1 Coríntios 4

ክርስቶሳ ካልያዋንታ

1 አሳይ ኑና ክርስቶሳዉ ኦያዋንቱዳንነ ጾሳ ጎለን ደእያ ጹራ ናግያ አሳዳን ቆፖ። 2 ያቲደ ሄ አሳቱ ባረንቱ ጎዳዉ አማነቴዳዋንታ ግዲደ፥ ቤታናዉ ኮሼ። 3 ሽን ህንተ ዎይ ሀራይ ታ ቦላ ፕርዶፐ፥ አይነ ግደና። ሀራይ አቶ፥ ታንካ ታ ሁጲያን ፕርድከ። 4 አያዉ ጎፐ፥ ታን ታ ሁጲያን አያኔካ ኤርያባይ ባዋ፤ ሽን ታና ሄዌ ጽልሰና። ታና ፕርድያዌ ጎዳ። 5 ሄዋ ድራዉ፥ ጎዳይ ማን ጌሜዳባ ፖኡዋ ከስያዌ፥ ዎዛና ቆፋ ቆንጭስያዌ ያና ዎዲ ጋካናዉ ኦ ቦላንነ ኦናነ ፕርዶፕተ። ሄ ዎደ፥ አሳይ ኡባይ ሁጲያን ሁጲያን ጾሳፐ ሳባ ደማናዋ።

6 ታናዳን አማንያዋንቶ፥ ህንተንቱፐ ኦንነ እቱ ታማርስያዋ ሳቢደ፥ ሀራይ ታማርስያዋ ቦረና ማላ፥ "ጾሳ ማጻፋን ጻፈቴዳዋ ቦንቻ" ያግያዋ ህንተ ኑናና ታማራና ማላ፥ ህንተ ድራዉ፥ ታባነ አጲሎሳባ ሌምሱዋዳን ኦዳድ። 7 አያዉ ጎፐ፥ ሀራቱዋፐ ኔና ኦኔ ቂሴዳዌ? ኔን ጾሳፐ አካቤናባይ ነዉ አዬ ደእያዌ? ያትና፥ ኔን አኬዳዋ ግዶፐ፥ አያዉ አካቤናዋዳን ጬቀታይ?

8 ሀእ ህንተ ካሌድታ። ሀእ ዱረቴድታ። ኑን ባይናን ህንተረካ ካዉቴድታ። ኑንካ ህንተንቱና ካተታናዳን፥ ህንተ ካዉቴድተንቶ ሎአ ሽን። 9 አያዉ ጎፐ፥ ታዉ ማላትያዋዳን፥ ኑን ሀ ሳአዉ፥ ኪታንቻቶነ አሳዉ ካሳ ግዴዳ ድራዉ፥ ጾሳይ ኑና የሱስ ኪቴዳዋንታ ሀይቆ ፕርደቴዳ አሳዳን፥ ኡባፐ ዉርሰ ኦዳ።

10 ኑን ክርስቶሳ ድራዉ ኤያ፥ ሽን ህንተ ክርስቶሳን አዳ ኤራንቻ። ኑን ዳቡራንቻ፥ ሽን ህንተ ምና። ህንተንቱ ቦንቼቴዳዋንታ፥ ሽን ኑን ቶሸቴዳዋንታ። 11 ሀ ዎዲ ጋካናዉ፥ ኑን ኮሻቴቶ፤ ሳመቴቶ፤ ካሎቴቶ፤ ደሸቴቶ። ቃይ ደእያ ሳኣ ዪደ ዩዬቶ። 12 ኑን ኑ ኩሽያን ኦደ ዳቡሬቶ። ኑና አሳይ ሸቂያ ዎደ፥ አንጄቶ። ኑና የደርስ ዩይያ ዎደካ ዳንዳዬቶ። 13 ኑ ቦላ ኢታባ ሃሳይያ ዎደ፥ ኑን ሎኦ ቃላ ዛሬቶ። ኑን ሀዋ ጋካናስካ፥ ሀ ሳኣ ፕቱዋነ ኡባባ ቡራ ግዴዶ።

14 ታን ታ ሲቅያ ናናዳን፥ ህንተንታ ሴራናዉ ሀዋ ጻፋድፐ አትን፥ ዬላያናዉ ጻፋበይከ። 15 አያዉ ጎፐ፥ ክርስቶሳን ህንተንታ ድችያ ታሙ ሻአ አሳይ ህንተንቶ ደኦፐካ፥ ህንተንቶ እት አዉዋፐ ሀራይ ባዋ። አያዉ ጎፐ፥ ታን ምሽራቹዋ ቃላ ህንተንቶ አሄዳዋዳን፥ ክርስቶሳ የሱሳን ህንተንቶ አዉዋ ግዳድ። 16 ስም ታናዳን ሀንተ ያጋደ ህንተንታ ዎሳይ። 17 ሄዋ ድራዉ፥ ጎዳን አማነቴዳ ታ ሲቅያ ታ ናኣ ጽሞቶሳ ህንተንቱኮ ኪታድ። እ ኡባ ሳኣን ደእያ አማንያ አሳ ኡባዉ ታን ታማርስያ ክርስቶሳ የሱሳን ደእያ ታ ኦግያ ህንተንታ ሀሳይሳናዋ።

18 ታን ህንተንታ በአናዉ ህንተንቱኮ ዬናባ ማላትና፥ ኦቶረትያ እት እት አሳቱ ደኢኖ። 19 ሽን ጎዳይ ጎፐ፥ ታን ህንተንቱኮ ኤለካ ባደ ሄ ኦቶረትያ አሳቶ ሃሳያ ግደናን፥ ኡንቱንቱ ዎልቃ ኤራና። 20 አያዉ ጎፐ፥ ጾሳ ካዉተይ ጾሳ ዎልቃናፐ አትን፥ ሃሳያና ግደና። 21 ታን ህንተንቱኮ ሙርያ ጻምኣና ዮየ ዎይ ሲቁዋናነ አሽከ አያናና ዮ? ሀቃዋ ዶሪቴ?