ሚልክያሳ 1

ጎዳይ እስራኤልያዉ ደእያ ቃላ ጫቁዋ ሲቁ ሸቱሳ

1 መና ጎዳይ ሚልክያሳ ባጋና እስራኤልያ አሳ ቦላ ኦዴዳ ትምቢትያ ኪታይ ሀዋ። 2 መና ጎዳይ ባረ አሳ፥ "ታን ህንተና ሲቃድ" ያጌ።✝1:2-3 ሮመ 9:13✝1:2-5 ኢሳ. 34:5-17፤ 63:1-6፤ ኤር. 49:7-22፤ ህዝ. 25:12-14፤ 35:1-15፤ አሞጻ 1:11-12፤ አብድ. 1-14

ሽን ህንተ፥ "ኔን ኑና አያን ሲቃድ?" ያጊታ።

መና ጎዳይ፥ "ኤሳይ ያቆባ እሻ ግደኔዬ? ግዶፐነ ታን ያቆባ ሲቃድ፤ 3 ሽን ኤሳ እጻድ። ታን ኤሳ ደረቱዋ መላ ኡዳድ፤ አ ጋድያካ ዎራካናቱ ደእያ ባዙዋ ኡዳድ" ያጌ።

4 ኤሳ ዘረ ግድያ

ኤዶማቱ፥ "ኑ ካታማቱ ኮለቴድኖ፤ ሽን ኑን ኡንቱንታ ዛረደ ኬጻና" ያጋና።

ኡባፐ ዎልቃማ መና ጎዳይ፥ "ኡንቱንቱ ዛረደ ኬጻናዋንታ፤ ሽን ታን ኮላና። አሳይ ኡንቱንታ፥ ‘ሀ ቢታይ፥ ኢታ ቢታ፤ ሀ ቢታ አሳይካ መና ጎዳይ መናዉ ሀንቀቴዳ አሳ’ ያጋና" ያጌ።

5 ሄዋ ህንተ ህንተ አይፍያን በኢደ፥ "መና ጎዳይ እስራኤልያ ቢታ ዛዋፐ ካረናካ ዎልቃማ" ያጋና።

እስራኤላታ አማነታቤና ድራዉ ሴራይ ጋኬዳ

6 ኡባፐ ዎልቃማ መና ጎዳይ፥ "ህንተኖ፥ ታ ሱን ካዉሽያ ቄሳቶ፥ ናአይ ባረ አዉዋ፥ ቆማይካ ባረ ጎዳ ቦንቼ። ያትና፥ ታን ህንተንቶ አዉዋ ግዶፐ፥ ህንተ ታና ቦንችያ ቦንቹ አነ? ቃይ ታን ህንተንቶ ጎዳ ግዶፐ፥ ህንተ ታዉ ያይያ ያሻይ አኔ? ያቲደ ቃይ፥ ‘ኑን ነ ሱን ዎቲደ ካዉሼዶ?’ ያጊታ። 7 ህንተ ታዉ ያርሽያ ሳ ቦላን ቱኔዳ ያርሹዋ ሺሽያዋን ታ ሱን ካዉሼድታ።

"ቃይካ ህንተ፥ ‘ኑን ኔና ዎቲደ ቱንሴዶ?’ ያጊታ።

"ህንተ መና ጎዳዉ ሺሽያ ጋይታይ ካቴዳዋ ግደኔ ያጊደ ቆፕያዋን ታና ቱንሴድታ። 8 ህንተ ያርሹዋ ያርሽያ ዎደ፥ ቆቃ ዎይ ሀርጋንቻ ዎይ ዎባ ግዴዳ መህያ ያርሾፐ፥ ሄዌ ኢታባ ግደኔ? ህንተ ሄዋ ማላ መህያ ህንተ ካፖ እሞታ ኦደ እምንቶ፥ እ ሄዋ ናሸቻን አካናዋ ህንተንቶ ማላቲ?" ያጌ መና ጎዳይ።✝1:8 ዛረ. 15:21

9 ቃይካ ኡባፐ ዎልቃማ መና ጎዳይ፥ "ጾሳይ ህንተንቶ ቃረታና ማላ፥ ሀእ አ ዎስተ። ዎን ህንተ ሄዋ ማላባ ኦና፥ እ ህንተዉ ዛራናዋ ማላቲ?" ያጌ።

10 ኡባፐ ዎልቃማ መና ጎዳይ፥ "ህንተ ታዉ ያርሽያ ሳ ቦላን ጮ ታማ ኤያዋፐ፥ ህንተፐ እት ኡራይ ጌሻ ጎልያ ፐንግያ ጎርድያዋ ግዴረኔሻ! ታን ህንተናን ናሸትከ፤ ህንተ ያርሽያ ያርሹዋካ አክከ" ያጌ።

11 ቃይካ ኡባፐ ዎልቃማ መና ጎዳይ፥ "አዋይ ዶልያሳፐ ቢደ ዉልያሳ ጋካናዉ፥ ታ ሱንይ ካዉተቱዋ ግዶን ዎልቃማ። ሳኣ ኡባን አሳቱ ታዉ እጻና ጩውሲኖ፤ ጌሻ ያርሹዋካ ያርሺኖ፤ አያዉ ጎፐ፥ ታ ሱንይ ካዉተቱዋ ግዶን ዎልቃማ" ያጌ።

12 ኡባፐ ዎልቃማ መና ጎዳይ፥ "ሽን ህንተ፥ ‘መና ጎዳዉ ሺሽያ ጋይታይ ቱና፤ አን ዎያ ያርሹካ ካቴዳዋ’ ያጊደ አ ካዉሼድታ። 13 ቃይ ህንተ፥ ‘ሀዌ ዳቡርስያዋ’ ያግ ቅሊጪደ፥ ህንተ ሲያን ስምኢታ።

"ህንተ ቦንቂ አኬዳዋ ዎይ ዎባ ዎይ ሀርጋንቻ እሞታ ኦደ ሺሺታ። ያትና፥ ታን ህንተ ኩሽያፐ ሄዋ አኮ? 14 ታዉ ያርሻና ጊደ ሺቀቴዳ አቱማ ዶርሳይ አ ዉድያ ግዶን ደእሽን፥ ሸነይያባይ ደእያ ዶርሳ ያርሽያ ሄ ጭምያዌ ሸቀቴዳዋ ግዶ! አያዉ ጎፐ፥ ታን ኡባፐ ዎልቃማ መና ጎዳነ ዎልቃማ ካትያ፤ ታ ሱንይካ ካዉተቱዋ ግዶን ያየቴዳዋ" ያጌ።