ገፋ ገፓናዉ ኤሌሎፓ
1 ጾሳ ጎልያ ገልያ ዎደ፥ ነ ገድያ አኬካደ ታንጋ። ስሳናዉ ማታ ሺቅያዌ፥ ኤያቱ ያርሹዋ ሺሽያዋፐ አ፤ አያዉ ጎፐ፥ ኡንቱንቱ ኢታ ኦሱዋ ኦደ ደእያዋ ኤርክኖ። 2 ነ ዶናን ሃሳያናዉ፥ ጾሳ ስንንካ ብዳናዉ ኤሌሎፓ። ቃይ እትባ ጾሳዉ እማና ጋደ ነ ዎዛናን ኤሌላደ ገፓ ክቾፓ፤ አያዉ ጎፐ፥ ጾሳይ ሳሉዋን፥ ኔን ቃይ ሀዋን ሳኣን ደኣሳ፤ ሄዋ ድራዉ፥ ነ ሃሳይያ ቃላይ ጉ ግዶ። 3 ህርጋይ ዳርያ ዎደ፥ ቃማን አኩሙካ ዳሬ፤ ሄዋዳንካ፥ ብደ ዳሩ ኤያተ ቃላ ከሴ። 4 ጾሳዉ ኔን ገፔዳዋ ፖላናዉ ጋምኦፓ፤ አያዉ ጎፐ፥ ጋምእያ ኤያቱዋን ጾሳይ ናሸተና። ሄዋ ድራዉ፥ ኔን ገፔዳዋ ኡባ ፖላ።5:4 ማዝ. 66:13-14 5 እትባ ጾሳዉ ገፒደ፥ ፖለናን አግያዋፐ ኮይሮ ገፐናን አግያዌ ሎአ። 6 ኔና ነ ዶናይ ናጋራን የገናዳን፥ ነ ዶና ዛዋፐ አዳ የዳ ኦፓ፤ ቃይ ጾሳዉ ኦያዎ፥ "ካሰካ ሀዋ ታን አኬከናን ገፓድ" ጎፓ። አያዉ ጎፐ፥ ሄዋ ጾሳይ ሎይ ሀንቀያ ድራዉ፥ ኔን ዳቡራደ ደሜዳዋ፥ ነ ኩሽያ ኦሱዋ ኡባ እ ባረ ሀንቁዋን ቁጪደ ይሳናዉ ዳንዳዬ። 7 ዳሮ አኩሙዋ አኩመቶፐነ ዎይ ቃይ ዳሮባ ሃሳዮፐነ ሄ ኡባይካ መላ፤ ሄዋ ድራዉ፥ ኔን ሄዋ አጋ አጋደ ጾሳዉ ያያ።
ደኡዋ ሀዳተ
8 እት ካዉተይ ባረ ቢታን ደእያ ህዬሳቱዋ ናቂሺንነ ፕርዳ ጌላይሽን ኔን በኦፐ፥ ዳርና ማላለቶፓ። እት እት ካፖ አፐ ቦላና ሱንቲደ፥ አ ጼልያ ሀራ ካፑ ደኤ። ቃይ ኡንቱንቱ ላኡዋፐካ ቦላና ሱንቲደ፥ ኡንቱንታ ጼልያ ሀራ ካፓቱካ ደኢኖ። 9 ሀራይ አትና፥ ካትያ ግዶፐነ፥ ጎሻፐ ቤትያ አይፈቱ ዮፐ፥ ዎፓን ደአናዉ ዳንዳየና።
10 ብራ ዶስያ ኡራዉ ብር ግድ ኤረና፤ ዱረታናዉ ሲቅያ ኡራይካ ሚሻ ካል ኤረና። ሽን ሀ ኡባይካ መላ። 11 ዱረተይ ዳርያ ዎደ፥ ምያባይካ ሄዋ ኬሻ ዳሬ። ያትና፥ ባረ ማጹዋ ጮ አይፍያን ጼሊደ፥ "ታን ዱረ" ጋናፐ አትና፥ ሀራባ አዉ አያ ማዲ!
12 ኦሱዋ ኦያ አሳይ ጉ ምን፥ ዳሮ ምን፥ ሳሮ ገምእሹዋ ገምእሺደ አቄ፤ ሽን ዱሪ ባረ ዱረተዉ ኡባ ዎደ ኡንኤቲደ ቆፕያ ድራዉ፥ ገምእሹዋ ዪደ ደኤ።
13 ሳሉዋ ጉፋንን ሎይ ካዮይያዋ ሀራባካ ታን በኣድ፤ ኢታ ዎድያን ባረና ማዶ ጊደ፥ አሳይ ባረዉ ደኤዳዋፐ ጉየ ዎደ ዳጋዬ። 14 ቃይ ሄ ዱረተይ እት ኢታባይ ጋከትና ይ ክቼ። እ ናኣ የሌዳዋ ግዶፐካ፥ ናኣ ላትስያዋና ዪደ፥ መላ አቴ። 15 አስ ኡባይ ኮይሮ ካሎ የለቴዳዋዳን፥ መላ ኩሽያና ስሚደ ባና። አይ ኬሻ እ ዳቡሪደ ኦፐነ፥ ባረ ዳቡሬዳባፐ አኪደ ብያባይ አያይነ ባዋ።5:15 ኢዮባ 1:21፤ ማዝ. 49:17፤ 1 ጽሞ. 6:7
16 አስ ካሎ የለቲደ፥ ካሎ ጉየ ስምያዌካ ቃይ ሎይ ካዮትያ ኢታባ። አ ዳቡራይ ኡባይ ጫርኩዋ ኡጭያዋዳን መላ ግዶዋፐ ስንን፥ እ ሄዋን አያ ማደቲ? 17 እ ባረ ላይ ኡባ ማ ደኡዋን፥ ካዩዋን፥ ይሎትያዋን፥ ሀርግያንነ ሀንቁዋን ዉርሴ።
18 ሄዌ ሄዋ ግዶፐነ፥ ታን አኬኬዳ እት ሎኦባይ ደኤ፤ ሄዌካ ሳሉዋ ጉፋንን ጾሳይ አሳይ ደአናዳን እሜዳ ቃን ላይ ግዶን፥ አሳይ ዳቡራፐ ምያዌ፥ ኡሽያዌነ ናሸትያዌ ሎአነ በስያዋ። አያዉ ጎፐ፥ አ ካጫይ ሄዋ። 19 ጾሳይ አሳዉ ዱረተነ ማጹዋ እምያዌ፥ ባረ ዳቡራ ጋትያ ደሚደ፥ ሚድነ ኡሺደ ናሸታናሳ። ሄዌካ ቃይ ጾሳፐ አዉ እመቴዳ እሞታ። 20 ጾሳይ አ ዎዛናን ኡባ ዎደ ናሸቻ ኩን ዎያ ድራዉ፥ እ ባረ ደኡዋ ላይባ ዳሮ ቆፐና።