1 ኑን ጳዉሎስ፥ ስላሰነ ጽሞቶስ ተሰሎንቀን ደእያ አማንያ አሳቶ ሀ ዳብዳቢያ ጻፌቶ፤ ሄዋንቱ ጾሳ ኑ አቡዋንቶነ ጎዳ የሱስ ክርስቶሳዋንቶ፥ አ ኬካተይነ ሳሮተይ ግዶ።✝

2 ኑን ዎሳን ጾሳ ጋላቲደ፥ ኡባ ዎደ ህንተና ኡባቱዋ ሀሳዬቶ። 3 ኑን ኑ ጾሳ፥ ኑ አዉዋ ስንን አማኑዋን ህንተንቱ ኦዳ ኦሱዋነ፥ ሲቁዋን ህንተንቱ ዳቡሬዳ ዳቡራ፥ ቃይ ኑ ጎዳ የሱስ ክርስቶሳን ህንተዉ ደእያ ህዶታን ገንጭያ ገንጩዋ ኡባ ዎደ ሀሳዬቶ።

4 ኑናዳን ጾሳ ካልያዋንቶ፥ ጾሳይ ህንተና ሲቅያዋነ ህንተና ባረዉ ናና ኦናዉ ዶሬዳዋ ኑን ኤሬቶ። 5 አያዉ ጎፐ፥ ኑን ዎንጋላ፥ ዎልቃን፥ ጌሻ አያናንነ ሄ ዎንገሊ ቱማ ግዴዳዋ ዉርስ አማንያዋን ህንተንቶ አሄዳዋፐ አትን፥ አሳ ቃላ ጻላላን አህበይኮ። ኑን ህንተናና ደእያ ዎደ፥ ህንተንቱ ድራዉ ዋን ደኤደንቶ፥ ህንተንቱ ኤሪታ። 6 ቃይ ህንተንቱ ዳሮ ዋየቶፐካ፥ ጌሻ አያናይ እሜዳ ናሸቻን ኪታ አኬድታ፤ ሄዋን ኑ ሌምሱዋነ ጎዳዋ ካሌድታ።✝ 7 ሄዋ ድራዉ፥ ማቅዶንያንነ አካይያ ግያ ጋድያን ደእያ አማንያ ኡባቶ ሌምሱዋ ግዴድታ። 8 አያዉ ጎፐ፥ ጎዳ ቃላይ ህንተፐ ከሲደ፥ ማቅዶንያንነ አካይያ ጻላላን ስሰትቤና፤ ሽን ጾሳ ህንተንቱ አማንያዌ ኡባ ሳን ስሰቴዳ። ስም ኑን ሃሳያናዉ ኮሽሽን አቶዌ አይነ ባዋ። 9 አያዉ ጎፐ፥ ኑን ህንተኮ ቤዳ ዎደ፥ ህንተንቱ ኑና ዎት ሞኬደንቶነ ቃይ ህንተንቱ ህንተንቱ ኤቃዉ ኦያዋ አጊደ፥ ዎርዶተና ደኡዋ ጾሳዉ ኦናዉ ዋን ጾሳኮ ስሜድተንቶ፥ ኡንቱንቱ ባረንቱ ሁጲያን ሃሳዪኖ። 10 ቃይ ጾሳ ናአይ የሱስ፥ ጾሳይ ሀይቁዋፐ ደንዳዌ፥ ኑና ስንፐ ያና ጾሳ ሀንቁዋፐ አሽያዌ ሳሉዋፐ ያናዋ ህንተንቱ ናግያዋ ኡንቱንቱ ሃሳዪኖ።