ሃገ 1

መና ጎዳይ ጌሻ ጎልያ ዛረደ ኬጻናዳን አዛዙዋ

(1:1-15)

1 ካቲ ዳርዮሰ ካተቴዳ ላኤን ላይ፥ ኡሱፑን አግናን ኮይሮ ጋላስ መና ጎዳ ቃላይ ትምቢትያ ኦድያ ሃገ ባጋና ሳላትያላ ናኣ፥ ይሁዳ ጋድያ ሞድያ ዛሩባቤላኮነ እዮጸዴቃ ናኣ፥ ቄሰ ኡባቱ ካፑዋ ኢያሱኮ ዬዳ፤✝1:1 እዝራ 4:24—5:2፤ 6:14 2 ኡባፐ ዎልቃማ መና ጎዳይ፥ "ሀዌ አሳይ፥ ‘መና ጎዳ ጌሻ ጎልያ ዛረደ ኬጽያ ዎዲ ብሮ ጋክቤና’ ያጌ።"

3 ያትና፥ መና ጎዳ ቃላይ ትምቢትያ ኦድያ ሃገ ባጋና፥ 4 "ታ አሳዉ፥ ታ ጌሻ ጎሊ ኮለት ደእሽን፥ ህንተ ህንተ አሌቀቴዳ ጎለቱዋን ደአናዉ ሀዌ ህንተንቶ ዎዴየ?" ያጊድ ዬዳ።

5 ሄዋ ድራዉ፥ ኡባፐ ዎልቃማ መና ጎዳይ፥ "አነ ህንተ ህንተና ጋኪደ ደእያዋ ቆፕተ። 6 ህንተ ዳሩዋ ዘሬድታ፤ ሽን ጉ ሺሼድታ። ሚታ፥ ሽን ካልክታ፤ ኡሺታ፥ ሽን አልክታ። ማዪታ፥ ሽን ህንተና ሆኤና፤ ድርጉዋ አክያዌ ዳከቶ ቃርጪትያን የጋናዉ አኬ" ያጌ።

7 ቃይካ ኡባፐ ዎልቃማ መና ጎዳይ፥ "አነ ህንተ ህንተና ጋኪደ ደእያዋ ቆፕተ። 8 ስም ደርያ ፑደ ከሲደ፥ ም ቃንጺደ አህተ፤ ጌሻ ጎልያ ዛረደ ኬጽተ። ያቶፐ ታን አን ናሸታናነ ቦንቼታና" ያጌ መና ጎዳይ።

9 ቃይካ ኡባፐ ዎልቃማ መና ጎዳይ፥ "ህንተ ዳሮ ካ ሺሻናዉ ሀልቼድታ፤ ሽን ጉ ግዴዳ፤ አካ ህንተ ጎለ ገልሴዳ ዎደ፥ ታን ፑንያዋን ይ አጌዳ። ሀዌ አያዉ ሀኔዴ? ታን ሀዋ ኦዳዌ፥ ህንተ ኡባይካ ህንተ ጎልያ ጎልያ ኦሶ ዎጽሽን፥ ታ ጎሊ ኮለቲደ አቴዳ ግሻሳ። 10 ሄዋ ድራዉ፥ ቦላ ሳሉ እራ እመናን፥ ቢታይካ ካ ሞከናን እጼድኖ። 11 ቃይ ቢታነ ደረቱዋ ቦላ፥ ካ ቦላ፥ ዎይንያ ቱራነ ዛይትያ ዎጋራቱ ቦላ፥ ቢታይ ፑደ ሞክያዋ ቦላ፥ አሳነ መህያ ቦላነ ህንተ ዳቡሪደ ኦዳዋ ኡባ ቦላ ታን እራ ይሳድ" ያጌ።

አሳይ ጾሳዉ አዛዘቴዳ

12 ሄዋፐ ጉይያን፥ ሳላትያላ ናአይ ዛሩባቤል፥ እዮጸዴቃ ናአይ፥ ቄስያ ኡባቱ ካፑ ኢያሱነ ሀራ አሳይ ኡባይ መና ጎዳ ባረንቱ ጾሳ ቃላዉነ መና ጎዳይ ኡንቱንቱ ጾሳይ ትምቢትያ ኦድያ ሃገ ባጋና ኪቴዳ ቃላዉ አዛዘቴድኖ፤ አሳይካ መና ጎዳዉ ያዬድኖ። 13 ያትና፥ መና ጎዳይ ኪቴዳ ሀጊ አሳ፥ "አሳዉ፥ መና ጎዳይ ህንተና፥ ‘ታን ህንተናና ደአይ’ ያጌ" ያግ መና ጎዳ ኪታ አሳዉ ኦዴዳ።

14 ያትና፥ መና ጎዳይ ሳላትያላ ናኣ፥ ይሁዳ ቢታ ሞድያ ዛሩባቤላ፥ እዮጸዴቃ ናኣ፥ ቄስያ ኡባቱ ካፑዋ ኢያሳነ ሀራ አሳ ኡባ ደንዳ፤ ኡንቱንቱ ዪደ፥ ኡባፐ ዎልቃማ መና ጎዳ፥ ባረንቱ ጾሳ ጌሻ ጎልያ ኬጹዋ ዶሜድኖ። 15 ሀዌ ሀኔዳዌ ካቲ ዳርዮሰ ካተቴዳ ላኤን ላይን፥ ኡሱፑን አግናን ላታማነ ኦይደን ጋላሳና።