2 ተሰሎንቀ 1

1 ኑን ጳዉሎስ፥ ስላሰነ ጽሞቶስ፥ ተሰሎንቀን ደእያ አማንያ አሳቶ ሀ ዳብዳቢያ ጻፌቶ። ሄዋንቱ ጾሳ ኑ አቡዋንታነ ጎዳ የሱስ ክርስቶሳዋንታ።

2 ጾሳ ኑ አዉዋፐነ ጎዳ የሱስ ክርስቶሳፐ፥ አ ኬካተይነ ሳሮተይ ህንተንቶ ግዶ።

ክርስቶሳ ዩሳ ጋላስ ሀናና ፕርዳ

3 ኑናዳን ጾሳ ካልያዋንቶ፥ ህንተንቱ አማኑ ሎይ ድጭያ ድራዉነ፥ ህንተንቱ እቱ እቱዋ ሲቅያ ሲቁ ዳርያ ድራዉ፥ ኑን ህንተንቶ በስያዋዳን፥ ጾሳ ኡባ ዎደ ጋላታናዉ በሴ። 4 ሄዋ ድራዉ፥ ህንተንታ የደሳይነ ዋይያ ኡባይ ጋክናካ ህንተንቱ ገንጭያዋነ አማንያዋ ኑን ኑ ሁጰዉ ጾሳ አማንያዋንቶ ኦዲደ፥ ህንተዋን ጬቀቴቶ።

5 ህንተንቱ ዋየትያ ጾሳ ካዉተዉ በስያዋንታ ግዲደ ፓይደታና ማላ፥ ጾሳይ ፕርድያ ጽሎ ፕርዳ በስያ ማላ። 6,7 ጾሳይ ቱሙ ፕርዳ ፕርዳና። ጎዳይ የሱስ ባረ ዎልቃማ ኪታንቻቱዋና ታማ ላጩዋ ግዶን ሳሉዋፐ ይያ ዎደ፥ ጾሳይ ህንተንታ ዋይስያዋንቱ ቦላ ዋይያ አሀና። ቃይ ዋየትያ ህንተናነ ኑና ሸምፕሳና። 8 ቃይ ጾሳይ ባረና ኤረናዋንታነ ኑ ጎዳ የሱስ ክርስቶሳ ዎንጋላ ምሽራቾ አዛዘተናዋንታ ሙራና። 9,10 ሄ ጋላስ እ ባረ ጌሻቱዋን ቦንቼታናዉነ ቃይ ባረና አማንያ ኡባቱዋን ሳበታናዉ ይያ ዎደ፥ ኡንቱንቱ ጎዳ ስንፐነ አ ዎልቃ ቦንቹዋፐ ሻከቲደ፥ መና ባሻን ሙረታና። ጋሱነካ፥ ኑን ህንተንቶ ኦዴዳ ኪታይ አማነቴዳ።✝1:9-10 ኢሳ. 2:10

11 ኑን ህንተንቶ ኡባ ዎደ ጾሳ ዎስያዌ ሄዋሳ። ኑ ጾሳይ ጼሴዳ ደኦ ህንተንታ በስያዋንታ ጊደ ፓይዳናዳን፥ ኑን አ ዎሴቶ፤ ህንተንቱ ሎኦባ ኡባ አሞትያዋነ ህንተንቱ አማኑዋ ኦሱዋ እ ባረ ዎልቃን ፖሎ። 12 ሄዋን ኑ ጾሳ አ ኬካተንነ ቃይ ኑ ጎዳ የሱስ ክርስቶሳ አ ኬካተን፥ ጎዳ የሱሳ ሱን ህንተንቱ ቦንቻና፤ ህንተናካ እ ቦንቻና።