1 ታ ሲቃቶ፥ ሀዌ ታን ህንተንቶ ጻፌዳ ላኤን ዳብዳቢያ፤ ታን ሄ ላኡ ዳብዳበቱዋካ ህንተ ሱረ ቆፋ ቆፓናዳን ደንናዉ ህንተና ሀሳይሳናዳን ጻፋድ። 2 ጌሻ ግዴዳ ናባቱ በን ኦዴዳ ቃላ ህንተ ሀሳያና ማላነ ጎዳይ ህንተና አሽያዌ፥ ባረ ኪቴዳዋንቱ ባጋና ህንተና አዛዜዳ አዛዙዋ ህንተ ሀሳያና ማላ ኮያይ። 3 ዎድያ ዉርሰን፥ አሳ ቶችያ ባረንቱ አሙዋዳን ደእያዋንቱ አሳ ቶቺደ ደንዳናዋ ኡባፐ ካሰቲደ ኤርተ። 4 ኡንቱንቱ፥ "እ ‘ያና’ ያጌዳ። ግቤኔ? ያትና ሀቃን ደኢ? አያዉ ጎፐ፥ ኑ አዎቱ ሀይቂ ድጌድኖ፤ ሽን ኡባባይካ ሳአይ መቶደፐ ዶሚደ ደእያዋዳንካ ደኤ" ያጋና። 5 ዳሮ ዎድያፐ ካሰ ጾሳይ ሃሳይና፥ ሳሉነ ሳአይ መቴዳዋ ኤሪደ፥ ኡንቱንቱ አኬከናን እጼድኖ። ሳአይ ሃፐነ ሃን መቴዳ።✝ 6 ቃይ ሄዋ ጋሱዋን፥ ሄ ዎደ ደእያ ሳአይ ሄ ሃን ምተት ዬዳ።✝ 7 ሽን ሀእ ደእያ ሳሉነ ሳአይ፥ ጾሳዉ ጎይነና አሳቱ ፕርደትያ ጋላሳይነ ይያ ጋላሳይ ጋካናዉ ታኪደ፥ ሄ ቃላን ታማ ናጊኖ።

8 ሽን ታ ሲቃቶ፥ ሀ እት የዋቶ ዶጎፕተ፤ ጎዳ ማታን፥ እት ጋላሳይ ሻአ ላይ ማላ ግድያዋነ፥ ቃይ ሻአ ላይይ እት ጋላሳ ማላ ግድያዋ ዶጎፕተ።✝ 9 እቱ እቱ ቆፕያዋዳን፥ ጎዳይ ባረ ኦና ጌዳዋ ኦናዉ ታከና፤ ሽን ኦንነ ባረ ናጋራፐ ስማናዳን ኮዬፐ አትን፥ ኦንነ ያና ማላ ኮየና ድራዉ፥ ህንተዉ ጊደ ዳንዳያን ጋምኤ።

10 ሽን ጎዳ ጋላሳይ ካይሱዋዳን ያና። ሄ ጋላስ ሳሎቱ ዎልቃማ ጉንን ያና፤ ሳሉዋ መታቱ ዎልቃማ ሴላን ሲላና፤ ሳአይነ አ ቦላን ደእያ ኡባባይ ያና። 11 ኡባባይካ ሄዋዳን ይያዋ ግዶፐ፥ ህንተ አይ ማላ አሳ ግዳናዉ በሲ? ህንተ ደኡ ጌሻነ ጾሳ ማላትያዋ ግዳናዉ ኮሼ። 12 ህንተ ጾሳ ጋላሳ ናግሽና፥ ሄ ጋላሳይ ኤለካ ጋካናዳን፥ ህንተንቶ ዳንዳየትያዋ ኦተ፤ ሄ ጋላስ ሳሎቱ ጉደቲደ ያናነ ሳሉዋ መታቱካ ዎልቃማ ሴላን ሲላና። 13 ሽን ኑን ጾሳይ እማና ጌዳ ኦራ ሳሉዋነ ኦራ ሳኣ ጽሉ ደአናሳ ናጌቶ።✝

14 ሄዋ ድራዉ፥ ታ ሲቃቶ፥ ሄ ጋላሳ ናጊደ፥ ፖኩነ ዬላይያባይ ባይናዋንታ ግዲደ፥ አናና ሳሮተን ደአና ማላ ሎኦባ ኡባ ኦተ። 15 ጎዳ ዳንዳያይ አቶተ ግድያዋ ህንተ ዎዛናን ቆፕተ፤ ሄዋዳን ቃይ ኑ ሲቆ እሻይ ጳዉሎስ፥ ጾሳይ ባረዉ እሜዳ አዳ ኤራተን ህንተንቶ ጻፌዳ። 16 ባረ ጻፍያ ዳብዳቢያን፥ ሄ የዉዋባ ጻፍያ ዎደ፥ ታማርቤና አሳቱነ ምንቤና አሳቱ ሀራ ጾሳ ማጻፋቱዋ ጌላይያዋዳንካ፥ ሄ ዳብዳቢያ ግዶን ደእያ አኬካናዉ ዋይስያ የዉዋ ጌላዪኖ። ኡንቱንቱ ሄዋ ኦያዋን ባረንቱ ቦላ ባሻ አሂኖ።

17 ሄዋ ድራዉ፥ ታ ሲቃቶ፥ ህንተ ሄዋ ኤርያ ድራዉ፥ ማካላንቻቱዋ ባላን ጭመቲደ፥ ዎራ ቤና ማላነ፥ ቃይ ምኒደ ደእያ ሳኣፐ ኩንደና ማላ ናገትተ። 18 ሽን ህንተ ኑ ጎዳ፥ ኑና አሽያ የሱስ ክርስቶሳ አ ኬካተንነ ኤራተን ድጭተ። አዉ ሀእነ መና ጋላሳይ ጋካናዉ ጋላታይ ጋኮ። አመንእ።