1 ጾሳ አሳቶ ሚሻ ሺሻናዉ ጋላትያን ደእያ አማንያ አሳቶ ታን ቃላ ገሌዳዋዳን፥ ህንተንቱካ ቃይ ሄዋዳን ኦተ። 2 ህንተንቱ ታን ያ ብያ ዎደ፥ ሚሻ ሺሸና ማላ፥ ህንተ ኡባይ ዎጋ ጋላስ ጋላስ፥ ህንተ ደምያ ኬናፐ ህንተ ጎለን ዳጋይተ። 3 ታን ያ ጋክያ ዎደ፥ ህንተ አማንያ አሳ ኦና ግዶፐነ፥ ህንተ እሜዳዋ ጋና ማላ፥ ዳብዳቢያና ኡንቱንታ የሩሳላመ ኪታና። 4 ቃይ ታን ኡንቱንቱና ባናዉ ኮሾፐ፥ ኡንቱንቱ ታናና እትፐ ባናዋንታ።

5 ታን ማቅዶንያና አአደ፥ ህንተንቱኮ ባና፤ አያዉ ጎፐ፥ ታን ማቅዶንያና አይ። 6 ታን ብያሳ ሀቃ ግዶፐነ፥ ታ ቡሳን ህንተ ታና ማዳና ማላ፥ ህንተ ማታን አማሬዳ ዎድያ ጋምኤናን አግከ። ዎይ ባልጉዋካ ህንተ ማታን ሻጨናን ዋያ አጋና። 7 አያዉ ጎፐ፥ ታን ሀእ ያና አአደ ሄ ኦግያና ህንተንታ በአናዉ ኮይከ። ጎዳይ ጎፐ፥ ህንተ ማታን አማሬዳ ዎድያ ታካናዉ ቆፓይ።

8 ሽን ታን ጰንጸቆስተ ግያ ጋላሳይ ጋካናዉ ኤፈሶነን ጋምአና። 9 ታዉ ኦሱ ኩሜዳ አኮ ፐንጊካ ያን ዶየቴዳ። ቃይ ታዉ ጮራ ሞርከቱ ደኢኖ።

10 ጽሞቶሰ ህንተንቱኮ ዮፐ፥ ህንተ ማታን እ ያየናን ደአናዳን፥ አ ሎይ ኦይቂተ። አያዉ ጎፐ፥ እካ ቃይ ጎዳ ኦሱዋ ኦ። 11 ሄዋ ድራዉ፥ ኦንነ አ ካፖ። ሽን እ ታኮ ሳሮ ስማና ማላ፥ አ ማዲደ ሳሮተን ሞይዝተ። አያዉ ጎፐ፥ ታን እ እሻቱዋና ስማናዋ ናጋ ኡታድ።

12 ሽን ኑ እሻ አጲሎስ የኮ እሻቱዋና ህንተንቱኮ ባና ማላ፥ ታን አ ምንሳ ዎሳድ። ሽን ሀእ ህንተንቱኮ ባናዉ ኮይቤና፤ እ ባረዉ ሚክያ ዎደ ህንተንቱኮ ባናዋ።

13 ቤጎትተ። አማኑዋን ምን ኤቂተ። ጻልተ። ጎብተ። 14 ኦሱዋ ኡባ ሲቁዋን ኦተ።

15,16 ታናዳን አማንያዋንቶ፥ እስጽፋኖስነ አ ሶይ አሳይ ግሪከን ኮይሮ አማኔዳዋንታ ግድያዋነ ጾሳ አሳቶ ኦናዉ ባረንታ እሜዳዋ ህንተ ኤሪታ። ህንተንቱካ ኡንቱንቱ ማላ አሳዉነ፥ ኡንቱንቱና ኦያ ኡባዉ ዳቡርያ ኡባዉ ኤኖ ጋናዳን፥ ታን ህንተንታ ዎሳይ።

17 እስጽፋኖስ፥ ፓርዶናጽስነ አካይቆስ ህንተ ባይናሳን ታና ቦራስስቤና ድራዉ፥ ኡንቱንቱ ዩሳን ታን ናሸታይ። 18 ኡንቱንቱ ህንተንታ አያናን ምንሴዳዋዳን፥ ታናካ አያናን ምንሴዳ ድራዉ፥ ሄዋንቱ ማላ አሳቱዋ ዶጎፕተ።

19 ኢስያን ደእያ አማንያ አሳይ ህንተንታ፥ "ሳሬ፥ ሎኤ" ጊኖ። አቂላይነ ጵርስቂላ ባረንቱ ሶይን ሺቅያ ዎሳ ጎለ አሳናካ ህንተንቶ ጎዳ ሳሮታ ዎዛናፐ ኪቲኖ። 20 እሻቱ ኡባይ ህንተንቶ ሳሮታ ኪቲኖ።

እቱ እቱዋና ጌሻ የረታ የረቲደ ሳሮተትተ። 21 ታን ጳዉሎስ ሀ ሳሮታ ታ ኩሽያን ጻፋድ።

22 ጎዳ የሱስ ክርስቶሳ ሲቀና አሳይ ደኦፐ፥ እ ሸቀቴዳዋ ግዶ። ኑ ጎዳዉ፥ ሃያ።

23 ጎዳ የሱስ ክርስቶሳ አ ኬካተይ ህንተንቱና ግዶ።

24 ክርስቶሳ የሱሳን ደእያ ህንተንቱ ኡባና ታ ሲቁ ግዶ። አመንእ።