ዳኔል ጸግሮሳ ሻፋ ማታን በኤዳ ሳፃ
(10:1—11:45)
1 ፓርሰ ካቲ ቂሮስ ካተቴዳ ሄዘን ላይ፥ ብልጻሶረ ግያ ዳኔላዉ ሀራ ሳጻይ ቆንጬዳ። ሄ ሳጻን ቆንጬዳዌ ቱማ፤ ቆንጬዳዌካ ዎልቃማ ኦላባ። ሄ አኬካይ አዉ እመቴዳዌ ሳጻና።
2 ሄ ዎደ ታን፥ ዳኔል፥ ሄዙ ሳምንታ ዬካድ። 3 ሄዙ ሳምንታይ ዉራና ጋካናዉ ሎኦ ቁማ ማበይከ፤ አሹ ዎይ ዎይንያ ኤሳይ ታ ዶናኮ ሺቅቤና። ታ ሁጲያካ አያነ ኦከታበይከ። 4 ኮይሮ አግናን ላታማነ ኦይደን ጋላሳን፥ ጸግሮሳ ግያ ዎልቃማ ሻፋ ማታን ታን ኤቃደ ጼላድ፤ 5 ላይኑዋ ግያ ማዩዋ ማዬዳ እት ብታንያ በኣድ። እ ባረ ጼሳን በርተ ዎርቃፐ ኦሰቴዳ ሳቂያ ዳንጨዳ።10:5-6 ሳፃ 1:13-15፤ 2:18፤ 19:21 6 አ ቦላይ ጶልያ እንቁዋ ማላቴ፤ አ ሶምኢ ዋልቃንዳን ጶልቁ ጌ፤ አ አይፈቱካ ታማ ላጩዋ ማላቲኖ፤ አ ኩሺነ አ ገዲ ቁጨቴዳ ናስያ ብራታዳን ፖእሴ፤ አ ቃላይካ ዳሮ አሳይ ሃሳይያ ቃላዳን ሀኔ።
7 ሀ ሳፃ ታን ዳኔል ታረካ በኣድ። ታናና ደእያ አሳቱ በእበይክኖ፤ ኡንቱንቱ ሎይ ዳጋሜዳ ድራዉ፥ ባቃት ቆሰቴድኖ። 8 ታን ሀ ዎልቃማ ሳፃ ጼላደ፥ ታረካ አታድ፤ ታዉ ዎልቃይ እጽና ዳቡራድ፤ ታ ሶምኢ ሎይ ቡላቴዳ። 9 ሄ ዎደ ታን እ ሃሳይያዋ ስሳድ፤ ቢታን ዱገ ታ ሶምኡዋን ጉፋናድ፤ ገምእሹዋ ታይሮታድ።
10 ሄዋፐ ጉይያን፥ እት ኩሺ ታና ቦቼዳ፤ ታን ኮኮራደ ደእሺና፥ ታና ታ ኩሽያንነ ታ ጉልባታን ደንደ ኤሴዳ። 11 እ ታና፥ "ላ፥ ጾሳይ ሎይ ሲቄዳ ዳኔላ፥ ታን ነዉ ኦድያ ቃላ ሎይደ አኬካ፤ ደንዳ ኤቃ። አያዉ ጎፐ፥ ታን ኔኮ ኪተታደ ያድ" ያጌዳ። እ ታና ሀዋዳን ያግና፥ ታን ኮኮራደ ደንዳ ኤቃድ።
12 ቃይካ እ ሀዋዳን ያጌዳ፤ "ዳኔላ፥ አይነ ያዮፓ! አያዉ ጎፐ፥ ኔን አኬካ ደማናዉ ቆፋ ቃቼዳነ ነ ጾሳ ስንን ነ ሁጲያ ካዉሼዳ ኮይሮ ጋላሳፐ ዶሚደ፥ ነ ዎሳይ ስሰቴዳ፤ ታንካ ሄዎ ዛሩዋ አካደ ያድ። 13 ሽን ፓርሰ ካዉተ ካፑዋ ግድያ አያናይ ላታማነ እት ጋላሳ ታና ተኤዳ። ታን ታረካ ፓርሰ ካዉተ ካፑዋና ያን አታድ። ሄዋ ድራዉ ኪታንቻቱዋ ካፓቱዋፐ እቱ፥ ምካኤል ታና ማዳናዉ ዬዳ።10:13፣ 21 ሳፃ 12:7 14 ታን ሀእ ኔኮ ዬዳዌ፥ ዉርሰ ጋላሳቱዋን ነ አሳ ቦላ ሀናናዉ ደእያዋ ነዉ ቆንጭሳናሳ፤ አያዉ ጎፐ፥ ሀ ሳጻይ ስንፐ ሀናናዉ ደእያዋ" ያጌዳ።
15 እ ሄዋ ታዉ ኦድያ ዎደ፥ ታን ታ ሶምኡዋን ጹጉናደ፥ ግያዋ ያድ። 16 ሄዋፐ ጉይያን፥ አሳ ማላትያ እቱ ታ መተርሻ ቦቼዳ፤ ታ ዶናይ ዶየትና፥ ሃሳያ ዶማድ። ታ ስንን ኤቄዳዋ ሀዋዳን ያጋድ፤ "ታ ጎዳዉ፥ ሀ ሳጻን ታን ሎይ ዳጋሜዳ ድራዉ፥ ዳሮ ዳቡራድ። 17 ታን ነ ቆማይ ኔናና ታ ጎዳና ሃሳያናዉ ዎታ ዳንዳያይታ? ታ ዎልቃይ ዉሬዳ፤ ሸምፓናዉካ ታዉ እጸቴዳ" ያጋድ።
18 ሄ አሳ ማላትያ እቱ ላኤንዋካ ታና ቦቺደ፥ ታዉ ዎልቃ እሜዳ። 19 ያቲደ ታና፥ "ላ፥ ጾሳይ ሎይ ሲቄዳ ብታንያዉ፥ አይነ ያዮፓ! ሳሩ ነዉ ግዶ። ሀእ ስም ምና፤ ኤ ምና" ያጌዳ።
እ ሄዋዳን ጊና፥ ታን ምናድ፤ "ታ ጎዳዉ፥ ኔን ታና ምንሶ ድራዉ፥ ሀእ ኦዳ" ያጋድ።
20 እ ዛሪደ፥ "ታን ኔኮ አያዉ ያድታንቶ ኤራይ? ሀእ ታን ስማደ ባደ፥ ፓርሰ ካፑዋ ግድያ አያናና ኦለታና፤ ቃይ ታን ቢና፥ ግሪከ ካፑዋ ግድያ አያናይ ያና። 21 ሽን ታን ነዉ ቱሙዋ ማጻፋን ጻፈቴዳዋ ኦዳና። ታን ኡንቱንቱና ኦለትያ ዎደ፥ ህንተ ካፑዋ ምካኤለፐ አትና፥ ታና ማድያ ሀራይ እቱነ ባዋ።