ዳኔላ 12

ዉርሰ ዎድያባ

1 "ሄ ዎድያን፥ ነ አሳ ሄምያ ዎልቃማ ካፑ ምካኤል ደንዳናዋ። ካዉተይ ዶሞደፐ ዶምና፥ ሄ ዎደ ጋካናዉ፥ በእ ኤረና መቶ ዎዲ ሀናና። ግዶፐነ፥ አ ሱንይ ጾሳ ማጻፋን ጻፈቴዳ ነ አሳይ ኡባይ ሄ ዎደ አታናዋ።✝12:1 ማቶሳ 24:21፤ ማር. 13:19፤ ሳፃ 7:14፤ 12:7 2 ካሰ ሀይቂደ ሞገቴዳ አሳፐ ዳሮቱ ደንዳና። ኡንቱንቱፐ ባጋቱ መና ደኦ፥ ባጋቱ ቃይ ዬላዉነ መና ካዉሻዉ ደንዳና።✝12:2 ኢሳ. 26:19፤ ማቶሳ 25:46፤ ዮሃ. 5:29 3 አዳ ኤራንቻቱ፥ ሳሉዋ ፖኡዋዳን፥ ቃይ ዳሮቱዋ ጽሎተ ኦግያ ካለዳዋንቱ መ መናዉ ጾልንትያዳን ፖአና።

4 "ሽን ነኖ ዳኔላ፥ ኔን ዉርሰ ዎዲ ጋካናዉ፥ ሀ ማጻፋ ቃላ ጎርዳደ፥ ማታፋ ዎ። ዳሮቱ ያነ ሃነ ብንኮታና፤ ኤራይካ ዳራና" ያጌዳ።✝12:4 ሳፃ 22:10

5 ሄዋፐ ጉይያን፥ ታን ዳኔል፥ ሀራ ላአቱዋ፥ እቱ ሻፋፐ ሀፍን ላንቂያን፥ እቱ ሻፋፐ ሄፍን ላንቂያን ኤቄዳዋንታ በኣድ። 6 ኡንቱንቱፐ እቱ ላይኑዋ ማዪደ፥ ሻፋ ሃፐ ቦላ ባጋና ኤቄዳዋ ኦቺደ፥ "ሀ ማላልስያዋንቱ ፖለታናዉ ዎይሳ ዎድያ ጋምአንዴሻ?" ያጌዳ።

7 ሄ ላይኑዋ ማዪደ፥ ሻፋ ሃፐ ቦላ ባጋና ደእያዌ ባረ ኡሸቻ ኩሽያነ ባረ ሀድርሳ ኩሽያ ሳሉዋ ዛር ደንደ፥ መናዉ ደእያዋ ሱንን ሀዋዳን ያጊደ ጫቄዳ፤ "ሀዌ ዎዲ፥ ዎደቱነ ዎድያ ባጋይ ጋካናዉ ጋምአና፤ ቃይ ጌሻ አሳቱ ዎልቃይ ክንቼቲደ ዉርያ ዎደ፥ ሀ ኡባባይካ ፖለታና" ያጌዳ።✝12:7 ሳፃ 10:5፤ 12:14

8 ሀዋ ኡባ ታን ስሳድ፤ ሽን ታዉ ገልቤና። ያትና፥ ታን፥ "ታ ጎዳዉ፥ ሀ የዎ ኡባዉ ዉርሰይ አያ ግዳኔ?" ጋደ ኦቻድ።

9 እ ዛሪደ፥ ሀዋዳን ያጌዳ፤ "ዳኔላ፥ ባ። አያዉ ጎፐ፥ ሀዌ ማጻፋይ ዉርሰ ዎዲ ጋካናዉ ጎርደቴዳዋነ ማታፋይ አ ቦላ ዎዳዋ። 10 ዳሮቱ ፓጨቲደ ከሳና፥ ጌያናነ ቶሺ ባይናዋንታ ግዳና፤ ሽን ኢታቱ ኢታባ ኦና። ኢታቱዋፐ እት ኡራይነ አኬከና፤ ሽን አዳ ኤራንቻቱ አኬካና።✝12:10 ሳፃ 22:11

11 "ሀች ሀች ያርሽያ ያርሹ ድገቶደፐነ ባየ ቱናተይ ሄ ሳኣን ኤቆደፐ 1,290 ጋላሳ።✝12:11 ዳኔላ 9:27፤ 11:31፤ ማቶሳ 24:15፤ ማር. 13:14 12 ገንጪደ 1,335 ጋላሳቱ ዉራናዉ ጋያ ኡራይ አንጀቴዳዋ።

13 "ኔና ግዶፐ፥ ኔን ዉርሰይ ጋካናዉ ባ። ኔን ሸምፓና፤ ጋላሳቱዋ ዉርሰን ኔና ጋክያ ላታ አካናዉ ደንዳናሳ" ያጌዳ።