የሱሳ ላኤን ዩሳባ
1 ሀእ ኑናዳን ጾሳ ካልያዋንቶ፥ ኑ ጎዳ የሱስ ክርስቶሳ ዩሳባዉነ ኑን አናና ደአናዉ አኮ ሺቃናባዉ፥ 2 ትምቢትያ አሳይ ህንተንቶ ኦድያዋን ዎይ ሀራ አሳፐ ስሴዳ ቃላን፥ ዎይ ኦንነ ኑፐ ዬዳ ኪታዳን ሃሳይያዋን፥ "ጎዳ ጋላሳይ ጋኬዳ" ጊደ ህንተንቱ ኤለካ ዳጋመናዳንነ ዎዛና ባየናዳን፥ ኑን ህንተንታ ዎሴቶ። 3 ህንተንታ ኦንነ አይ ኦግያንነ ባለፖ። አያዉ ጎፐ፥ ካሰቲደ ማካልያዌነ ቃይ ናጋራንቻይ፥ ባሻ ናአይ ቆንጨናን ደእሽን፥ ሄ ጋላሳይ ጋከና። 4 አሳይ ጎይንያ ኡባባነ አሳይ ጾሳ ግያ ኡባባ እ እጻና። እ ባረና ኡንቱንቱ ኡባፐ ቁ ኦና። ቃይ ሀራይ አቶ ጾሳ ጌሻ ጎልያ ገል ኡቲደካ፥ "ታን ጾሳ" ጋና።
5 ህንተንቱ ሀሳይክቴ? ታን ሄዋ ህንተንቶ ህንተናና ደኣደ ኦዳድ። 6 እ ባረ ዎድያን ያናፐ አትን፥ ሀእ ያናዋ አያይ አ ተቂንቶ፥ ህንተንቱ ኤሪታ።
7 አያዉ ጎፐ፥ ጹራ ግዴዳ ማካላይ ሀእ ኦ፤ ሽን ሄ ተእያዌ ኦግያፐ ክቻና ጋካናዉ፥ እ ቆንጨና። 8 ሄዋፐ ጉይያን፥ ሄ ማካላንቻይ ቆንጭና፥ ጎዳይ የሱስ ባረ ዶና ፔኑዋን አ ዎና። ቃይ የሱስ ባረ ላኤን ቦንቾ ዩሳን አ ሙለካ ይሳና።2:8 ኢሳ. 11:4 9 ሄ ማካላንቻይ ሴጻና ኦሱዋን ዪደ፥ ዳሮ ዎልቃን ዎርዶ ማላታነ ማላልስያዋ ኦና።2:9 ማቶሳ 24:24 10 ሄዋዳንካ፥ ቃይ ይያ አሳቱዋ ዱማ ዱማ ኢታ ጭሙዋን ባለና። ይያዋንቱ አታናዉ ቱማተ ሲቂደ አክቤና ድራዉ ያና። 11,12 ሄዋ ድራዉ፥ ቱማተ አማንቤና ኡባ አሳቱ፥ ናጋራ ኦያዋን ናሸትያዋንቱ ኡባይ ፕርደታናዳንነ ዎርዶ ግድያባ አማናናዳን፥ ጾሳይ ዎልቃማ ባላ ኡንቱንቱ ግዶ የዳና።
አቶተዉ ዶረቴዳ አሳቱዋ
13 ሽን ጎዳይ ሲቅያ ኑናዳን ጾሳ ካልያዋንቶ፥ ኑን ጾሳ ህንተንቱ ድራዉ፥ ኡባ ዎደ ጋላታናዉ በሴ። አያዉ ጎፐ፥ ጌሻ አያና ዎልቃንነ ቱማተ ህንተንቱ አማንያዋን ህንተንታ አሻናዉ፥ ጾሳይ ህንተና ባይራዳን ዶሬዳ። 14 ጾሳይ ህንተንታ ኑን ህንተንቶ ኦዴዳ ኑ ምሽራቹዋ ቃላ ባጋና ጼሴዳዌ፥ ህንተንቱ ኑ ጎዳ የሱስ ክርስቶሳና እትፐ ቦንቼታናሳ። 15 ስም ኑናዳን ጾሳ ካልያዋንቶ፥ ምኒደ ኤቂተ፤ ኑን ህንተና ኑ ዶናን ግድና፥ ዎይ ኑ ዳብዳቢያን ግድና፥ ታማርሴዳ ዎጋ ኦይቂተ።
16,17 ኑ ጎዳ የሱስ ክርስቶስ ባረ ሁጲያን ቃይ ጾሳይ፥ ኑ አዉ ኑና ሲቂደ፥ ባረ አ ኬካተን ኑዉ መና ዳንዳያነ ሎኦ ህዶታ እሜዳዌ፥ ቃይ ህንተንቱ ሎኦባ ኡባ ኦናዳንነ ሃሳያናዳን፥ ህንተንቱ ዎዛና ምንሶነ መን።