ዳኔላ 2

ካትያ ናቡካዳናጾረ አኩሙዋ

1 ናቡካዳናጾር ባረ ካተቴዳ ላኤን ላይ አኩሙዋ አኩመቴዳ። ሄ አኩሙ አ ሎይ ሻቢርና፥ ገምእሹ አ አፌናን እጼዳ። 2 ያትና፥ እ አኩመቴዳ አኩሙዋ አዉ ኦዳና ማላ፥ ሻሬቾቱ፥ ሙሩንያዋንቱ፥ ብትያዋንቱነ ጾልንትያ ጼሊደ ካይያዋንቱ ጼገት ያናዳን ካቲ አዛዜዳ። ዪደ፥ አ ስንን ኤቄድኖ።✝2:2 ዶመ 41:8 3 ካቲ ኡንቱንታ፥ "ታን ታና ሻቢርስያ አኩሙዋ አኩመታድ፤ ሄ አኩሙ አየንቶ ኤራናዉ ኮያይ" ያጌዳ።

4 ጾልንትያ ጼሊደ ካይያዋንቱ ካትያ ሶራቱዋ*2:4 ዳን። 2:4 ፐ ቢደ ሸምፑዋ 7 ጋካናዉ ደእያዌ: ሶራቱዋ አሳ ቃላን ጻፈቴዳ። ቃላን፥ "ካትያዉ፥ መናዉ ደአ! ነ አኩሙዋ ኑዉ ነ ቆማቶ ኦዳ፤ ኑን ነዉ አ ብለ ኦዳና" ያጌድኖ።

5 ካቲ ጾልንትያ ጼሊደ ካይያዋንታ ሀዋዳን ያጌዳ፤ "ታን ሎይደ ቃቼዳ ቆፋይ ሀዋ። ህንተ ሀ አኩሙዋነ አ ብለ ታና ኤርሳና ዮፐ፥ ታን ህንተና ቃንጻ የጋና፤ ህንተ ጎለቱካ ቡራ ኦልያ ሳኣ ከሳና። 6 ሽን ህንተ አኩሙዋነ አ ብለ ታዉ ኦዶፐ፥ እሙዋ፥ ዎይቱዋነ ዳሮ ቦንቹዋ ታፐ ህንተ አካና። ሄዋ ድራዉ፥ አነ አኩሙዋነ አ ብለ ታና ኤርስተ" ያጌዳ።

7 ላኤንዋካ ኡንቱንቱ ዛሪደ፥ "ካቲ አኩሙዋ ኑዉ ባረ ቆማቶ ኦዶ፤ ኑን አ ብለ ኤርሳና" ያጌድኖ።

8 ካቲ ኡንቱንቶ ዛሪደ፥ "ታን ህንተ ሀልቹዋ ኤራይ፤ ታን ሎይደ ቃቼዳ ቆፋ ህንተካ ኤሬዳ ድራዉ፥ ሀዋ ሱጋና ጊደ ሀኒታ ያጌዳ። 9 ህንተ አኩሙዋ ታዉ ኦዳና ዮፐ፥ እት ቀጩ ህንተና ናጌ። ሀኖታይ ላመታናዋ ጊደ ህንተ ህዶታ ኦያ ድራዉ፥ ታዉ ዎርዶነ ገንያ ቃላ ኦዳናዉ ማቀቴድታ። ሄዋ ድራዉ፥ አኩሙዋ ታዉ ኦድተ፤ ያቶፐ፥ ህንተ አ ብለ ኤርሳናዉ ዳንዳይያዋ ታን ኤራይ" ያጌዳ።

10 ጾልንትያ ጼሊደ ካይያዋንቱ ካትያዉ ዛሪደ፥ "ካቲ ኦችያ ኦሻ ዛራናዉ ዳንዳይያ እት አሳይነ ጋድያን ባዋ። አይ ግታቴዳነ ዎልቃሜዳ ካዉካ ሀዋ ማላባ ሻሬቾቱዋ፥ ሙሩንያዋንታ ዎይ ጾልንትያ ጼሊደ ካይያዋንታ ኦች ኤረና። 11 ካቲ ኦቼዳ ኦሻይ ዴጻ፤ አሳና እትፐ ደኤና ጾሳቱዋፐ አትና፥ ሀዋ ካትያዉ ቆንጭሳናዉ ዳንዳይያዌ ሙለካ ባዋ" ያጌድኖ።

12 ሄዋ ድራዉ፥ ካቲ ሎይ ሀንቀቲደ ባብሎነን ደእያ ካትያ ዞርያዋንታ ኡባ ዉርሳናዳን አዛዜዳ። 13 ካትያ ዞርያዋንታ ዎናዉ አዋዩ ከሴዳ። ዎያዋንቱ ዳኔላነ አ ላገቱዋ ዎናዉ ኮዬድኖ።

ጾሳይ ዳኔላ አኩሙዋ ብለ ኤርሴዳ

14 ካትያ ናግያ ኦላንቻቱዋ ካፑ አርዮክ፥ ባብሎነን ደእያ ካትያ ዞርያዋንታ ዎናዉ ከስያ ዎደ፥ ዳኔል አ አኬካንነ ሂላን ሃሳይሴዳ። 15 እ ካትያ ናግያ ኦላንቻቱዋ ካፑዋ አርዮካ፥ "ካትያ አዋዩ አያዉ ሀዋዳን ፓላቴዴ?" ጊደ ኦቼዳ። አርዮክ ሀኖታ ዳኔላዉ ኦዴዳ። 16 ሄዋን ዳኔል ካትያኮ ገሊደ፥ አኩሙዋ ብለ ኤርሳናዉ፥ ባረዉ ዎዲ እመታና ማላ ዎሴዳ።

17 ሄዋፐ ጉይያን፥ ዳኔል ባረ ጎለ ስሚደ፥ ባረ ሄዙ ላገቶ፥ ሀናንያዉ፥ ምሻኤላዉነ አዛርያዉ ሀኖታ ኦዴዳ። 18 ኡንቱንቱ ባብሎነን ደእያ የንኮ ካትያ ዞርያዋንቱና እትፐ ሀይቀናዳን፥ ሳሉዋ ጾሳይ ማሮታ ኡንቱንቶ ኦደ፥ ሀ ጹራ ኡንቱንቶ ቆንጭሳናዉ ዎሳና ማላ፥ ኡንቱንቶ ኦዴዳ።

19 ሄ ቃማን ጹራይ ዳኔላዉ ሳጻን ቆንጬዳ። ያትና፥ ዳኔል ሳሉዋ ጾሳ ሀዋዳን ያጊደ ጋላቴዳ፤

20 "አዳ ኤራተይነ ዎልቃይ፥

ጾሳሳ ግድያ ድራዉ፥

አ ሱንይ መናፐ መና ጋካናዉ

ጋላተቴዳዋ ግዶ።

21 ዎደቱዋነ አግናቱዋ እ ላሜ።

ካተቱዋ ካዉተፐ ድጌ፤

ቃይ ካተቱዋ ካዉተን ኡትሴ።

አዳ ኤራንቻቶ አዳ ኤራ፥

አኬክያዋንቶካ ኤራ እ እሜ።

22 ጪማ ጹራነ ጌሜዳ የዉዋ፥

እ ቆንጭሴ።

ማን ደእያዋካ እ ኤሬ፤

ፖኡካ አናና ደኤ።

23 አቤት ታ ማይዛ አዎቱዋ ጾሳዉ፥

ታን ኔና ጋላታይነ ሳባይ።

አያዉ ጎፐ፥ ኔን ታዉ፥

አዳ ኤራነ ዎልቃ እማዳ።

ኑን ኔና ኦቼዳዋ፥

ታና ሀእ ኤርሳዳ።

ካትያ አኩሙዋ ኑና ኤርሳዳ"

ያጌዳ።

ዳኔል አኩሙዋነ አ ብለ ካትያ ኤርሴዳ

24 ሄዋፐ ጉይያን፥ ዳኔል ባብሎነን ደእያ ካትያ ዞርያዋንታ ዉርሳናዉ ካትያፐ አዛዙዋ አኬዳ አርዮካኮ ቢደ፥ "ካትያ ዞርያዋንታ ዎፓ። ታና ካትያኮ ገልሳ፤ ያቶፐ ታን አ አኩሙዋ ብለ አ ኤርሳና" ያጌዳ።

25 አርዮክ ኤለካ ዳኔላ ካትያኮ ገልሲደ፥ ካትያዉ፥ "ይሁዳፐ ኦሞደቲደ ዬዳ አሳፐ ካትያ አኩሙዋ ብለ ኤርሳናዉ ዳንዳይያ አሳ ደማድ" ያጌዳ።

26 ካቲ ብልጻሶራ ጌተትያ ዳኔላ፥ "ታን አኩመቴዳ አኩሙዋነ አ ብለ ታና ኤርሳናዉ ዳንዳያይ?" ጊደ ኦቼዳ።

27 ዳኔል ሀዋዳን ያጊደ ዛሬዳ፤ "ካትያዉ፥ ኔን ኦቼዳ ጹራ ቆንጭሳናዉ ዳንዳይያ አዳ ኤራንቻይ፥ ሻሬቹ፥ ሙሩንያዌ፥ ዎይ አያንትያዌ ባዋ። 28 ሽን ጹራቱዋ ቆንጭስያ እት ጾሳይ ሳሉዋን ደኤ። ዉርሰ ጋላሳቱዋን ሀናናባ እ ኔና በሴዳ። ነ አርሳን ዛቁላደ፥ ኔን አኩመቴዳ አኩሙነ ሳጻይ ሀዋ።

29 "ካትያዉ፥ ኔን አርሳን ዛቁላደ፥ ስንፐ ሀናናባ ቆፓዳ። ሄ ዎደ ጹራ ቆንጭስያ ጾሳይ ስንፐ ሀናናዋ ኔና በሴዳ። 30 ሀ ጹራይ ታዉ ቆንጬዳዌ ታን ሀራ አሳፐ አዳ ኤራንቻ ግድና ግደናን፥ ኔን ካቲ አኩሙዋ ብለ ኤራናዳናነ ነ ሁጲያ ግዶን ስመረቴዳ ቆፋ አኬካናዳና።

31 "ካትያዉ፥ ኔን ሎይ ዎልቃማ፥ ጶልያነ ጼላናዉ ያሽያ ምስሊ ነ ስንን ኤቄዳዋ በኣዳ። 32 ሀ ምስልያ ሁጲ ጌሻ ዎርቃፐ፥ አ ትራይነ ኩሸቱ ብራፐ፥ ኡሉነ ዎድረቱ ናሃስያ ግያ ብራታፐ፥ 33 ሱይሊ ብራታፐነ ገድያዉ ያቻይ ባጋይ ብራታፐ ባጋይ ኡርቃፐ መቴዳ። 34 ኔን ሀ ምስልያ ጼልሽን፥ እት ሹቻይ አሳ ኩሺ ቦቼናን ደርያፐ ቆለቲደ፥ ብራታፐነ ኡርቃፐ መቴዳ ምስልያ ገድያ ያቻቱዋ ቦላ ዎደ ጋጬዳ። 35 ሄ ዎደ ብራታይ፥ ኡርቃይ፥ ናሃሰ ግያ ብራታይ፥ ብራይነ ዎርቃይ ኡባይ ጋጨቲደ፥ ቦንያን ኡዱማን ደእያ ሱላ ማላ ግዴዳ፤ አያነ አሸናን ጫርኩ ፕቲደ አፌዳ። ሽን ምስልያ ቦላ ዎዳ ሹቻይ ዎጋ ደርያ ከሲደ፥ ቢታ ሳኣ ኩሜዳ።

36 "ሀዌ ነ አኩሙዋ፤ ቃይ ሀእ ብለ ኑን ነዉ ኦዳና። 37 ካትያዉ፥ ኔን ካተቶ ካትያ። ሳሉዋ ጾሳይ ነዉ ካዉተነ ዎልቃ፥ ምኖተነ ቦንቹዋ እሜዳ። 38 ቢታ ኡባ ቦላን ኔና ሞድያዋ ኦዳ፤ አሳ፥ ባዙዋ ዶኣነ ሳሉዋ ካፉዋ ነ ኩሽያን ዎዳ። ሄዋ ድራዉ፥ ዎርቃ ሁጲ ኔና።

39 "ኔፐ ጉይያን፥ ምኖተን ኔና ጋከና ሀራ ካዉተይ ደንዳና። ካሊደ፥ ቢታ ኡባ ሞድያ፥ ናሃሰ ብራታ ግድያ፥ ሄዘን ካዉተይ ደንዳና። 40 ዉርሰን ኡባባ ጋጨሬ ሊቅስያ ብራታዳን ምኔዳ ኦይደን ካዉተይ ደንዳና። ብራታይ ኡባባ ጋጨሬደ ሊቅስያዋዳን፥ እካ ባረፐ ካሰ ደንዴዳ ካዉተቱዋ ጋጨሬደ ሊቅሳና።

41 "ገደቱነ ገድያ ብራቱ ባጋይ ብራታፐ፥ ባጋይ ኡርቃፐ መቴዳዋንታ ኔን በኤዳዋዳንካ፥ ሄ ካዉተይ ሻከቲደ ካዉተ ግዳናዋ። ብራታይ ኡርቃና ዋላከቴዳዋ ነ በኤዳዋዳንካ፥ ባጋይ ብራታዳን ምኔዳዋ ግዳና። 42 ገድያ ብራቱ ባጋይ ብራታ፥ ባጋይ ኡርቃ ግዴዳዋዳን፥ ሄዋዳንካ ሀ ካዉተዉ ባጋይ ምኖ፥ ባጋይ ላፋ ግዳናዋ። 43 ብራታይ ኡርቃና ዋላከቴዳዋ ነ በኤዳዋዳን፥ ሄ ላኡ ባጋ አሳይ ገሉዋን አኩዋን ዋላከታና፤ ሽን ብራታይ ኡርቃና ዋላከታናዉ ዳንዳየናዋዳንካ፥ ኡንቱንቱ እቱዋ ግዲደ ጋምአናዉ ዳንዳይክኖ።

44 "ሄ ካተቱዋ ላይን፥ ሳሉዋ ጾሳይ ሙለካ ኩንደና፥ ሀራ አሳዉካ እመተና ካዉተ ኤሳና። ሄ ኤቄዳ ካዉተይ ሄ ካዉተቱዋ ኡባ ጋጨሬ ይሳና፤ ሽን እ መናዉ ኤቂደ ደአና። 45 አሳ ኩሺ ቦቼናን ደርያፐ ቆለት ዎደ፥ ብራታፐ፥ ናሃስያፐ፥ ኡርቃፐ፥ ብራፐነ ዎርቃፐ መቴዳ ምስልያ ጋጨሬዳ ሹቻ ብለይ ሄ ካዉተ።

"ዎልቃማ ጾሳይ ስንናዉ ሀናናባ ካትያ በሴዳ። አኩሙካ ቱማ፤ ብለይካ አማነቴዳዋ" ያጊደ ዛሬዳ።

ካቲ ዳኔላስ ዎይቴዳ

46 ሄዋፐ ጉይያን፥ ካቲ ናቡካዳናጾር ዳኔላ ቦንቺደ፥ ሶምኡዋ ቢታ ጋደ ጉፋኔዳ፤ ያቲደ አሳይ አ ስንን ያርሹዋ ያርሻናዳንነ እጻና ጩዋያናዳን አዛዜዳ። 47 ካቲ ዳኔላ፥ "ቱሙዋፐ ነ ጾሳይ ጾሳቱዋ ጾሳ፥ ካተቱ ጎዳነ ጹራ ቆንጭስያዋ። ኔን ሀ ጹራ ቆንጭሳናዉ ዳንዳይያዌ ሄዋሳ" ያጌዳ።

48 ሄዋፐ ጉይያን፥ ካቲ ዳኔላ ሎይ ቦንቼዳ፤ ዳሮነ አልኦ እሞታቱዋካ አዉ እሜዳ፤ ባብሎነ ቢታ ሞድያዋ ኦዳ። ቃይ ባብሎነን ደእያ አዳ ኤራንቻቱዋ ኡባ ቦላ ካፑዋ ኦደ፥ አ ሱንዳ። 49 ዳኔል ኦችና፥ ካቲ ስድራቃ፥ ምሳቃነ አብዳናጋ ባብሎነ ቢታ አይስያዋንታ ኦደ ሱንዳ፤ ሽን ዳኔል ካትያ ጎልያን ጋምኤዳ።