1 ታን ጳዉሎስ፥ ህንተ፥ "እ ኑናና ደእያ ዎደ አሽከ" ግያዌ፥ ቃይ፥ "ኑፐ ሃክ ደእያ ዎደ ኑ ቦላ ጻሌ" ግያዌ፥ ሎአነ አሽከ ግዴዳ ክርስቶሳ ባጋና ህንተና ዎሳይ። 2 ኑና ሀ ሳኣ ዶያዳን ደኢኖ ጊደ ቆፕያ እት እት አሳቱዋ ቦላ ታን ጻላናዋ ኤራይ፤ ሽን ታን ህንተኮ ብያ ዎደ ህንተ ታና ጻልሰና ማላ፥ ህንተና ዎሳይ። 3 አያዉ ጎፐ፥ ኑን ሀ ሳኣን ደኦፐካ፥ ሀ ሳኣ አሳዳን ኦለቶኮ። 4,5 አያዉ ጎፐ፥ ኑን ኦለትያ ቶራይ ሀ ሳኣዋ ግደና። ሽን ጌሱዋ ላላናዉ ዎልቃና ደእያ ጾሳ ቶራ። ኑን አሳ ቆፋ ይሴቶ፤ ቃይ ጾሳ ኤራተ ቦላ ደንዲደ ቢያ ኦቶሮ ቆፋ ኡባ ላሌቶ። ሄ ቆፋ ኡባይ ክርስቶሳዉ አዛዘታና ማላ ኦሞዴቶ። 6 ህንተ አዛዘትያዋ ፖሌዳዋፐ ጉይያን፥ አዛዘተናን እጽያዋ ኡባ ኑን ሙራናዉ ጊገታና።

7 ህንተ ስንን ደእያዋ ጼልተ፤ ኦንነ ባረና ክርስቶሳዋ ጊደ ቆፖፐ፥ ሄዋ ጉጅ ቆፖ፤ ክርስቶሳዋ እ ግዴዳዋዳን፥ ኑንካ ቃይ አዋ። 8 አያዉ ጎፐ፥ ጎዳይ ኑዉ እሜዳ ኑ አዎተን ታን ሎይ ኦቶረትያዋ ግዶፐካ፥ ሄዋን ዬላትከ፤ ሄ ኑዉ እሜዳ አዎተይ ህንተና ኬጻናሳፐ አትን፥ ኮላናሳ ግደና። 9 ታን ታ ዳብዳቢያን ህንተና ያሽሳናዉ ጻፎ አሳ ማላታደ ቤታናዉ ኮይከ። 10 አያዉ ጎፐ፥ እት እት አሳይ፥ "ጳዉሎሳ ዳብዳቢ ዴጾነ ዎልቃማ፤ ሽን ጼልያ ዎደ እ ዳቡራንቻ፤ አ ሃሳያይካ ፓና" ያጌ። 11 ሄዋ ማላ አሳይ ኑን ሃኩዋን ደኢደ ጻፍያ ዳብዳቢያንነ ያን ህንተናና ደኢደ ኦያ ኦሱዋን ዱማተ ባይናዋ አኬካና ኮሼ።

12 ኑን ባረና ናሽያ እት እት አሳቱዋና ኑና ፓይዳናዉ ዎይ ልክሳናዉ ኮዮኮ፤ ሽን ኡንቱንቱ ባረና እቱ እቱዋና ልክሲድነ ቃይ ባረና እቱ እቱዋና ቃራዪደ፥ ኡባና ኤዬድኖ።

13 ሽን ኑን ጾሳይ ኑዉ ኤሴዳ ዛዋ ግዶን ጬቀትያዋፐ አትን፥ ሄ ዛዋፐ ፕኒደ ጬቀቶኮ፤ ሄ ዛዋይ ህንተኮካ ጋኬ። 14 ኑን ህንተኮ ጋክቤናዋ ማላቲደ፥ ዛዋ ፕኖኮ፤ አያዉ ጎፐ፥ ኑን ክርስቶሳ ምሽራቹዋ ቃላ ኦዲደ፥ ህንተኮ ካሰ ጋኬዶ። 15 ኑን ጾሳይ ኤሴዳ ዛዋ ፕኒደ፥ ሀራ አሳይ ኦዳ ኦሱዋን ጬቀቶኮ፤ ሽን ህንተ አማኑ ድጭ ድጭ ብያ ዎደ፥ ኑን ህንተ ግዶን ኦያ ኦሱዋ ዛዋይ ካሰዋፐ ሎይ አክ አክ ባናዋ ጊደ ቆፔቶ። 16 ኑን ምሽራቹዋ ቃላ ህንተ ደኢያሳፐ ህን ባጋን ኦዳና፤ ቃይ ሀራ ዛዋን ኦሰት ድጌዳ ኦሱዋንካ ጬቀቶኮ። 17 ሽን ጾሳ ማጻፋይ፥

"ጬቀትያ ኡራይ ኦንነ

ጎዳ ሎኦተባን ጬቀቶ"

ያጌ።✝ 18 አያዉ ጎፐ፥ ጎዳይ ናሽያ ኡራፐ አትን፥ ባረና ናሽያ ኡራይ ጋላተተና።