ବିଃପା ।"

18 ନେଙ୍ଗ୍ ପାଉଲ୍ ନେଙ୍ଗ୍‌ନେ ନିଜର୍ ନ୍ତିନ୍ନିଆ ଏନ୍‌ ସାର୍‌ଲନେ ଗୁଆର୍‌ଣ୍ଡିଙ୍ଗ୍‌ । ନେଙ୍ଗ୍‌ନେ ବନ୍ଦି ଡୁଆନ୍ନିଆ ଲେଃକ୍ନେ ଅବସ୍ତାକେ ଆଆବଗ୍‌ପା ।

ଇସ୍‌ପର୍‌ନେ ଅନୁଗ୍ର‍ଅ ପେ ସାପାରେନେ ଡାଗ୍ରା ଲାଃଲେ ।