አማንያ አሳ ግዶን ኦሰቴዳ ፖኮባ
1 ህንተንቱ ግዶን ፖኮ ዎሹማ ኦሱ ደእያዌ ዝግረቴ፤ ሄዋ ማላ ፖኮ ዎሹማ ኦሱ ሀራይ አቶ፥ ጾሳ አማነና አሳ ግዶንነ ባዋ። አያዉ ጎፐ፥ ባረ አዉዋ ማቻቶ አኬዳ አሳይ ደኤ።5:1 ዛረ. 22:30 2 ህንተንቱካ ኦቶረቴድታ። ሄዋፐ ህንተ ካዮታናዉ በሰኔ? ሄዋ ማላ ፖኮ ኦሱዋ ኦዳ ብታኒ ህንተ ግዶፐ ክቻናዉ በሴ።
3,4 አያ ግድናካ ታን ታ አሳተን ህንተንቱና ደኤናን ዮፐካ፥ አያናን ህንተንቱና ደአይ። ሀእ ህንተንቱና ደእያዋዳን ሀናደ፥ ሄዋ ማላ ኦሱዋ ኦዳ ብታንያ ቦላ ኑ ጎዳ የሱስ ክርስቶሳ ሱንን ፕርዳድጋድ። ህንተንቱነ ታ አያናይ ኑ ጎዳ የሱስ ክርስቶሳ ዎልቃና እትፐ ሺቂደ፥ 5 ሄ ብታንያ አያናይ ጎዳ የሱስ ፕርዳዉ ይያ ጋላሳን አታና ማላ፥ ናጋራን ኩሜዳ አ ቦላ ኮላናዳን ሴጻናዉ ህንተ እማናዳን፥ ታን ፕርዳድ።
6 ህንተንቱ ጬቁ ሎአ ግደና። ጉ እርሹ ሙናቃ ኡባ ደንያዋ ኤርክቴ? 7 ህንተንቱ ኦራ ግዳና ማላ፥ ናጋራ እርሹ ጫሌዳዋ ከስተ። ህንተንቱ እርሹ ባይና ሙናቃ ማላ። አያዉ ጎፐ፥ ኑ ፓስጋ ዶርሳይ፥ ክርስቶስ ያርሸቴዳ።5:7 ከሳ 12:5 8 ሄዋ ድራዉ፥ ኑን ኡክ ባላ ሱረተንነ ቱማተን ቦንቻናፐ አትን፥ ጫላ እርሹዋን፥ ኢታተ እርሹዋንነ ጌላተ እርሹዋን ቦንቾኮ።5:8 ከሳ 13:7፤ ዛረ. 16:3
9 ዎሹማናዉ ቆፕያዋንቱና ህንተ እትፐ ጋይተና ማላ፥ ህንተንቶ ዳብዳቢያ ጻፋድ።5:9 ዳብዳቢያ ጻፋድ፦ ሀዋ ጻፋናፐ ካሰና ጳዉሎስ ቆሮንቶሳ አሳዉ ጻፌዳ ሀራ ቆንጭያን ኤረትቤና ዳብዳቢ ደኤ ጉሳ። 10 ታን ግያዌ ሀ አላምያን ደእያ ዎሹማናዉ ቆፕያዋንቱፐ ዎይ ዮራትያዋንቱፐ፥ ካይሶትያዋንቱፐነ ዎይ ኤቃዉ ጎይንያዋንቱፐ ኡባካ ሻከታና ማላ ግደና። ሄዋ ግዶፐ፥ ሀ አላምያፐ ህንተ ሻከት ባናዉ በሴ ጉሳ። 11 ሽን እሻቱዋ ሀእ ጌተትያዋንቱፐ እቱነ ዎሹማናዉ ቆፕያዋንቱ ዎይ ሚሻዉ ዮራትያዋንቱ ዎይ ኤቃዉ ጎይንያዋንቱ ዎይ አሳ ሱን ባይዝያዋንቱ ዎይ ማትያዋንቱ ዎይ ዉእያዋንቱና ህንተንቱ እትፐተ ኦና ማላ፥ ታን ህንተንቶ ጻፋድ። ሄዋንቱ ማላና ሀራይ አቶ፥ ቁማካ እትፐ ሞፕተ።
12 አያዉ ጎፐ፥ ዎሳ ጎለፐ ካረና ደእያዋንቱ ቦላ ፕርዳናዉ ታና አዬ ጋ? ህንተንቱ ግዶን ዎሳ ጎለን ደእያዋንቱ ቦላን ህንተ ፕርድክቴየ? 13 ሽን ካረና ደእያዋንቱ ቦላን ጾሳይ ፕርዳና። ሄ ኢታባ ኦያ ኡራ ህንተ ግዶፐ ከስ ድግተ።5:13 ዛረ. 13:5፤ 17:7