1 ቃይካ ኡባፐ ዎልቃማ ጾሳይ ሀዋዳን ያጌ፤ "ቄሳቶ፥ ሀእ ሀ አዛዙ ህንተሳ። 2 ታ ሱን ቦንቻናዉ ህንተ ስሰናን እጾፐነ ህንተ ዎዛናን ቆፐናን እጾፐ፥ ታን ህንተ ቦላ ሸቃ ኪታና፤ ህንተ አንጁዋካ ታን ሸቃና። ህንተ ህንተ ዎዛናን ታና ቦንቻናዉ ቆፕቤና ድራዉ፥ ታን ሀእካ ህንተና ሸቃ ድጋድ። 3 በእተ፥ ታን ህንተ ዘረቱዋ ሙራና። ህንተ ያርሾ አሄዳ መህያ ቶጭያካ ህንተ ሶምእያን ላላና፤ ህንተካ ሄ ቶጭያና እትፐ አ ኦልያ ሳ ባና። 4 ሄ ዎደ ታ ጫቁ ሌዊያና ምኒደ ደአናዳን፥ ታን ህንተንቶ ሀ አዛዙዋ ኪቴዳዋ ህንተ ኤራና" ያጌ።✝

5 "ታን ሌዊያና ጫቀቴዳ ጫቁ ደኡዋነ ሳሮተ ጫቁዋ፤ እ ታዉ ያያናዳን፥ ታን ኡንቱንታ አዉ እማድ፤ እካ ታዉ ያዬዳነ ታ ሱንካ ቦንቼዳ።✝ 6 ቱሙዋ ህጊ አ ዶናን ደኤዳ፤ አ እንጻርሳንካ ዎርዱ ቤትቤና። እ ታናና ሳሮተንነ ሱረተን ሀመቴዳ፤ ቃይ ጮራቱዋካ ናጋራፐ ዛሬዳ። 7 ቄሳይ ኡባፐ ዎልቃማ መና ጎዳይ ኪቴዳዋ ግዴዳ ድራዉ፥ አ ዶናይ ኤራተን ኩማናዉ ኮሼ፤ አሳይካ ህግያ አ ዶናፐ ታማራናዉ በሴ" ያጌ ኡባፐ ዎልቃማ መና ጎዳይ።

8 ኡባፐ ዎልቃማ መና ጎዳይ ሀዋዳን ያጌ፤ "ሽን ቄሳቶ፥ ህንተ ኦግያፐ ዎራ ስሜድታ፤ ህንተ ትምርትያንካ ጮራቱዋ ቤድታ፤ ታን ሌዊያና ጫቀቴዳ ጫቁዋካ ኮሌድታ። 9 ሄዋ ድራዉ፥ ህንተ ታ ኦግያን ሀመተናን እጼዳንዳን፥ ህንተ ታማርስያ ህግያንካ አሳ ኡባ እት ልከ ጼለናን እጼዳንዳን፥ ታን ህንተና አሳ ኡባ ስንን ካቴዳዋንታነ ካዉሼዳዋንታ ኡዳድ" ያጌ።

10 ኑዉ ኡባዉ እት አዉ ደኤ ግደኔየ? ኑና እት ጾሳይ መዳ ግደኔየ? ያትና፥ ኑን ኑ ማይዛ አዎቱዋ ጫቁዋ ኮልያዋን እቱ እቶ አያዉ አማነተናን እጼቶ? 11 ይሁዳ አሳይ አማነትቤና፤ ቃይ እስራኤልያንነ የሩሳላመን አሳይ ቱናተ ኦዳ፤ አያዉ ጎፐ፥ ይሁዳ አሳይ ጾሳይ ዶስያ ጌሻ ጎልያ ቱንሴዳ፤ ቃይ አላጋ ጾሳዉ ጎይንያ ማጫ ናናቱዋካ አኬዳ። 12 ሀዋ ኦያዌ ኦና ግዶፐካ፥ መና ጎዳይ አ ያቆባ ማባራፐ ይሶ፤ ሄ አሳይ ኡባፐ ዎልቃማ መና ጎዳዉ ያርሹዋ አህያዋ ግዶፐካ፥ መና ጎዳይ አ ሾዶ።

13 ቃይ ህንተ ኦያ ሀራባይ አዬ ጎፐ፥ መና ጎዳይ ህንተ ያርሹዋኮ ጼለና ድራዉ፥ ዎይ አ አከና ድራዉ፥ ያርሽያ ሳኣ ዬኩዋን፥ አፎንነ ዝላሳን ኩንታ። 14 ህንተ፥ "እ አያዉ ኑ ያርሹዋ አከኔ?" ያጊደ ኦቾፐ፥ ጋሱ ሀዋ: ህንተ ህንተ ያላጋተን አክና እታ ግዴዳ ማቻትና ማቻትና ሄ ዎደ ጫቀቴዳ ጫቁዋ ኮሌድታ፤ ሄዎ መና ጎዳይ ማርካ። 15 መና ጎዳይ ህንተዉነ ህንተ ማቻትዉካ ማቻትዉካ እት ቦላይነ እት አያናይ ደአናዳን ኦቤኔየ? ሄዋ አያዉ ኦዴ? ጌሻ ዘረይ ደአናዳና ግደኔ? ሄዋ ድራዉ፥ ህንተፐ ኦንነ ባረ ያላጋተን አኬዳ ማቻትና ጫቀቴዳ ጫቆ አማነተናዋ ግደናዳን ናገቶ። 16 አያዉ ጎፐ፥ "ታን መና ጎዳይ፥ እስራኤልያ ጾሳይ፥ አስናይነ ማቻታ ብለትያዋ እጻይ፤ ሄዌ ኢታባ" ያጌ። ሄዋ ድራዉ፥ ኡባፐ ዎልቃማ መና ጎዳይ፥ "ህንተ ማቻትና ማቻትና ጫቀቴዳ ጫቆ አማነተናዋንታ ግደናዳን ናገትተ" ያጌ ኡባፐ ዎልቃማ መና ጎዳይ።

17 ህንተ ህንተ ሃሳያን መና ጎዳ ዳቡርሴድታ።

ሽን ህንተ፥ "ኑን አ ዎቲደ ዳቡርሴዶ?" ያጊታ።

ህንተ አ ዳቡርሴዳዌ፥ "ኢታ ኦያዋንቱ ኡባይ መና ጎዳ ስንን ሎአ፤ ቃይ እካ ኡንቱንቱን ናሸቴ" ያግያዋን ዎይ፥ "ቱሙዋ ፕርድያ ጾሳይ ሀቃን ደኢ?" ያግያዋና።