1 ኦከቴዳ ክርስቶሳ ያጊደ፥ የሱሳ አማንያ ኡባይ ጾሳ ናና፤ ቃይ ጾሳ አዉዋ ሲቅያ ኦንነ አ ናናቱዋካ ሲቄ። 2 ኑን ጾሳ ሲቅያዋንነ አ አዛዙዋ ናግያዋን፥ ጾሳ ናናቱዋ ሲቅያዋ ኤሬቶ። 3 አያዉ ጎፐ፥ ኑን ጾሳ ሲቅያዌ አ አዛዙዋ ናግያዋ፤ አ አዛዙካ ዴጾ ግደና። 4 አያዉ ጎፐ፥ ጾሳ ናኣ ግድያ ኦንነ ሀ አላምያ ጾናናዉ ዳንዳዬ፤ ኑንካ ሀ አላምያ ጾናናዌ ኑ አማኑዋና። 5 ሀ አላምያ ጾናናዉ ዳንዳይያዌ ኦኔ? የሱስ ጾሳ ናኣ ግድያዋ አማንያዋ ጻላላይ ጾናና።

6 ጽንቃታ ሃናነ ሀይቁዋ ሱና ዬዳዌ ሀዋ፤ እካ የሱስ ክርስቶሳ፤ ሃናነ ሱና* እ ዬዳዋፐ አትን፥ ሃ ጻላላና ይቤና። ጌሻ አያናይ ቱማ ግድያ ድራዉ፥ ሄዌ ቱማ ግድያዋ እ ባረ ሁጰዉ ማርካቴ። 7 አያዉ ጎፐ፥ ሄዙ ማርካቱ ደኢኖ። 8 ሄዋንቱ፥ ጾሳ አያና፥ ሃነ ሱ፤ ሀ ሄዛቱ እቱ እቱዋዋ ጳልቂክኖ። 9 ኑን አሳይ ማርካትያዋ አማኖፐ፥ ጾሳይ ማርካትያዌ አሳዋፐ ሎይ አ፤ አያዉ ጎፐ፥ ጾሳይ ባረ ናኣባ ማርካቴዳ ማርካተይ ሀዋ። 10 ጾሳ ናኣ አማንያ ኡራ ዎዛናን ሀ ማርካተይ ደኤ። ጾሳ አማነና ኡራይ ኦንነ ጾሳይ ባረ ናአዉ ማርካቴዳ ማርካተ አማንቤና ድራዉ፥ ጾሳ ዎርዱዋ ጌ።

11 ስም ማርካተይ ሀዋ፤ ጾሳይ ኑዉ መና ደኡዋ እሜዳ፤ ሄዌካ አ ናኣን ደኤ። 12 ጾሳ ናአይ ደእያ ኦስነ ደኡ ደኤ፤ ጾሳ ናአይ ባይና ኦስነ ደኡ ባዋ።

13 ጾሳ ናኣ ሱንን አማንያ ህንተንቶ መና ደኡ ደእያዋ ህንተ ኤራና ማላ፥ ሀዋ ህንተንቶ ጻፋድ። 14 ጾሳይ ኮይያዋዳን፥ አይነ ኑን አ ዎሶፐ፥ እ ስስያዋ ኑን ኤርያ ድራዉ፥ አ ስንን ያዮኮ። 15 ኑን ዎስያ ኡባን እ ስስያዋ ኤሮፐ፥ ኑን አ ዎሴዳዋ እ ዛሬዳዋ ኤሬቶ።

16 ኦንነ ሀይቁ በሰና ናጋራ ባረ እሻይ ኦሽን በኦፐ፥ ጾሳ ዎሳናዉ በሴ፤ ሀይቁ በሰና ናጋራ ኦዳዋንቶ ጾሳይ ደኡዋ እማና። ሀይቁ በስያ ናጋራይ ደኤ፤ ታን ህንተና ሄዎ ጾሳ ዎስተ ጊከ። 17 ባይዞ ኦሱ ኡባይ ናጋራ፤ ሽን ሀይቁ በሰና ናጋራይ ደኤ።

18 ጾሳ ናናይ ኦንነ ናጋራ ኡባ ዎደ ኦናዋ ኑን ኤሬቶ። አያዉ ጎፐ፥ ጾሳ ናአይ ኡንቱንታ ናጌ፤ ቃይ ጻላህያ ካፑካ ኡንቱንታ ቆሀናዉ ዳንዳየና። 19 ኑን ጾሳዋንታ ግድያዋነ ሀ አላሚ ኡባይ ጻላህያ ካፑዋን ሞደቴዳዌ ኤሬቶ።

20 ኑን ቱሙ ጾሳ ኤራናዳን፥ ጾሳ ናአይ ዬዳዋነ ኑዉ አኬካ እሜዳዋ ኤሬቶ። ኑን ቱሙ ጾሳ ግዶን፥ አ ናኣ የሱስ ክርስቶሳ ግዶን ደኤቶ፤ እ ቱሙ ጾሳነ መና ደኡዋ።

21 ታ ናቶ፥ ኤቃቱዋፐ ህንተ ሁጲያ ናግተ።