ሁጲሳ ቢታ ካትያነ ገድሳ ቢታ ካትያ
1 "ሜዶና ቢታ አሳ ግድያ ዳርዮስ ካተቴዳ ኮይሮ ላይን፥ ታን አ ማዳናዉነ ምንሳናዉ አ ምይያን ኤቃድ።
2 "ሀእ ስም ታን ነዉ ቱሙዋ ኦዳይ። ሀራ ሄዙ ካተቱ ፓርሰ ቢታን ካተታና፤ ቃይ ኡንቱንቱፐ ጉይያን ካተትያ ኦይደን ካቲ፥ ካሰዋንቱ ኡባቱዋፐ አዳ ዱረ ግዳናዋ። እ ባረ ዱረተ ጋሱዋን ዎልቃ ደምያ ዎደ፥ አሳይ ኡባይ ግሪከ ካዉተና ኦለታና ማላ ደንና።
3 "ሄዋፐ ጉይያን፥ ዎልቃን ሞድያ ምኖ ካቲ ደንዳናዋ፤ ባረ ኮዬዳዋ ኡባ ኦና። 4 እ ደንዴዳዋፐ ጉይያን፥ አ ካዉተይ ዱጸረቲደ፥ ኦይዱ ሳኣን ሻከታና። አ ዛረ አ ካዉተ ላትክኖ፤ እ አይስያ ዎደዋዳን ካዉተዉ ዎልቃይ ደኤና። አያዉ ጎፐ፥ አ ካዉተይ አፐ አከቲደ፥ ሀራቶ እመታና።
5 "ገድሳ ቢታ ካቲ ምኖ ግዳናዋ፤ ሽን አ ካፓቱዋፐ እቱ አፐ አ ምኒደ፥ ሄ ዎልቃማ ካዉተ ሞዳና።
6 "ጉ ላይፐ ጉይያን፥ ገድሳ ቢታ ካቲነ ሁጲሳ ቢታ ካቲ ባረንቱ ግዶን ዳቦተ ጫቁዋ ጫቀታናዋንታ። ገድሳ ቢታ ካትያ ናታ ሁጲሳ ቢታ ካትያ ገላናኑ፤ ሽን እዝ ዎልቃይካ ምነና፤ ቃይ እካ አ ዎልቃይካ ዳሮ ዎድያ ጋምኤና። ሄ ዎደ እዞ፥ እዞ አጃብያዋንቱ፥ እዝ ናአይነ እዝ አስናይ ኡባይ አደ እመታና።
7 "ሄዋፐ ስምና፥ እዝ ዳቦቱዋፐ እቱ ገድሳ ቢታን ካተታና። ሁጲሳ ቢታ ካትያ ቦላን ገሊደ፤ አ ጌሱዋ መን ገሊደ፥ አ ጾናና። 8 ቃይ ኡንቱንቱ ጾሳቱዋ፥ ምስለቱዋነ ብራፐነ ዎርቃፐ ኦሰቴዳ ሚሻቱዋ አኪደ፥ ግብጼ አፋና። ያቲደ አማሬዳ ዎድያዉ ሁጲሳ ቢታ ካትያ ቦቼናን አጋና። 9 ሄዋፐ ጉይያን፥ ሁጲሳ ቢታ ካቲ ገድሳ ቢታ ካዉተ ቦላ ገላና፤ ሽን ድግና፥ ጉየ ባረ ቢታ ስማና።
10 "ሁጲሳ ቢታ ካትያ አቱማ ናናቱ ኦላዉ ጊጊደ፥ ዳሮ ኦላንቻቱዋ ሺሻና፤ ስንን ጋከትያዋ ኡባ ሜጭያ ዎልቃማ ድኡዋዳን፥ አደ ኦሊደ፥ ገድሳ ካትያ ጌሱዋ ኦላናዋንታ። 11 ሄ ዎድያን ገድሳ ቢታ ካቲ ሎይ ሀንቀቲደ፥ ሁጲሳ ቢታ ካትያ ኦላናዉ ደንዳናዋ። ሁጲሳ ቢታ ካቲ ሺሼዳ ዳሮ ኦላንቻቱዋና ኦለቲደ፥ ኡንቱንታ ጾናና። 12 ዳሮ ኦላንቻቱዋ ኦሞዴዳዋፐ ጉይያን፥ ገድሳ ቢታ ካቲ ኦቶሩዋን ፑገታና። ያቲደ ዳሮ ሻኣ ዎና፤ ሽን አ ጾኑ አናና ጋምኤና።
13 "ዋኒደ ጎፐ፥ ሁጲሳ ቢታ ካቲ ካሰዋፐ አያ ሀራ ኦላንቻቱዋ ጊግሳና፤ አማሬዳ ላይቱዋ ጋምኢደ፥ ኩመን ኦላ ሚሻ ኦይቄዳ ሀ ኦላንቻቱዋ አኪደ፥ ኦላዉ ከሳና። 14 ሄ ዎድያን ዳሩ ገድሳ ቢታ ካትያ ቦላ ደንዳናዋ። ሳጻይ ፖለታና ማላ፥ ነ አሳፐካ እት እት ማካላንቻ አሳቱ ደንዳናዋንታ፤ ሽን ጾንክኖ።
15 "ሄዋፐ ጉይያን፥ ሁጲሳ ቢታ ካቲ ገድሳ ቢታ ዪደ፥ ዩሹ ግምበት ኡቴዳ እት ካታማ ኦሊደ ኦይቃና። ገድሳ ቢታ ካትያ ኦላንቻቱ ዎልቃ ያና፤ ሀራይ አቶ ኡንቱንቱፐ ምኖ ኦላንቻቱካ ኡንቱንቱና ኤቀታናዉ ዳንዳይክኖ። 16 አናና ኤቀትያዌ ሙለካ ባይና ድራዉ፥ ሁጲሳ ቢታ ካቲ ባረ ኮይያዋ ኡባ ኦና። እ እስራኤልያ ግያ ሎኦ ቢታን ባረዉ ምን ኤቂደ፥ አ ይስያ ዎልቃ ደማና። 17 እ ባረ ካዉተዉ ደእያ ዎልቃ ኡባ አኪደ ያናዉ ቆፋ ቃቻና፤ ዪደ፥ ገድሳ ቢታ ካትያና ዳቦተ ጫቁዋ ጫቀታናዋ። ሄ ካዉተ ኡንጋናዉ ሀልቺደ፥ ባረ ናቶ አዉ እማና፤ ሽን አ ሀልቹ ፖለተና።
18 "ሄዋፐ ጉይያን፥ እ ባረ ቆፋ አባ ጋጻን ደእያ ቢታቱዋኮ ዛሪደ፥ ኡንቱንቱፐ ዳሮቱዋ ኦሊደ፥ ባረዉ አካና። ሽን እት ኦላ ጋዳዉ አ ኦቶሩዋ ጊሻና፤ ያቲደ አ ኦቶሩዋ አ ቦላ ዛራና። 19 ሄዋፐ ጉይያን፥ ሁጲሳ ቢታ ካቲ ባረ ቢታ ባረ ጌሱዋ ስማና። ሽን እ ሄዋን በቲደ ኩንዳና፤ አ ላኤን ኦንነ በኤና።
20 "አ ሳኣን ካተቴዳዌ ባረ ካዉተ ቦንቹዋ ናጋናዉ ጊራ ጊርስያ አሳ ካዉተ ግዶ ኪታና። ግዶፐነ፥ ቃን ዎድያፐ ጉይያን፥ ቆንጭያን ዎይ ኦላን ግደናን እ ጮ ሀይቂ ያና።
ሁጲሳ ቢታ ካትያ ካቴዳዋ
21 "አ ሳኣን ቃይ እት ካቴዳ አሳይ ደንዳናዋ፤ ሽን ኡንቱንቱ ካዉተ ቦንቹዋ አዉ እምክኖ። አሳይ ሳአይ ሳራ ጊደ ደእሽን፥ ጭም ገሊደ፥ ካዉተ እ ኦይቃና። 22 ሄዋፐ ጉይያን፥ ዳሮ ኦላንቻቱ አ ስንፐ ፕተቲደ ያና፤ ጫቁዋ ካፑካ ሀይቃና። 23 አናና ጫቁዋ ጫቀት ስሚደ፥ ባረ ኦያዋ ጭሙዋን ኦና፤ አማሬዳ አሳቱዋ ጻላላና እ ምናና። 24 አሳይ ሳአይ ሳሮ ጊደ ደእሽን፥ ሄ ቢታን ዳሮ ዱረትያ እት ባጋ እ ገላና። ካሰ ባረ አዉ ዎይ ባረ ማይዛ አዎቱ ኦቤናዋ ኦና፤ ባረ ኦሞድ ሺሼዳ ዱረተነ አቁዋ ባረና ካልያዋንቶ ግሻና። ጌሶቱዋካ ላላናዉ እ ሀልቻናዋ፤ ሽን ሄዋ እ ኦያዌ ጉ ዎድያሳ።
25 "ሄዋፐ ጉይያን ጻሊደ፥ ባረ ዎልቃካ ምንሲደ፥ ዳሮ ኦላንቻቱዋና ገድሳ ቢታ ካትያ ቦላ ደንዳናዋ። ቃይ ገድሳ ቢታ ካቲ ሎይ ዳሮነ ዎልቃማ ኦላንቻቱዋና ኦላዉ ደንዲደ፥ አናና ኦለታና። ሽን አ ቦላ ኡንቱንቱ ካሰቲደ ማቄዳ ማቁዋ ጋሱዋን፥ እ ኡንቱንቱና ኤቀታናዉ ዳንዳየና። 26 ካትያና እት ማዳን ምያዋንቱ አ ይሳና፤ አ ኦላንቻቱ ፕተታና፤ አ ኦላንቻቱዋፐ ዳሮቱ ኦላን ሀይቃና። 27 ሀ ላኡ ካተቱካ ባረንቱ ዎዛናን ኢታ ቆፕያ ድራዉ፥ ኡንቱንቱ እትፐ እት ኦይድያን ኡቲደ ሃሳዪደ፥ እቱ እቶ ዎርዶታና። ሽን ኡንቱንቱ ኦና ግያዌ ኡንቱንቶ እንጀተና፤ አያዉ ጎፐ፥ ጾሳይ ኬሬዳ ዎዲ ብሮ ጋክቤና።
28 "ሁጲሳ ቢታ ካቲ ዳሮ ዱረተና ባረ ቢታ ስማና። ሽን እ ባረ ዎዛናን ጌሻ ጫቁዋ እጻና። አ ቆሀናዉ እትባ አ ቦላ ኦደ፥ ባረ ቢታ ስማና።
29 "ጾሳይ ኬሬዳ ዎዲ ጋክና፥ እ ዛሪደ ገድሳ ቢታ ቦላ ገላና፤ ሽን አዉ ካሰዋዳን እንጀተና። 30 አያዉ ጎፐ፥ አዋይ ዉልያ ባጋ ቢታፐ ይያ ኦላ ማርካባቱ አ ዳጋንና። ያቶፐ እ ጉየ ስሚደ፥ ጌሻ ጫቁዋ ቦላ ሀንቀታና። ቃይ ሄዋፐ ስሚደ፥ ጌሻ ጫቁዋ አግያዋንቱና ዳቦታና።
31 "አ ኦላንቻቱ ጌሻ ጎልያካ አ ዩሹዋ ግምቢያካ ቱንሳናነ ሀች ሀች ያርሽያ ያርሹዋካ ድጋና። ያቲደ ኡንቱንቱ ባየ ቱናተ ያን ኤሳና።11:31 ዳኔላ 9:27፤ 12:11፤ ማቶሳ 24:15፤ ማር. 13:14 32 ጫቁዋ ኮልያዋንታ እ ባረ ጭሙዋ ቃላን ባረ ባጋ ኦና፤ ሽን ባረንቱ ጾሳ ኤርያ አሳይ ምናናነ አናና ኤቀታና።
33 "አሳ ግዶን ደእያ አዳ ኤራንቻቱ ዳሮ አሳ ታማርሳና፤ ሽን ጉ ዎድያ ጋርሳን ሀ ታማርስያዋንቱ ማሻን ቡሳከታና፥ ታማን ጹገታና፥ ኦሞደታና ዎይ ቦንቀታና። 34 ሄ መቶቱዋ ግዶን ደኢድ፥ ኡንቱንቱ ጉ ማዱዋ ደማና፤ ዳሮ አሳይካ ኡንቱንቱ ባጋ ማላቲደ፥ ኡንቱንቱኮ ሺቃና፤ ሽን ዎዛናፐ ግደና። 35 አዳ ኤራንቻቱዋፐ ኡንደናዋንቱ በታና። ሄዋዳን ሀኒደ፥ ዉርሰ ዎዲ ጋካናዉ፥ ኡንቱንቱ ፓጨቲደ ከሳና፥ ጌያናነ ቶሺ ባይናዋንታ ግዳና። አያዉ ጎፐ፥ ጾሳይ ኬሬዳ ዎዲ ብሮ ጋክቤና።
ባረና ቂስያ ካትያ
36 "ካቲ ባረና ኮሾዋ ኦና፤ ጾሳቱዋ ኡባፐ ቦላ ባረና ቁ ኦደ ዳርሳና፤ ቃይ ጾሳቱዋ ጾሳ ቦላ ካሰ ስሰት ኤረና ኢታ ቃላ ሃሳያና። ሀናናዉ ቆፋን ቃሸት ኡቴዳዌ ሀናናዉ ደእያ ድራዉ፥ ጾሳ ሀንቁ ፖለታና ጋካናዉ፥ እ ኦያዌ ኡባይ አዉ እንጀታና።11:36 2 ተስ. 2:3-4፤ ሳፃ 13:5-6 37 እ ካሰ ባረ ማይዛ አዎቱዋ ጾሳቱዋ፥ ዎይ ማጫ አሳይ ሲቅያ ጾሳ ካና፤ እ ባረ ጻላላ ሀራ ኡባፐ አደ ቁ ኦናፐ አትና፥ ሀራ አይ ጾሳነ ኮየና። 38 እ ኡንቱንታ ቦንቻናዋ አጊደ ጌሱዋ ጾሳ ቦንቻና፤ አ ማይዛ አዎቱ ኤረና ጾሳዉ ዎርቃ፥ ብራ፥ አልኦ ሹቻነ ሎኦ እሙዋ እሚደ ቦንቻና። 39 እማ ጾሳ ማዱዋን ምኖ ጌሱዋ ቦላ እ ደንዳና። ቃይ ባረ ማታ ኤርያዋንታ እ ዳሮ ቦንቻና። እ ኡንቱንታ ዳሮ አሳ ሞድያዋንታ ኦደ ሱንና፤ ቃይ ቢታካ ዎይቱዋ ኦደ፥ ኡንቱንቶ ሻክ ሻኪደ እማና።
40 "ዉርሰ ዎዲ ጋክና፥ ገድሳ ቢታ ካቲ ደንዲደ፥ ሁጲሳ ቢታ ካትያ ኦላና። ሽን ሁጲሳ ቢታ ካቲ ፓራ ጋረቱዋ፥ ፓራ አሳቱዋነ ዳሮ ማርካባቱዋ አኪደ፥ አ ቦላ ጎትያዳን ያና። ዳሮ ቢታ ቦላ ገሊደ፤ ድኡዋዳን ኡንቱንታ ሜጪደ አና። 41 ቃይ እ እስራኤልያ ግያ ሎኦ ቢታ ቦላንካ ገላና። ዳሮ ቢታቱ አ ኩሽያን ኩንዳና፤ ሽን ኤዶማ፥ ሞኣባነ አሞና ቢታቱ አ ኩሽያፐ አታና። 42 እ ዳሮ ቢታቱዋ ቦላ ገልያ ዎደ፥ ግብጼካ አፐ ከስ አከና። 43 ግብጼ ቢታ ዎርቃ፥ ብራነ ዱረተ ኡባ እ ባረ ኩሽያ አና። ሊቢነ ቶጲ አዉ ሞደታና።
44 "ሽን አዋይ ዶልያ ባጋፐነ ሁጲሳ ባጋፐ ይያ ኦዱ አ ዳጋንና፤ ሀንቁዋ ኤጽ ከሲደ፥ ዳሮቱዋ ዎናዉነ ሙለ ይሳናዉ ደንዳናዋ። 45 እ ባረ ካተቱዋ ዱንካንያ አባፐነ ፑላንቻ ጌሻ አሳፐ ግዱዋን ቶካና። ሽን አ ዉርሰይ ጋካናዋ፤ አ ማድያዌካ ያና።