1 ታን ስሞን ጰጽሮስ፥ የሱስ ክርስቶሳ ጽሎተ ባጋና ኑዋ ማላ አማኑዋ አኬዳዋንቶ፥ ሀ ዳብዳቢያ ጻፋይ።

2 ጾሳነ ኑ ጎዳ የሱሳ ህንተ ኤርያዋን አ ኬካተይነ ሳሮተይ ህንተንቶ ፓላሂደ ግዶ።

3 ኑን ጾሳ ቦንቹዋነ ሎኦተ ላታና ማላ፥ ኑና ጼሴዳዋ ኑን ኤርያዋን፥ ደኡዋስነ ጾሳ ማላቱሳዉ ኑና ኮሽያዋ ኡባ ጾሳ ዎልቃይ ኑዉ እሜዳ። 4 ህንተ አ እሙዋ ባጋና ሳኣን ደእያ ባይዝያ አሙዋፐ ከስ አካናዳንነ ጾሳ ጾሳተ ላታናዳን፥ እ ባረ እማና ጌዳ ዳሮ ዎልቃማነ አልኦ እሙዋ ኑዉ እሜዳ። 5 ሄዋ ድራዉ፥ ህንተና በስያዋ ኡባ ምን ኦደ፥ ህንተ አማኑዋ ቦላ ሎኦተ፥ ሎኦተ ቦላ ኤራተ፥ 6 ኤራተ ቦላ ህንተና ናግያዋ፥ ህንተና ናግያዋ ቦላ ገንጫ፥ ገንጫ ቦላ ጾሳ ማላትያዋ፥ 7 ጾሳ ማላትያዋ ቦላ እሻተ ሲቁዋ፥ እሻተ ሲቁዋ ቦላ ሲቁዋ ጉጅተ። 8 አያዉ ጎፐ፥ ሀዋንቱ ህንተንቶ ሎይ ዳርያዋ ግዶፐ፥ ህንተና ጎዳ የሱስ ክርስቶሳ ኤራተን ትሻነ አይፍያና ደእያዋንታ ኦና። 9 ሽን ሄዋንቱ ባይና ኡራይ ባረ ማታን ደእያዋ ጻላላ ደሜ፤ ቃይ እ ቆቃ፤ እ ካሰ ኦዳ ናጋራይ አቶ ጌተቴዳዋ ዶጌዳ።

10 ሄዋ ድራዉ፥ ታናዳን ጾሳ ካልያዋንቶ፥ ህንተና ጾሳይ ጼሴዳዋነ ዶሬዳዋ ሎይ ኤርሳናዉ፥ ካሰዋፐ አ ምንተ፤ አያዉ ጎፐ፥ ህንተ ሄዋ ኦያዋ ግዶፐ፥ በትክታ።* 11 ሄዋዳን ቃይ ኑ ጎዳነ ኑና አሽያ የሱስ ክርስቶሳ መና ካዉተ ገልያ ኩመን ማታይ ህንተንቶ እመታና።

12 ሄዋ ድራዉ፥ ህንተ ሀ የዋቱዋ ኤርያዋ ግዶፐካ፥ ቃይ ህንተ ኦይቄዳ ቱሙዋን ምኔዳዋንታ ግዶፐካ፥ ታን ህንተና ሀ የዋቱዋ ኡባ ዎደ ሀሳይስያዋ አግከ። 13 ታን ፓጻ ደኤዳ ኬናን፥ ህንተና ሀሳይሳደ ቃሰናዉ ኮሽያዋ ታዉ ማላቴ። 14 ኑ ጎዳይ የሱስ ክርስቶስ ታዉ ቆንጭያን ኦዴዳዋዳን፥ ታን ሀ ሀይቂያ አሳተ ጋምኤናን ቃራ ኦላናዋ ኤራይ። 15 ታን ሀይቄዳዋፐ ጉይያን ግድናካ፥ ህንተ ሀ የዋቱዋ ኡባ ዎደ ቆፓናዉ ዳንዳያና ማላ፥ ታዉ ዳንዳየቴዳዋ ኡባ ኦና።

16 ኑን አ ዎልቃማ ቦንቹዋ ኑ አይፍያን በኢደ ኦደቶፐ አትን፥ መ አኬዳ ቶሳን ኑ ጎዳ ክርስቶሳ ዎልቃነ ዩሳ ህንተንቶ ኦድበይኮ። 17 አያዉ ጎፐ፥ ዳሮ ዎልቃማ ቦንቹዋፐ፥ "ታን አን ዳሮ ናሸትያ ታ ሲቆ ናአይ ሀዋ" ያግያ ኮሻይ ዬዳ ዎደ፥ ጾሳ አዉዋፐ ቦንቹዋነ ጋላታ እ አኬዳ። 18 ቃይ ኑንካ ጌሻ ደርያ ቦላን አናና ደኢደ፥ ሄ ኮሻይ ሳሉዋፐ ዬዳዋ ስሴዶ።

19 አሳይ ሄዋፐ ሎይ አያ ትምቢትያ ኦድያዋንቱ ሃሳዬዳ ኑና ሎይ አማንያ ቃላይ ኑዉ ደኤ፤ ህንተ ሄ ቃላ ናግያዋ ግዶፐ ሎይድታ። አያዉ ጎፐ፥ ሄዌ ሳአይ ዎንታና ጋካናስነ ዎንታ ጾልንትያ ፖኡ ህንተ ዎዛናን ፖአና ጋካናዉ፥ ማን ፖእያ ፖኡዋ ማላ። 20 ኡባፐ ካሰቲደ፥ ሀዋ ኤርተ፤ ጾሳ ማጻፋን ጻፈቴዳ ትምቢትያ ኦዴዳዋ ኦንነ ባረካ ብላናዉ ዳንዳየና። 21 አያዉ ጎፐ፥ ትምቢትያ ኦዴዳዌ ኡባይ ጌሻ አሳቱ ጌሻ አያናይ ካለና፥ ጾሳ ቃላ ሃሳዬድኖፐ አትን፥ አሳ ሸንያን ሃሳየትቤና።