ጌሻ አያና እሞታነ ኡንቱንቱ ማዱዋ
1 ሲቁዋ ካልተ። አያና እሞታካ ሎይ ኮይተ። ሽን ኡባፐ አደ፥ ናበተ ኮይተ። 2 አያዉ ጎፐ፥ ዱማ ዱማ ቃላን ሃሳይያ ኡራይ ጾሳዉ ሃሳዬፐ አትን፥ አሳዉ ሃሳየና። አያዉ ጎፐ፥ እ ሃሳይያዋ ኦንነ አኬከና። ሽን አሳዉ ቆንጭቤና የዉዋ አያና ዎልቃን ሃሳዬ። 3 ሽን ናቢ አሳ ማዳናዉ፥ ዞራናዉነ ምንሳናዉ አሳዉ ሃሳዬ። 4 ዱማ ዱማ ቃላን ሃሳይያ ኡራይ ባረና ማዴ። ሽን ናቢ ዎሳ ጎልያ ማዴ።
5 ህንተንቱ ኡባይ ዱማ ዱማ ቃላን ሀሳያናዋ ታን ዶሳይ። ሽን ናበተ ሄዋፐ አደ ዶሳይ። አያዉ ጎፐ፥ ዱማ ዱማ ቃላን ሃሳይያዌ ሄ ሃሳዬዳዋ ዎሳ ጎልያ ማዳናዉ ብልያ አሳይ ዮፐ፥ ዱማ ዱማ ቃላን ሃሳይያዋፐ ናበተይ አ።
6 ሽን ታናዳን አማንያዋንቶ፥ ሀእ ታን ህንተንቱኮ ባደ፥ ዱማ ዱማ ቃላን ሃሳያደ፥ ሳጻን ዎይ ኤራተን ዎይ ናበተን ዎይ ታማርስያዋን ህንተንቶ ኦዳና ዮፐ፥ ታን ህንተንታ አያ ማዳይታ? 7 ሀራይ አቶ፥ ሸምፑ ባይናባይ ሱሱልያ ግድና ዎይ ዲ ግድና ካኢደ፥ ባረ ካሳ ዱማተ ኤርሳና ዮፐ፥ ሱሱልያ ፑኖፐነ፥ ዎይ ዲ ዲጾፐ፥ አሳይ ዎቲደ ኤራኔ? 8 ቃይ ጹሩምባ ዋሱ ሎይ ኤረታና ዮፐ፥ ኦላዉ ኦኔ ጊገታናዌ? 9 ሀዋዳንካ፥ ቃይ ዱማ ዱማ ቃላን ህንተ ሃሳይያዌ ቆንጨ ግደናን ዮፐ፥ ህንተ ሃሳይያዋ አሳይ ዎት አኬካኔ? አያዉ ጎፐ፥ ጫርኮ ህንተ ሃሳዪታ።
10 ሀ አላምያን ጮራ ቃላይ ደኤ፤ ሽን ብለይ ባይና ቃላይ እቱነ ባዋ። 11 ሽን እት አሳይ ሃሳይያ ቃላ ታን ኤራና ዮፐ፥ ሄ ሃሳይያዌ ታዉ እማ ግዴ፤ ታንካ አዉ እማ ግዳይ። 12 ሀዋዳንካ፥ ቃይ ጌሻ አያና እሞታ ህንተ አካናዉ ሎይ ኮይያዋንታ ግድያ ድራዉ፥ ዎሳ ጎልያ ድቻናዉ ማዳዋ ኡባባፐ አደ ኮይተ።
13 ሄዋ ድራዉ፥ ዱማ ዱማ ቃላን ሃሳይያዌ ባረ ሃሳዬዳዋ ብላናዉ ዳንዳያና ማላ፥ ጾሳ ዎሶ። 14 አያዉ ጎፐ፥ ታን ዱማ ዱማ ቃላን ጾሳ ዎሶፐ፥ ታ አያናይካ ዎሴ፤ ሽን ታ ጋርሳ ቆፋይ አይነ ጎኤተና። 15 ያትና፥ ታን ዎቶ? ታን ታ አያናን ጾሳ ዎሳና፤ ቃይ ታ ቆፋንካ ጾሳ ዎሳና። ታ አያናን የጻና፤ ቃይ ታ ቆፋንካ የጻና። 16 ሄዋ ግዳና ዮፐ፥ ኔን ነ አያና ጻላላን ጾሳ ጋላትያዋ ግዶፐ፥ ሄ ሳኣን ኔን ግያዋ ኤረና አሳይ ኔን ጾሳ ጋላትያዋ ኤረናን፥ ኔን ጋላቴዳዋን ዎቲደ፥ "አመንእ" ጋኔ? 17 ኔን ጾሳ ጋላትያዌ ሎአ፤ ሽን ሄዌ የኮ ብታንያ ማደና።
18 ታን ዱማ ዱማ ቃላን ህንተ ኡባፐ አደ ሃሳይያ ድራዉ፥ ጾሳ ጋላታይ። 19 ሽን ታን ዎሳ ጎለን ሀራቱዋ ታማርሳናዉ ዱማ ዱማ ቃላን ታሙ ሻአ ቃላቱዋ ሃሳይያዋፐ እቼሹ ቃላቱዋ ታ ዎዛና ቆፋን ሃሳያናዉ ዶሳይ።
20 ታናዳን አማንያዋንቶ፥ ህንተ ኢታ የዉዋን ጉ ናና ማላ ግዳናፐ አትን፥ ቆፋን ጉ ናና ማላ ግዶፕተ፤ ህንተ ጋርሳ ቆፋን ዎዛናማቱዋ ግድተ። 21 ጾሳ ማጻፋን፥
"ጎዳይ፥ ‘ታን ሀ አሳዉ፥
ዱማ ዱማ ቃላን ሃሳይያ አሳንነ፥
እማቱዋ ዶናን ሃሳያና።
ሽን ሄዋንካ፥
ታን ግያዋ ኡንቱንቱ ስስክኖ’ ያጌ"
ጌተቲደ ጻፈቴዳ።14:21 ኢሳ. 28:11-12
22 ስም ዱማ ዱማ ቃላን ሃሳይያዌ አማነናዋንቶ ማላታ ግድያዋፐ አትን፥ አማንያዋንቶ ማላታ ግደና። ቃይ ናባቱዋፐ ሃሳየትያዌ አማንያዋንቶ ማላታ ግድያዋፐ አትን፥ አማነናዋንቶ ማላታ ግደና።
23 ሄዋ ድራዉ፥ አማንያ አሳይ ኡባይ እትፐ ሺቂደ፥ ቃይ ኡባይካ ዱማ ዱማ ቃላን ሃሳዮፐ፥ ታማርቤና አሳይ ዎይ አማነና አሳይ ገሊደ፥ ህንተንታ ኡባ፥ "ጎዪታ" ጌኔ? 24 ሽን ታማርቤና አሳይ ዎይ አማነና አሳይ ዎሳ ጎለ ገልያ ዎደ፥ አሳይ ኡባይ ትምቢትያ ኦዶፐ፥ እ ባረ ስስያዋን ባረ ናጋራ አኬኬ። ቃይ ሄ ስሴዳባ ኡባንካ እ ፕርደታና። 25 አ ዎዛናን ጌሜዳ ቆፋይካ ቆንጫና። ሀዋዳንካ ቃይ፥ "ጾሳይ ቱሙ ህንተ ግዶን ደኤ" ያጊደ ማርካቲደ፥ ጉፋኒደ ጾሳዉ ጎይናና።
አሳይ እትፐ ዎስያ ዎደ ደአናዉ በስያ ዎጋ
26 ስም ታናዳን አማንያዋንቶ፥ አዬ? ህንተንቱ እትፐ ሺቅያ ዎደ፥ ሁጲያን ሁጲያን፥ እቶ ማዝሙሪ ደኤ፤ እቶ ታማርስያዌ ደኤ፤ እቶ ሳጻይ ደኤ፤ ቃይ እቶ ዱማ ዱማ ቃላን ሃሳይያዌ ደኤ፤ እቶ ብልያዌ ደኤ። ኡባይካ ዎሳ ጎልያ ማድያዋ ግዳናዉ በሴ። 27 ኦንነ ዱማ ዱማ ቃላን ሃሳዮፐ፥ ላኡ ግዲደ፥ ዎይ ዳሮፐ ሄዙ ግዲደ፥ ካላን ካላን ሃሳያናዉ በሴ። ቃይ ሀራ እቱ ኡንቱንቱ ሃሳዬዳዋ ብሎ። 28 ሽን ብልያ አሳይ ዮፐ፥ ዱማ ዱማ ቃላን ሃሳይያዌ ዎሳ ጎልያን ጮኡ ጎ። ባረ ሁጰዉነ ጾሳዉ ሃሳዮ።
29 ናባቱካ ላኡ ግዲደ ዎይ ሄዙ ግዲደ ሃሳይኖ። ቃይ ሀራንቱ ኡንቱንቱ ግያዋ ሻክኖ። 30 ሽን ጾሳይ ሄ ሳኣን ኡቴዳ ሀራዉ እትባ ቆንጭሶፐ፥ ካሰና ሃሳይያዌ ጮኡ ጎ። 31 አያዉ ጎፐ፥ ኡባይ ታማራና ማላነ ኡባይ ምናና ማላ፥ ካላን ካላን ትምቢትያ ኦዳናዉ ዳንዳዪታ። 32 ትምቢትያ ኦድያዋንቱ እሞታይ ኡንቱንቶ አዛዘቴ። 33 አያዉ ጎፐ፥ ጾሳይ ሳሮተ ጾሳፐ አትን፥ ጫቡዋ ጾሳ ግደና።
ጌሻቱ ዎሳ ጎለቱዋ ኡባን፥ 34 ማጫዋንቱ ሺቁዋ ጋርሳን ጮኡ ጊኖ። አያዉ ጎፐ፥ አይሁዳቱዋ ህጊ ግያዋዳንካ ኡንቱንቱ ሞደታናፐ አትን፥ ሺቁዋ ጋርሳን ሃሳያናዉ ኡንቱንቶ ማት ባዋ። 35 ማጫዋንቱ ሺቁዋ ጋርሳን ሃሳይያዌ ፖኮ ግድያ ድራዉ፥ አየንቶ ኤራናዉ ኮዮፐነ ሶይን ባረንቱ አስና ኦችኖ።
36 ጾሳ ቃላይ ኮይሮ ህንተፐ ዬዴ? ዎይ ህንተ ጻላላኮ ዬዴ? 37 ኦንነ ባረና ናብያ ዎይ ጾሳ አያናይ ደእያ አሳ ያጊደ ቆፖፐ፥ ታን ህንተንቶ ጻፍያዌ ጎዳ አዛዙዋ ግድያዋ አኬኮ። 38 ሽን ኦንነ አኬካና ዮፐ፥ አኬኮፖ ባሽ አጎ።
39 ሄዋ ድራዉ፥ ታናዳን አማንያዋንቶ፥ ትምቢትያ ኦዳናዉ ሎይ አሞትተ። ቃይ ዱማ ዱማ ቃላን ሃሳይያዋካ ድጎፕተ። 40 ሽን ኡባባይካ ዎጋንነ ማራን ሀኖ።