1 ኑናዳን ጾሳ ካልያዋንቶ፥ ኑን ህንተኮ ቤዳዌ መላ ግደናዋ ህንተንቱ ህንተንቱ ሁጰዉ ኤሪታ። 2 ሽን ኑን ህንተኮ ያናፐ ካሰ ፕልጵስዮሳ ግያ ካታማን ዋየቴዳዋነ ቦረቴዳዋ ህንተንቱ ኤሪታ፤ ዳሮ ጳልቀይ ደኦፐካ፥ ህንተንቶ አ ምሽራቹዋ ቃላ ኦዳና ማላ፥ ጾሳይ ኑዉ ምኖተ እሜዳ። 3 ኑን ህንተና ዎስያዌ ባሊደ ዎይ ቱናተን ዎይ ገንያን ግደና።

4 ሽን ጾሳይ ዎንጋላ ሀዳራ አካናዉ ኑን አማነትያዋንታ ግድና፥ ኑዉ ሄ ሀዳራ እሜዳ፤ ሄ እሜዳዋዳንካ ኑን ሃሳዬቶ። ቃይ ኑን ኑ ዎዛና ጾሞስያ ጾሳ ናሸችያዋዳን ሃሳዬቶፐ አትን፥ አሳ ናሸችያዋዳን ሃሳዮኮ። 5 ኑን ህንተኮ ጭምያ ሃሳያና፥ ዎይ ኑን ዮራ ገንያ ሀኖታን ይቤናዋ ህንተንቱ ሎይ ኤሪታ፤ ጾሳይካ ኑዉ ማርካ። 6 ኑን አሳፐ፥ ዎይ ህንተፐ፥ ዎይ ሀራንቱ ኦፐነካ ቦንቹዋ አካናዉ ኮይበይኮ። 7 ኑን ክርስቶስ ኪቴዳዋንታ ግዲደ፥ ቦንቹዋ ህንተንቱፐ ኦቻናዉ ዳንዳዬቶ። ሽን አታ ባረ ናናቱዋ ሲቁዋን ድችያዋዳን፥ ህንተንቱ ግዶን አሽከ ግዴዶ። 8 ህንተንቱ ኑዉ ዳሮ አልኦ ግዴዳ ድራዉ፥ ጾሳ ዎንጋላ ህንተንቶ እማናዋ ጻላላ ግደናን፥ ኑ ደኡዋካ ህንተንቶ እማናዉ ጊግ ኡቴዶ፤ አያዉ ጎፐ፥ ህንተና ኑን ሎይ ሲቄዶ። 9 ኑናዳን ጾሳ ካልያዋንቶ፥ ኑ ኦሱዋነ ኑ ዳቡራ ህንተንቱ አኬኪታ፤ ህንተንቶ ጾሳ ምሽራቹዋ ቃላ ኦዲደ፥ ህንተና አይነ ዋይሰና ማላ፥ ቃማነ ጋላስ ኑን ኦዶ።

10 ኑ ደኡ ህንተንቱ ማታን፥ አማንያዋንቱ ማታን፥ ጌሻ፥ ጽሎነ ቦረተናዋ ግድያዎ ህንተነ ጾሳይ ማርካ። 11 ኑን ህንተንቶ ሁጲያን ሁጲያን አዉ ባረ ናናዉ ሀንያዋዳን ሀኔዳዋ ኤሪታ። 12 ኑን ህንተና ዞሬዶ፤ መንዶነ ህንተንቶ ማርካቴዶ። ሄዌኔካ ህንተና ጼሴዳ ጾሳ ናሸችያ ደኡዋ ህንተንቱ ደአናዳናነ አ ካዉተነ አ ቦንቹዋ ገላናዳና።

13 ህንተ ኑፐ ጾሳ ቃላ ቱማ ግዴዳዋዳን አኬዳ ዎደ፥ ጾሳ ኪታዳን አኬዳዋፐ አትን፥ አሳ ኪታዳን አክቤና ድራዉ፥ ጾሳ ቃላይ አማንያ ህንተናን ኦ፤ ሄ ጋሱዋን ኑን ጾሳ ኡባ ዎደ ጋላቴቶ።

14 አያዉ ጎፐ፥ ኑናዳን ጾሳ ካልያዋንቶ፥ ክርስቶስ የሱሳን እቱዋ ግዴዳ ይሁዳ ግያ ጋድያን ደእያ አማንያዋንታ፥ ህንተንቱ ሌምሰቲታ፤ ሄዋንቱ ጾሳ አማንያዋንታ። አይሁዳቱ ኡንቱንታ ዋይሴዳዋዳን፥ ህንተንቱ ቢታ አሳይካ ህንተና ዋይሴዳ። 15 ሄ አይሁዳቱ ጎዳ የሱሳነ ናባቱዋ ዎድኖ፤ ቃይ ኑና የደርሴድኖ። ኡንቱንቱ ጾሳ ናሸችክኖ፤ አሳ ኡባካ እጺኖ። 16 አይሁዳ ግደና አሳይ አታና ማላ፥ ኑን ኡንቱንቶ ቃላ ኦድያዋ ድጊኖ። ቃይ ኡንቱንቱ ናጋራይካ ኡባ ዎደ ዳር ዳር ቤ። ሽን ዉርሰን ጾሳ ሀንቁ ኡንቱንቱ ቦላ ዎዳ።

17 ሽን ኑናዳን ጾሳ ካልያዋንቶ፥ ኑን ኑ ቆፋን ግደናዳን፥ አሳተ ጻላላን ህንተፐ ጉ ዎደዉ ሻከቴዳ ዎደ፥ ህንተና ዳሮ ላሞቲደ፥ አይፍያን በአናዉ ሎይ ኮዬዶ። 18 አያዉ ጎፐ፥ ኑን ህንተኮ ስሚደ ባናዉ ኮዬዶ። ኡባ ታን ጳዉሎስ ዛራ ዛራደ ህንተኮ ባናዉ ማላ በኣድ፤ ሽን ሴጻናይ ኑና ድጌዳ። 19 አያዉ ጎፐ፥ ኑ ጎዳ የሱስ ክርስቶስ ይያ ዎደ፥ ኑን በአና ጊደ ናሸቻን ናግያዌ፥ ዎይ ኑ ናሸቻይ፥ ዎይ ኑን ጬቀትያ ካላቻይ ኦኔ? ህንተና ግድክቴዬ? 20 አያዉ ጎፐ፥ ህንተንቱ ኑ ቦንቹዋነ ኑ ናሸቻ።